काठमाडौं । श्रम संस्कृति पार्टीका अध्यक्ष तथा प्रतिनिधिसभा सदस्य हर्क साम्पाङले सरकारले सय दिन पूरा गरे पनि जनताले प्रत्यक्ष रूपमा महसुस गर्ने गरी काम गर्न नसकेको बताएका छन्।
दार्चुलाको दुर्गम गाउँमा झोलुङ्गे पुल उद्घाटन गरी शुक्रबार काठमाडौं फर्किएका साम्पाङले त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै सरकारले केही गर्ने प्रयास गरे पनि त्यसको परिणाम जनताले अनुभूति गर्न नसकेको बताए।
सरकारको कामको मूल्यांकन नतिजाबाट हुनुपर्ने उल्लेख गर्दै उनले महँगी नियन्त्रणलगायत जनजीवनसँग प्रत्यक्ष सम्बन्धित विषयमा सुधार आवश्यक रहेको बताए।
“कोसिस उहाँहरूले गर्नुभएको हो। तर रिजल्ट चाहिँ जनतालाई त्यति महसुस भएको छैन। रिजल्ट भएको महसुस हुनुपर्दछ। महँगी धेरै भयो। अब महँगी नियन्त्रण गर्नुपर्दछ भन्ने हाम्रो सल्लाह–सुझाव थियो। म दार्चुला हुँदा देखेको थिएँ, त्यता आमसञ्चार छैन। अब हेर्न पनि पाइँदैन। पेट्रोलको भाउ अलि घट्यो रे भन्ने छ,” उनले भने।
