काठमाडौं। आन्तरिक राजस्व विभागले करदाता प्रोत्साहन उपहार कार्यक्रमको सम्पूर्ण प्राविधिक तयारी पूरा गरेको जनाएको छ। विभागले आज पहिलोपटक उपहार कार्यक्रम घोषणा गर्ने भएको हो।
विभागका अनुसार साउन १ गतेदेखि १५ गतेसम्म अनलाइनमार्फत वस्तु तथा सेवा खरिद गरेका उपभोक्ता तथा नगदमा खरिद गरी विभागको वेबसाइटमा भौतिक बिल अपलोड गरेका उपभोक्तालाई लक्षित गर्दै उपहार घोषणा गरिनेछ।
साउन १ देखि १५ गतेसम्मको प्रत्येक दिनको कारोबारका आधारमा १५ जना उपभोक्ताले कर कट्टीपछि जनही एक लाख रुपैयाँ नगद पुरस्कार प्राप्त गर्नेछन्।
यसैगरी, सोही अवधिमा वस्तु तथा सेवा खरिद गरेका सबै योग्य उपभोक्तामध्ये एक जनालाई बम्पर उपहारस्वरूप १० लाख रुपैयाँ नगद प्रदान गरिनेछ। बम्पर पुरस्कारमा भने प्रचलित कानुनअनुसार कर लाग्ने विभागले जनाएको छ।
कसरी सहभागी हुने ?
अर्थमन्त्री डा. स्वर्णिम वाग्लेले आर्थिक वर्ष २०८३/८४ को बजेटमार्फत करदातालाई प्रोत्साहन गर्न यो कार्यक्रम सञ्चालन गर्ने घोषणा गरेका थिए। करदाता प्रोत्साहन कार्यक्रम सञ्चालन कार्यविधिअनुसार अबदेखि हरेक महिनाको १६ गते (१ देखि १५ गतेसम्मको कारोबार) र महिनाको अन्तिम दिन (१६ गतेदेखि महिनाको अन्तिम दिनसम्मको कारोबार) उपहार घोषणा गरिनेछ।
बैङ्क वा डिजिटल वालेटको क्यूआरमार्फत वस्तु तथा सेवा खरिद गर्ने उपभोक्ता स्वतः कार्यक्रममा सहभागी हुनेछन्। तर, पुरस्कार दाबी गर्न खरिदको बिल सुरक्षित राख्नुपर्नेछ।
नगदमा खरिद गर्ने उपभोक्ताले भने प्यान वा भ्याट बिल अनिवार्य रूपमा लिएर आन्तरिक राजस्व विभागको वेबसाइटमा अपलोड गर्नुपर्नेछ। त्यसपछि उपहार कार्यक्रममा सहभागी भएको कुपन प्राप्त हुनेछ।
