काठमाडौं। सुदूरपश्चिममा एलपी ग्यास अभाव भएको हल्ला फैलिएसँगै बिक्री र आपूर्ति दुवै बढेको छ। नेपाल आयल निगमको सुदूरपश्चिम प्रादेशिक कार्यालयका अनुसार साउन २४ गतेसम्म प्रदेशमा १ लाख १५ हजार ९९० सिलिन्डर ग्यास बिक्री भइसकेको छ।
गत वर्षको साउनभर १ लाख १२ हजार ७७० सिलिन्डर बिक्री भएको थियो। यस वर्ष २४ दिनमै गत वर्षको पूरै महिनाभन्दा ३ हजार २२० सिलिन्डर बढी बिक्री भएको हो।
कार्यालय प्रमुख मनोहर डिसीका अनुसार साउनको बाँकी अवधिका लागि थप ५० हजार सिलिन्डर ग्यास आउने क्रममा छ। उनका अनुसार प्रदेशमा ग्यासको आपूर्ति पर्याप्त रहे पनि अभावको हल्लाका कारण उपभोक्ताले अतिरिक्त सिलिन्डर भण्डारण गर्दा बजारमा दबाब देखिएको हो।
जिल्ला प्रशासन कार्यालय कैलालीको बजार अनुगमनका क्रममा पनि ग्यास डिलरमा नियमित आपूर्ति भइरहेको तर माग अस्वाभाविक रूपमा बढेको पाइएको थियो।
निगमले उपभोक्तालाई हल्लाको पछि लागेर अतिरिक्त सिलिन्डर भण्डारण नगर्न आग्रह गरेको छ।
