काठमाडौं । बागमती प्रदेश समस्याग्रस्त सहकारी व्यवस्थापन समितिले पाँच समस्याग्रस्त सहकारी संस्थाका साना बचतकर्ताको रकम फिर्ता गर्ने तयारी थालेको छ ।
समितिका अनुसार सिभिल सेभिङ एन्ड क्रेडिट को–अपरेटिभ, दर्शन बचत तथा ऋण सहकारी, सुमेरु बचत तथा ऋण सहकारी, लालीगुराँस बचत तथा ऋण सहकारी र नेशनल नमोबुद्ध बचत तथा ऋण सहकारीका साना बचतकर्तालाई रकम फिर्ता गर्ने निर्णय गरिएको हो ।
बागमती प्रदेशका मुख्यमन्त्री इन्द्रबहादुर बानियाँको उपस्थितिमा भएको छलफलपछि बचत फिर्ता प्रक्रिया अघि बढाइएको समितिले जनाएको छ ।
समिति सदस्य रामेश्वर ढकालका अनुसार असार मसान्तभित्रै साना बचतकर्तालाई रकम उपलब्ध गराउने तयारी भइरहेको छ । उनका अनुसार असार २७ गतेदेखि मसान्तसम्म रकम फिर्ताको प्रक्रिया सञ्चालन गर्ने योजना छ भने हाल बचतकर्ताको विवरण प्रमाणीकरण गर्ने काम भइरहेको छ ।
साना बचतकर्ताको रकम फिर्ताका लागि करिब नौ करोड रुपैयाँ संकलन भइसकेको समितिले जनाएको छ । रकम लिन सम्बन्धित सहकारीका बचतकर्तालाई अनामनगरस्थित समितिको कार्यालयमा सम्पर्क गर्न आग्रह गरिएको छ ।
समितिले सिभिल, सुमेरु, लालीगुराँस र नेशनल नमोबुद्ध सहकारीका बचतकर्तालाई अधिकतम एक लाख रुपैयाँसम्म तथा दर्शन बचत तथा ऋण सहकारीका बचतकर्तालाई अधिकतम १० हजार रुपैयाँसम्म फिर्ता गर्ने योजना बनाएको छ ।
यसबाट पाँच सहकारीका करिब तीन हजार साना बचतकर्ता लाभान्वित हुने समितिका सदस्य ढकालले जानकारी दिए ।यसअघि समितिले गत जेठ २२ गते समस्याग्रस्त घोषणा गरिएका ती सहकारी संस्थाका ११४ जना ठूला ऋणीको नाम सार्वजनिक गरेको थियो । समितिले सहकारीबाट लिएको ऋण तत्काल चुक्ता गर्न ऋणीहरूलाई आग्रहसमेत गरेको थियो ।
