काठमाडौँ । फिलिपिन्सका अधिकारीहरूले हिरासतमा राखेका ६४ जना चिनियाँ नागरिकलाई बिहीबार रिहा गरिएको फिलिपिन्सस्थित चिनियाँ दूतावासले जनाएको छ। दूतावासका अनुसार थप छ जनाको रिहाइ प्रक्रिया जारी छ र उनीहरूलाई पनि चाँडै रिहा गरिने अपेक्षा गरिएको छ।
दक्षिणी फिलिपिन्सको मिसामिस ओरिएन्टल प्रान्तस्थित “स्टिल प्लान्ट” मा कार्यरत ती चिनियाँ नागरिकलाई मे १५ मा फिलिपिन्सका कानून कार्यान्वयन अधिकारीहरूले नियन्त्रणमा लिएका थिए।
दूतावासले जारी गरेको विज्ञप्तिमा फिलिपिन्सको न्यायालयले उनीहरू विरुद्ध आणविक सुरक्षा ऐन, अध्यागमन ऐन र श्रम संहिता उल्लङ्घन भएको प्रमाणित गर्ने पर्याप्त आधार नभएको भन्दै रिहा गर्ने आदेश दिएको उल्लेख गरिएको छ।
चिनियाँ दूतावासले यस घटनालाई उच्च प्राथमिकताका साथ लिएको बताउँदै फिलिपिन्सका सम्बन्धित निकायहरूसँग निष्पक्ष, छिटो र कानुनी समाधान तथा आफ्ना नागरिकहरूको अधिकारको पूर्ण संरक्षणको माग गरेको जनाएको छ।
साथै, दूतावासले फिलिपिन्समा रहेका चिनियाँ नागरिक तथा संस्थाहरूको सुरक्षा र अधिकारको संरक्षण निरन्तर गर्ने प्रतिबद्धता व्यक्त गर्दै सबै पक्षलाई कानून र नियमहरूको कडाइका साथ पालना गर्न आग्रह गरेको छ।
