काठमाडौं । सरकारले राष्ट्रसेवक कर्मचारीहरूको नयाँ तलबमान स्वीकृत गरेको छ । मन्त्रिपरिषद् बैठकले आर्थिक वर्ष २०८३/८४ को बजेटमार्फत गत साउन १ गतेदेखि लागू हुने गरी विभिन्न क्षेत्रका कर्मचारीहरूको नयाँ तलबमान तथा सुविधा स्वीकृत गरेको अर्थ मन्त्रालयले जनाएको छ ।
नयाँ तलबमान निजामती कर्मचारी, नेपाली सेना, नेपाल प्रहरी, सशस्त्र प्रहरी बल, स्वास्थ्य सेवा, संसद् सेवा, सामुदायिक विद्यालयका शिक्षक तथा प्रदेश र स्थानीय तहका कर्मचारीमा लागू हुनेछ ।
स्वीकृत नयाँ तलबमानअनुसार मुख्यसचिव र प्रधानसेनापतिको कुल तलब समान ९० हजार ५९४ रुपैयाँ कायम भएको छ । यसअघि उनीहरूको सुरु तलबमान ८४ हजार ९३२ रुपैयाँ रहेकामा ग्रेड वृद्धिपछि कुल तलब ९० हजार ५९४ रुपैयाँ पुगेको हो ।
यस्तै, नेपाल प्रहरी र सशस्त्र प्रहरीका महानिरीक्षक तथा सरकारका सचिवहरूको कुल तलब ८४ हजार ५७६ रुपैयाँ कायम भएको छ ।
नयाँ तलबमानअनुसार सबैभन्दा कम तलब पाउने प्रथम स्तरका कार्यालय सहयोगीको कुल तलब २८ हजार ९८४ रुपैयाँ पुगेको छ । श्रेणीविहीन कर्मचारी (हल्कारा, हुलाकी र कार्यालय सहयोगी) को सुरु तलबमान २७ हजार १७२ रुपैयाँ रहेकामा ग्रेड थप भएपछि कुल तलब २८ हजार ९८४ रुपैयाँ पुगेको हो ।
सरकारले बजेट वक्तव्यमार्फत कर्मचारीको पारिश्रमिकमा करिब २१ प्रतिशत वृद्धि गर्ने घोषणा गरेको थियो । बजेट वक्तव्यमा हाल प्राप्त भइरहेको महँगी भत्ता निरन्तरता दिँदै सुरु स्केलमा १० प्रतिशत तलब वृद्धि गरिएको र कार्यसम्पादनमा आधारित पारिश्रमिक प्रणाली सुरु गर्न नयाँ तलबमानको १० प्रतिशत मासिक प्रोत्साहन भत्ताको व्यवस्था गरिएको उल्लेख छ ।
सरकारका अनुसार यसबाट कर्मचारीहरूले हाल पाइरहेको पारिश्रमिकमा करिब २१ प्रतिशत खुद वृद्धि हुनेछ भने ग्रेडसहित न्यूनतम पारिश्रमिक करिब ४० हजार रुपैयाँदेखि १ लाख रुपैयाँभन्दा माथि कायम हुनेछ ।
