काठमाडौं । रौतहटको लालबकैया नदीमा नुहाउने क्रममा मंगलबार बेपत्ता भएका तीन बालबालिकामध्ये दुई जनाको शव फेला परेको छ।
घटनास्थलबाट करिब पाँच किलोमिटर दक्षिणतर्फ परोहा नगरपालिका–२ जिंगडवास्थित लालबकैया नदीको किनारमा दुई बालबालिकाको शव भेटिएको हो।
जिल्ला प्रहरी कार्यालय रौतहटका प्रहरी प्रवक्ता एवं प्रहरी नायब उपरीक्षक बसन्त गौतमका अनुसार देवाही गोनाही नगरपालिका–१ करुनियाका करमे आलमका १० वर्षीय छोरा मोहमद रमतुल्लाह र सोही स्थानका हिसी अख्तरकी १० वर्षीया छोरी सबनम खातुनको शव फेला परेको हो। प्रहरीले दुवैको शव प्रादेशिक अस्पतालमा पठाएको छ।
घटनामा बेपत्ता भएकी स्थानीय शेख खुरसेदकी १० वर्षीया छोरी रौशन खातुनको अवस्था भने अझै अज्ञात छ। उनको खोजी कार्य जारी रहेको प्रहरी प्रवक्ता गौतमले जानकारी दिए।
मंगलबार दिउँसो करिब २ बजेदेखि लालबकैया नदीमा नुहाउने क्रममा तीनै जना बालबालिका बेपत्ता भएका थिए। घटनालगत्तै नेपाल प्रहरी र सशस्त्र प्रहरीको टोलीले खोजी सुरु गरेको थियो।
