काठमाडौं। भूमि व्यवस्थापन तथा अभिलेख विभागले महानगरपालिका र उपमहानगरपालिका क्षेत्रमा ठूलो रकमको घरजग्गा कारोबार गर्न चाहने फर्म, कम्पनी तथा संस्थालाई अनिवार्य रूपमा इजाजतपत्र लिनुपर्ने व्यवस्था कार्यान्वयनमा रहेको स्मरण गराएको छ। विभागले इच्छुक संस्था तथा कम्पनीलाई २१ दिनभित्र अनलाइन प्रणालीमार्फत आवेदन दिन आग्रह गरेको हो।
राजपत्रमा प्रकाशित व्यवस्थाअनुसार महानगरपालिका र उपमहानगरपालिका क्षेत्रमा एकपटकमा तीन करोड रुपैयाँभन्दा बढी मूल्यको घरजग्गा कारोबार गर्न चाहने फर्म, कम्पनी वा संस्थाले कारोबारअघि अनिवार्य रूपमा इजाजतपत्र प्राप्त गर्नुपर्नेछ।
कारोबारअनुसार दस्तुर
इजाजतपत्रका लागि कारोबारको रकमअनुसार दस्तुर निर्धारण गरिएको छ।
- ५ करोड रुपैयाँसम्मको कारोबार : ५ लाख रुपैयाँ दस्तुर
- ५ करोड रुपैयाँभन्दा बढी कारोबार : १० लाख रुपैयाँ दस्तुर
विभागका अनुसार यसअघि सूचना बमोजिम अनलाइन आवेदन पेस गरे पनि २०८३ असार मसान्तसम्म इजाजतपत्र प्राप्त नगरेका फर्म, कम्पनी तथा संस्थाले समेत नयाँ सूचनाअनुसार पुनः अनलाइन आवेदन दिनुपर्नेछ।
अनलाइन आवेदन दिएपछि पेस गरिएका सम्पूर्ण कागजातको एक–एक प्रति प्रिन्ट गरी विभागमा बुझाउनुपर्नेछ। साथै आवेदन दर्तापछि सम्बन्धित कम्पनी वा संस्थाका सञ्चालक सदस्यले नेपाल प्रहरीको केन्द्रीय अपराध सूचना अभिलेखालयको अभिलेखका आधारमा आपराधिक गतिविधिमा संलग्न नरहेको व्यहोराको पत्र पनि पेस गर्नुपर्ने व्यवस्था गरिएको विभागले जनाएको छ।
विभागले इजाजतपत्र प्रक्रिया तथा आवश्यक जानकारीका लागि विभागमै सम्पर्क गर्न सम्बन्धित फर्म, कम्पनी तथा संस्थालाई अनुरोध गरेको छ।
