काठमाडौँ । आठौँ राष्ट्रिय महिला अधिकार दिवसको अवसरमा प्रधानमन्त्री वालेन्द्र शाहले स्वदेश तथा विदेशमा रहेका सम्पूर्ण नेपाली महिलाहरूलाई शुभकामना व्यक्त गर्दै महिला अधिकारको संरक्षण, संवर्द्धन र प्रवर्द्धनमा सक्रिय सबैप्रति सम्मान प्रकट गरेका छन्।
“महिला अधिकारको सम्मान: आत्मनिर्भरता र समृद्धिको अभियान” भन्ने मूल नारासहित देशभर विभिन्न कार्यक्रम आयोजना भइरहेका बेला प्रधानमन्त्री शाहले जारी गरेको शुभकामना सन्देशमा महिला सशक्तीकरण र समानताको यात्रामा महत्वपूर्ण उपलब्धि हासिल भएको उल्लेख गरेका छन्।
उनले राज्यले अवलम्बन गरेका समावेशी नीतिका कारण पछिल्ला वर्षहरूमा महिलाको प्रतिनिधित्व र सहभागितामा उल्लेखनीय वृद्धि भएको तथा लैङ्गिक विकास सूचकाङ्कमा क्रमिक सुधार देखिएको बताए। तर समाजमा विद्यमान विभिन्न कुप्रथा र विभेद अझै चुनौतीका रूपमा कायम रहेको उनको भनाइ छ।
प्रधानमन्त्री शाहले सबै प्रकारका लैङ्गिक हिंसाप्रति शून्य सहनशीलताको नीति अपनाउनुपर्नेमा जोड दिँदै पितृसत्तात्मक सोच, बालविवाह, बोक्सी आरोप, छाउपडी, दाइजो तथा तिलकजस्ता कुप्रथाको अन्त्यका लागि कानुनी कारबाहीसँगै सामाजिक चेतना अभिवृद्धि आवश्यक रहेको बताए।
उनले लैङ्गिक, घरेलु तथा डिजिटल हिंसामुक्त समाज निर्माणका लागि लैङ्गिकमैत्री व्यवहारको विकास गर्दै देशव्यापी सचेतना अभियान सञ्चालन गर्नुपर्ने आवश्यकता औँल्याएका छन्।
