काठमाडौं। विभिन्न १५ बुँदे माग राख्दै आन्दोलनरत वैदेशिक रोजगार व्यवसायीहरूले सोमबार ताहाचलस्थित वैदेशिक रोजगार विभाग परिसरमा धर्ना दिएका छन्।
वैज्ञानिक सेवा शुल्क निर्धारण, हवाई भाडा नियमन, व्यवसायीमाथिको धरपकड अन्त्य र वैदेशिक रोजगार ऐन संशोधनलगायत माग राख्दै उनीहरूले सरकारी सेवा बहिष्कार गरेर विरोध जनाएका हुन्।
नेपाल वैदेशिक रोजगार व्यवसायी संघका अनुसार प्रदर्शनमा ७ सयभन्दा बढी व्यवसायी सहभागी थिए। संघले माग सम्बोधनका लागि विभागमा ज्ञापनपत्रसमेत बुझाएको छ।
संघका अध्यक्ष डिकबहादुर खत्रीले विभागले नियतवश श्रम स्वीकृति रोकेको आरोप लगाउँदै बिहीबार र शुक्रबार आवेदन गरिएका ३ हजारभन्दा बढी श्रम स्वीकृति रोकिएको दाबी गरे।
व्यवसायीहरूले माग सम्बोधन नभए भदौ १ गतेदेखि सबै मुलुकमा श्रमिक पठाउने प्रक्रिया पूर्ण रूपमा बन्द गर्ने चेतावनी दिएका छन्। उनीहरूले आवश्यक परे म्यानपावर कम्पनीका कार्यालय बन्द गरी लाइसेन्स सरकारलाई बुझाउनेसम्मका चरणबद्ध आन्दोलन घोषणा गरेका छन्।
व्यवसायीहरूले हाल कायम १० हजार रुपैयाँ सेवा शुल्कको सट्टा श्रमिकको एक महिनाको तलबबराबर वैज्ञानिक सेवा शुल्क तोक्नुपर्ने, श्रमिकको लागत पारदर्शी बनाउनुपर्ने र हवाई भाडा घटाउनुपर्ने माग गरेका छन्।
