काठमाडौं । बेलायती राजपरिवारका सदस्य प्रिन्स ह्यारी र उनकी पत्नी मेघन मार्कल आगामी महिना आफ्ना दुई सन्तानसहित बेलायत भ्रमणमा जाने भएका छन्।
बेलायत का सञ्चारमाध्यमहरू बीबीसी, द टेलिग्राफ र आईटीभी न्यूज का अनुसार ड्युक र डचेस अफ ससेक्स ह्यारी र मेघन आफ्ना छोरा आर्ची (७) र छोरी लिलिबेट (५) सहित यात्रा गर्ने अपेक्षा गरिएको छ। यो सन् २०२० पछि उनीहरूको परिवारसहितको पहिलो बेलायत भ्रमण हुनेछ।
सन् २०२० मा राजपरिवारको सक्रिय भूमिकाबाट अलग हुँदै अमेरिका सरेका उनीहरू हाल क्यालिफोर्निया मा बसोबास गरिरहेका छन्। त्यसयता उनीहरू र बेलायती राजपरिवारबीच सम्बन्ध सार्वजनिक रूपमा चिसिएको थियो। विभिन्न अन्तर्वार्ता र पुस्तकमार्फत ह्यारी–मेघनले ट्याब्लोइड मिडियाको दबाब, संस्थागत जातीय विभेद, अनलाइन दुर्व्यवहार, पारिवारिक तनाव र आर्थिक स्वतन्त्रताको चाहनालाई बेलायत छोड्नुका कारणका रूपमा उल्लेख गरेका थिए।
पछिल्ला वर्षहरूमा प्रिन्स ह्यारीले केही छोटा भ्रमण गरेका छन्, जसमा सन् २०२२ को महारानी एलिजाबेथ द्वितीयको अन्त्येष्टि र सन् २०२३ को राजा चाल्र्स तृतीयको राज्याभिषेकमा सहभागिता समावेश छ। गत वर्ष उनले १९ महिनापछि पहिलो पटक आफ्ना पिता राजा चार्ल्स तृतीय सँग भेट गरेका थिए।
हालैको भ्रमण उनीहरूले स्थापना गरेको इन्भिक्टस गेम्स सम्बन्धी कार्यक्रमसँग पनि जोडिएको बताइएको छ। यद्यपि यो भ्रमणका क्रममा राजपरिवारभित्र पुनर्मिलन वा राजा र नातिनातिनीबीच भेट हुने–नहुनेबारे भने स्पष्ट जानकारी आएको छैन।
