काठमाडौँ । काठमाडौंको ठमेल क्षेत्रमा अवैध गतिविधिमा संलग्न रहेको आरोपमा १५ जना बंगलादेशी नागरिक पक्राउ परेका छन्। उनीहरूलाई भिजिट भिसाको दुरुपयोग गर्दै ब्ल्याकमेलिङ र अनलाइन ठगीजस्ता गतिविधि सञ्चालन गरेको आरोप छ।
काठमाडौं उपत्यका अपराध अनुसन्धान कार्यालयको टोलीले शंकास्पद रूपमा बसोबास गरिरहेका विदेशी नागरिकबारे प्राप्त सूचनाका आधारमा उनीहरूलाई पक्राउ गरेको हो।
प्रहरीका अनुसार पक्राउ परेकाहरूले पकनाजोलस्थित एक होटलका विभिन्न तलामा कोठा भाडामा लिएर विदेशी मोडल तथा युवतीका नाममा नक्कली फेसबुक अकाउन्ट सञ्चालन गर्दै आएका थिए। ती अकाउन्टमार्फत बंगलादेशी र भारतीय नागरिकसँग सम्बन्ध गाँस्ने, संवाद बढाउने र पछि धम्की तथा ब्ल्याकमेल गरेर रकम असुल्ने काम गरेको प्रारम्भिक अनुसन्धानबाट खुलेको छ।
पक्राउ परेकामध्ये २५ वर्षीय एमडी माजिदुल इस्लाम रेडोय पनि रहेका छन्। सबैलाई थप अनुसन्धान र कानुनी कारबाहीका लागि अध्यागमन विभाग पठाइएको प्रहरीले जनाएको छ।
