काठमाडौँ । अमेरिकी राष्ट्रपति डोनाल्ड ट्रम्पसँग मिल्दोजुल्दो देखिएको भन्दै ‘डोनाल्ड ट्रम्प’ नाम दिइएको दुर्लभ एल्बिनो भैँसी बङ्गलादेशभरि आकर्षणको केन्द्र बनेको छ।
सुनौलो कपाल, पहेँलो सिङ र करिब ७०० किलोग्राम तौल भएको उक्त भैँसीलाई हालै ढाकास्थित राष्ट्रिय चिडियाखानामा सारिएपछि आगन्तुकहरूको भीड बढेको छ। सामाजिक सञ्जालमा यसको तस्बिर र भिडियो भाइरल भएपछि देशका विभिन्न भागबाट मानिसहरू यसलाई हेर्न चिडियाखाना पुगिरहेका छन्।
इद अल–अधाका लागि बलिदान गर्ने उद्देश्यले राखिएको भैँसीलाई सुरक्षा कारण देखाउँदै सरकारले चिडियाखानामा स्थानान्तरण गरेको थियो। चिडियाखानामा यसको नामकरणलाई लिएर मिश्रित प्रतिक्रिया देखिएको छ। केहीले यसलाई रोचक मानेका छन् भने केहीले विश्व नेताको नाम जनावरसँग जोड्नु अनुपयुक्त भएको बताएका छन्।
स्थानीय सञ्चारमाध्यमका अनुसार सुरुमा ‘डोनाल्ड ट्रम्प’ नामसहितको सूचना बोर्ड राखिएको भए पनि पछि हटाइएको छ। हाल उक्त दुर्लभ भैँसी सामाजिक सञ्जाल र सार्वजनिक चर्चाको प्रमुख विषय बनेको छ।
