काठमाडौं । कुलमान घिसिङ नेतृत्वको उज्यालो नेपाल पार्टी र हाम्रो पार्टी नेपालबीच पार्टी एकता भएको छ। शुक्रबार त्रिपुरेश्वरस्थित उज्यालो नेपाल पार्टीको केन्द्रीय कार्यालयमा दुवै पक्षबीच सातबुँदे सहमति पत्रमा हस्ताक्षर गर्दै एकता घोषणा गरिएको हो।
समान लक्ष्य र अठोटका साथ राष्ट्रसेवामा अघि बढ्ने उद्देश्यसहित दुई दलले एकता गरेका हुन्।
पार्टी समायोजनसम्बन्धी सहमतिपत्रमा उज्यालो नेपाल पार्टीका महासचिव धर्म चौधरी र हाम्रो पार्टी नेपालका महामन्त्री दधिराम परियारले हस्ताक्षर गरेका छन्।
सहमतिअनुसार दुवै दलले जनआन्दोलनको मर्म, सामाजिक न्याय, समावेशिता र समानुपातिक प्रतिनिधित्वलाई साझा राजनीतिक एजेन्डाका रूपमा अघि बढाउने भएका छन्। साथै भ्रष्टाचार र कुशासनविरुद्ध संयुक्त संघर्ष गर्ने प्रतिबद्धता पनि जनाइएको छ।
