काठमाडौं । युक्रेनको राजधानी किभमा सोमबार बिहान रुसले ब्यालिस्टिक मिसाइल प्रहार गर्दै व्यापक आक्रमण गरेको छ। आक्रमणमा कम्तीमा १० जनाको मृत्यु भएको छ भने ४६ जना घाइते भएका छन्।
किभका मेयर भिटाली क्लित्च्कोले टेलिग्राममार्फत जानकारी दिँदै ऐतिहासिक पोदिल जिल्लास्थित एक भवनको सातौँ र नवौँ तल्लाको भग्नावशेषमा अझै धेरै मानिस फसेको हुन सक्ने आशंका व्यक्त गरेका छन्।
किभ सैन्य प्रशासनका प्रमुख तैमुर त्काचेन्कोका अनुसार पोदिल्स्की जिल्लाको एक आवासीय भवन आंशिक रूपमा भत्किएको छ। डार्नित्सिया जिल्लाका कयौँ बहुमञ्जिला भवनमा पनि क्षति पुगेको छ। त्यहाँ पनि मानिसहरू भग्नावशेषमुनि पुरिएको आशंका गरिएको छ।
“ती सर्वसाधारण बसोबास गर्ने आवासीय भवन हुन्, जहाँ मानिसहरू सुतिरहेका थिए,” त्काचेन्कोले बताएका छन्।
यस्तै, किभ क्षेत्रका गभर्नर माइकोला कालाश्निकका अनुसार किभनजिकैको बुचा सहरमा पनि रुसी आक्रमणका कारण एक जनाको मृत्यु भएको छ भने अन्य १० जना घाइते भएका छन्।
यसअघि गत बिहीबार रुसले किभमा गरेको अर्को आक्रमणमा कम्तीमा ३० जनाको ज्यान गएको थियो। यस वर्षकै सबैभन्दा घातक मानिएको उक्त आक्रमणपछि किभमा शोक दिवससमेत घोषणा गरिएको थियो।
