काठमाडौं । आज प्रतिनिधिसभाका तीन वटा संसदीय समितिको बैठक बस्दैछ। अर्थ समिति, शिक्षा, स्वास्थ्य तथा सूचना प्रविधि समिति र राज्यका निर्देशक सिद्धान्त, नीति तथा दायित्वको कार्यान्वयन अनुगमन तथा मूल्याङ्कन समिति (संयुक्त) का बैठक तय भएका छन्।
अर्थ समितिको बैठक
अर्थ समितिको बैठक बिहान १० बजे बस्नेछ। बैठकमा नेपाल राष्ट्र बैंक ऐन, २०५८ संशोधनसम्बन्धी विधेयकका विषयमा तयार गरिएको समितिको प्रतिवेदनमाथि छलफल हुने कार्यसूची छ।
शिक्षा, स्वास्थ्य तथा सूचना प्रविधि समिति
यस समितिको बैठक बिहान ९ बजे सुरु हुनेछ। राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१ माथि बैठकमा छलफल हुने बताइएको छ।
संयुक्त समितिको बैठक
राज्यका निर्देशक सिद्धान्त, नीति तथा दायित्वको कार्यान्वयन अनुगमन तथा मूल्याङ्कन समिति (संयुक्त) को बैठक बिहान ११ः१५ बजे बस्नेछ। बैठकमा समितिका पूर्वसभापतिसँग सम्बन्धित विषयमा छलफल गर्ने कार्यसूची रहेको छ।
