काठमाडौं । साताको अन्तिम कारोबार दिन शुक्रबार सेयर बजार परिसूचक नेप्सेमा उल्लेख्य सुधार देखिएको छ। नेप्से ७९.७४ अंकले उकालो लाग्दै २६७७.५४ विन्दुमा बन्द भएको हो।
शुक्रबार कुल ३३५ कम्पनीका १ करोड ३ लाख ८९ हजार ७७ कित्ता सेयर किनबेच भएका छन्। दिनभरमा ४ अर्ब ५७ करोड ५० लाख ९४ हजार ७२३ रुपैयाँ बराबरको कारोबार भएको छ। अघिल्लो दिन बिहीबारको तुलनामा कारोबार रकम केही बढेको हो। बिहीबार बजारमा ४ अर्ब ५६ करोड रुपैयाँ बराबरको कारोबार भएको थियो। यसअघि बुधबार पनि नेप्से सकारात्मक दिशामा बन्द भएको थियो।
कारोबार भएका कम्पनीमध्ये अधिकांशको सेयर मूल्य बढेको छ। शुक्रबार २५९ कम्पनीको मूल्य वृद्धि हुँदा १३ कम्पनीको घटेको छ भने दुई कम्पनीको मूल्यमा कुनै परिवर्तन भएन।
कारोबार रकमका आधारमा आँखु खोला जलविद्युत कम्पनी सबैभन्दा अगाडि रह्यो। उक्त कम्पनीको २२ करोड रुपैयाँभन्दा बढीको सेयर कारोबार भएको छ। कर्पोरेट डेभलपमेन्ट बैंकको १७ करोड रुपैयाँ बराबरको कारोबार हुँदा रिलायन्स स्पिनिङ मिल्स र रिडी पावरको क्रमशः १५/१५ करोड रुपैयाँ बराबरको सेयर कारोबार भएको छ। नगदी ग्रुप पावरको पनि १४ करोड रुपैयाँ बराबरको कारोबार भएको छ।
शुक्रबारको बजारमा म्युचुअल फन्डबाहेक सबै समूहका उपसूचक सकारात्मक देखिएका छन्। म्यानुफ्याक्चरिङ एन्ड प्रोसेसिङ समूहको उपसूचक ४.६० प्रतिशतले बढेको छ भने हाइड्रोपावर समूह ४.५८ प्रतिशत र इन्भेस्टमेन्ट समूह ४.१२ प्रतिशतले उकालो लागेको छ।
कम्पनीगत रूपमा श्रीनगर एग्रिटेक इन्डस्ट्रिजको सेयर मूल्य सकारात्मक सर्किट तहमा पुगेको छ। अर्कोतर्फ आत्मनिर्भर लघुवित्त वित्तीय संस्थाका लगानीकर्ताले सबैभन्दा बढी नोक्सानी व्यहोरेका छन्। उक्त कम्पनीको सेयर मूल्य १५ प्रतिशतले घटेको छ।
