काठमाडौं । समस्याग्रस्त सहकारी व्यवस्थापन समितिको कार्यालयले आज (मंगलबार)देखि पाँच वटा समस्याग्रस्त बचत तथा ऋण सहकारी संस्थाका साना बचतकर्तालाई बचत रकम फिर्ता गर्न सुरु गरेको छ।
समितिका सदस्य रामेश्वर ढकालका अनुसार समस्याग्रस्त घोषित सिभिल बचत तथा ऋण सहकारी संस्था, दर्शन बचत तथा ऋण सहकारी संस्था, सुमेरु बचत तथा ऋण सहकारी संस्था, नेशनल नमोबुद्ध बचत तथा ऋण सहकारी संस्था र लालीगुराँस बचत तथा ऋण सहकारी संस्थाका साना बचतकर्तालाई अधिकतम एक लाख रुपैयाँसम्म बचत रकम फिर्ता गरिनेछ।
बागमती प्रदेशका मुख्यमन्त्री इन्द्रबहादुर बानियाँले ललितपुरको जावलाखेलस्थित प्रदेश सुशासन केन्द्रको सभाहलमा आयोजित कार्यक्रममा बचत फिर्ता अभियानको शुभारम्भ गर्नेछन्। केही दिनअघि मुख्यमन्त्रीको उपस्थितिमा भएको छलफलले ती सहकारीका साना बचतकर्तालाई बचत रकम फिर्ता गर्ने निर्णय गरेको थियो।
समिति सदस्य ढकालका अनुसार असार मसान्तभित्र साना बचतकर्ताको रकम फिर्ता गर्ने लक्ष्यसहित आवश्यक तयारी पूरा गरिएको छ। बचतकर्ताको विवरण प्रमाणीकरण (भेरिफिकेसन) गर्ने प्रक्रिया सम्पन्न भइसकेको छ भने बचत फिर्ताका लागि करिब नौ करोड रुपैयाँ संकलन भइसकेको छ।
समितिले सिभिल, सुमेरु, लालीगुराँस र नेशनल नमोबुद्ध सहकारीका बचतकर्तालाई अधिकतम एक लाख रुपैयाँसम्म तथा दर्शन बचत तथा ऋण सहकारीका बचतकर्तालाई अधिकतम १० हजार रुपैयाँसम्म बचत रकम फिर्ता गर्ने योजना बनाएको छ।
यस अभियानबाट पाँचवटै सहकारीका करिब तीन हजार साना बचतकर्ताले आफ्नो बचत रकम फिर्ता पाउने समितिको विश्वास छ।
यसअघि समितिले गत जेठ २२ गते समस्याग्रस्त घोषित ती सहकारी संस्थाका ११४ जना ठूला ऋणीको नामावली सार्वजनिक गर्दै सहकारीबाट लिएको ऋण तत्काल चुक्ता गर्न आग्रह गरेको थियो।
