काठमाडौँ । प्रिज्मा एड्भर्टाइजिङका संस्थापक, प्रमुख कार्यकारी अधिकृत (सीईओ) तथा क्रिएटिभ हेड रञ्जीत आचार्य विश्वकै प्रतिष्ठित कान्स कर्पोरेट मिडिया एण्ड टिभी अवार्ड २०२६ को निर्णायक मण्डल (जुरी) सदस्यमा मनोनित भएका छन्।

कर्पोरेट फिल्म, भिजुअल स्टोरीटेलिङ र ब्रान्डेड मिडिया क्षेत्रको विश्वस्तरीय प्रतियोगिताका रूपमा परिचित यस अवार्डको निर्णायक टोलीमा नेपाली प्रतिनिधित्व हुनु देशकै विज्ञापन तथा सञ्चार क्षेत्रका लागि ऐतिहासिक उपलब्धिका रूपमा हेरिएको छ।

अष्ट्रियाको भियनामा मुख्यालय रहेको कान्स कर्पोरेट मिडिया एण्ड टिभी अवार्ड सन् २०१० देखि आयोजना हुँदै आएको छ। फ्रान्सको कान्समा हुने यस महोत्सवले विश्वभरका कर्पोरेट फिल्म, वृत्तचित्र, अनलाइन मिडिया सामग्री तथा ब्रान्ड कम्युनिकेसनका उत्कृष्ट कृतिलाई सम्मान गर्ने गर्छ। यसअघि ओस्कार र एमी अवार्ड विजेतासमेत निर्णायकको भूमिकामा सहभागी भइसकेका छन्।

तीन दशकभन्दा बढी समयदेखि विज्ञापन, ब्रान्ड रणनीति, फिल्म निर्माण तथा जनसम्पर्क क्षेत्रमा सक्रिय आचार्य नेपाली विज्ञापन जगतका स्थापित नाम हुन्। उनको नेतृत्वमा प्रिज्मा एड्भर्टाइजिङले लगातार चार पटक ‘बेस्ट एजेन्सी अफ द इयर’ उपाधि जित्दै नेपालको सर्वाधिक सम्मानित स्वतन्त्र विज्ञापन एजेन्सीका रूपमा पहिचान बनाएको छ।

कोका–कोलाको ‘मन खोलौँ कोकसँग’, एनसेलको ऐतिहासिक रिब्रान्डिङ अभियानलगायतका चर्चित अभियानमा उनको महत्वपूर्ण भूमिका रहेको छ। उनले सिर्जना गरेका ‘मुटु चाहिन्छ मुटु’, ‘मुड चेन्ज तुरुन्तै’, ‘चिसो भनेकै कोका–कोला’ र ‘गरी खाना देऊ’ जस्ता नारा नेपाली समाजमा लोकप्रिय बनेका छन्।

आचार्यले अन्तर्राष्ट्रिय स्तरमा पनि विभिन्न सम्मान प्राप्त गरिसकेका छन्। अमेरिकाको जोन्सन एण्ड जोन्सनबाट ‘बेल रिङ्गर अवार्ड’, भारतको ‘एबी अवार्ड’ तथा हालै सिंगापुरमा प्रदान गरिएको ‘ब्रान्डलरिएट बेस्ट ब्रान्ड्स अवार्ड २०२५’ उनका उल्लेखनीय उपलब्धि हुन्।

मनोनयनबारे प्रतिक्रिया दिँदै आचार्यले भने, “सिर्जनशीलताको कुनै सीमा हुँदैन। उत्कृष्ट कथा जहाँबाट आए पनि विश्वमञ्चमा पुग्न सक्छ। यो अवसर मेरो व्यक्तिगत उपलब्धि मात्र होइन, विश्वस्तरमा सपना देख्ने प्रत्येक नेपाली सिर्जनशील व्यक्तिको सम्मान हो।”

कान्स कर्पोरेट मिडिया एण्ड टिभी अवार्डको निर्णायक मण्डलमा उनको चयनलाई नेपाली सिर्जनात्मक उद्योगको अन्तर्राष्ट्रिय स्वीकार्यता र बढ्दो प्रभावको महत्वपूर्ण संकेतका रूपमा लिइएको छ। विज्ञापन, फिल्म तथा सञ्चार क्षेत्रमा नेपाली प्रतिभाले विश्वमञ्चमा स्थान बनाउन थालेको यो अर्को महत्वपूर्ण उदाहरण बनेको छ।

Read More

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले सर्बदलीय बैठक बोलाएका छन् ।

रास्वपा महामन्त्री कविन्द्र बुर्लाकोटीका अनुसार समसामयिक राजनीतिका बिषयमा छलफल गर्न लामिछानेले सर्बदलीय बैठक बोलाएका हुन् । 

बैठक सोमबार बिहान ९ बजेदेखि संसद सचिवालय सिंहदरबारस्थित सार्वजनिक लेखा समितिको हलमा बस्ने बताइएको छ । बैठकमा प्रतिनिधिसभा र राष्ट्रिय सभामा प्रतिनिधित्व गर्ने राजनीतिक दलहरुबाट पार्टी अध्यक्ष तथा सभापतिसहित दुई जना सहभागी हुन आमन्त्रण गरिएको बुर्लाकोटीले जानकारी दिएका छन् । 

Read More

काठमाडौँ । तेक्वान्दो खेलाडी वैभवी सापकोटाले भारतीय खेलाडीलाई फाइनलमा हराउँदै क्योरुगी विधातर्फ स्वर्ण पदक जितेकी छिन् । प्रथम सिक्किम खुल्ला अन्तर्राष्ट्रिय तेक्वान्दो प्रतियोगिता २०२६ मा नेपालको लागि वैभवीले स्वर्ण र कास्य गरी दुई पदक जित्न सफल भएकी हुन् ।

भारतको सिक्किम राज्यको गान्तोकस्थित पाल्जोर रंगशालामा भएको उक्त  प्रतियोगितामा वैभवीले भारतीय खेलाडीविरुद्ध निकै प्रतिस्पर्धात्मक खेलमा शानदार जीत हासिल गरेकी हुन् । 

वैभवीले पुम्से विधातर्फ पनि तेस्रो हुँदै कास्य पदक जितेकी छिन् । १९ जना प्रतिष्पर्धी रहेको सो विधामा वैभवीले कास्य पदक जितेकी हुन् ।

सिक्किम एमेच्योर तेक्वान्दो एसोसिएसन (साटा) ले आयोजना गरेको उक्त प्रतियोगितामा ११ वर्षीया वैभवीले क्योरुगी र पुम्से दुई विधामा प्रतिष्पर्धा गरेकी थिइन् ।

जेठ २३ देखि शुरु भएको उक्त प्रतियोगितामा भारतका १० भन्दा बढी राज्यका खेलाडीलगायत विभिन्न देशका खेलाडीको सहभागिता रहको थियो ।

Read More

रसुवा । रसुवामा १९ लाख ५२ हजार १०० रुपैयाँ नगदसहित एक जनालाई प्रहरीले नियन्त्रणमा लिएको छ ।

जिल्ला प्रहरी कार्यालय रसुवाका अनुसार जेठ २३ गते गोसाइँकुण्ड गाउँपालिका–६ धुन्चे बजारस्थित अस्थायी प्रहरी पोस्ट धुन्चेबाट खटिएको प्रहरी टोलीले पासाङ ल्हामु राजमार्गमा सवारीसाधन तथा यात्रुको नियमित जाँच गर्ने क्रममा उक्त रकम बरामद गरेको हो ।

स्याफ्रुबेँसीबाट काठमाडौँतर्फ जाँदै गरेको ना १ ज ४८०७ नम्बरको भाडाको सुमो गाडीलाई रोकी जाँच गर्दा गाडीमा सवार गोसाइँकुण्ड गाउँपालिका–३ का ३५ वर्षीय मिङमार छिरिङ गुरुङले बोकेको झोलाभित्र ठूलो परिमाणमा नेपाली रुपैयाँ फेला परेको प्रहरीले जनाएको छ ।

बरामद रकममा एक हजार रुपैयाँ दरका एक हजार ८४५ थान नोट बराबर १८ लाख ४५ हजार रुपैयाँ, पाँच सय रुपैयाँ दरका २१३ थान नोट बराबर एक लाख ६ हजार ५०० रुपैयाँ तथा एक सय रुपैयाँ दरका ६ थान नोट बराबर ६०० रुपैयाँ रहेको छ। बरामद कुल रकम १९ लाख ५२ हजार १०० रुपैयाँ रहेको प्रहरीले जनाएको छ ।

रकमसहित गुरुङलाई नियन्त्रणमा लिई हुन्डी कारोबारसम्बन्धी कसुरमा अनुसन्धान अघि बढाइएको छ। यस सम्बन्धमा रसुवा जिल्ला अदालतबाट सात दिनको म्याद थप अनुमति प्राप्त गरी थप अनुसन्धान भइरहेको प्रहरीले जनाएको छ।

Read More

काठमाडौँ । सिरहा–धनुषा जोड्ने हुलाकी राजमार्गस्थित कमला पुलको निरीक्षणका क्रममा भौतिक पूर्वाधार तथा यातायात मन्त्री सुनिल लम्साल स्थानीयको विरोधको सामना गर्नुपरेको छ।

पुलको अवस्था बुझ्न पुगेका मन्त्री लम्सालविरुद्ध स्थानीय बासिन्दाले नाराबाजी गर्दै असन्तुष्टि जनाएका थिए। लामो समयदेखि पुल निर्माण र व्यवस्थापनमा देखिएको ढिलाइप्रति आक्रोशित स्थानीयले मन्त्रीलाई घेराबन्दीसमेत गरेका थिए।

स्थिति तनावपूर्ण बनेपछि मन्त्रीको टोली केही समय अवरोधमा परेको बताइएको छ।

Read More

काठमाडौँ । इरान र इजरायलबीच तनाव जारी रहेकै बेला इरानी राष्ट्रिय फुटबल टोलीका खेलाडीहरूले अमेरिका प्रवेशका लागि भिसा प्राप्त गरेका छन् । तर टोलीका केही सहयोगी कर्मचारी र अधिकारीहरूले भने अझै अमेरिकी भिसा नपाएको भन्दै इरानले अमेरिकामाथि विभेदपूर्ण व्यवहार गरेको आरोप लगाएको छ ।

इरानी सरकारी सञ्चारमाध्यमका अनुसार फुटबल महासंघका महासचिव हेदायत मोम्बेनी, उपाध्यक्ष मेहदी मोहम्मद नबीसहित १४ जना अधिकारी तथा सहयोगी कर्मचारी अझै भिसाको प्रतीक्षामा छन् ।

इरानी फुटबल महासंघले यस अवस्थाले टोलीलाई समान अवसर नदिएको दाबी गर्दै यो विषय अन्तर्राष्ट्रिय फुटबल महासंघ (फिफा) समक्ष उठाउने जनाएको छ ।

यता अमेरिकी अधिकारीहरूले भने सबै खेलाडी, प्रशिक्षक, प्रशिक्षण टोलीका सदस्य तथा केही सहयोगी कर्मचारीलाई भिसा जारी गरिएको बताएका छन् । तर केही आवेदनहरू भने स्वीकृत नभएको उनीहरूको भनाइ छ ।

इरानी टोली हाल टर्कीको अन्ताल्या क्षेत्रमा प्रशिक्षण गरिरहेको छ । त्यहाँबाट टोली मेक्सिको जाने तयारीमा रहेको बताइएको छ ।

फिफा विश्वकप २०२६ जुन ११ देखि जुलाई १९ सम्म अमेरिका, क्यानडा र मेक्सिकोमा आयोजना हुनेछ। पहिलो पटक तीन देशको संयुक्त आयोजनामा हुन लागेको प्रतियोगितामा ४८ टोली सहभागी हुनेछन् ।

इरान समुह जी मा बेल्जियम, इजिप्ट र न्यूजील्याण्डसँग रहेको छ । इरानले विश्वकपमा पहिलो खेल जुन १५ मा न्यूजील्याण्डसँग खेल्दैछ भने दोस्रो खेल जुन २१ मा बेल्जियमसँग र तेस्रो खेल इजिप्टसँग जुन २६ मा खेल्ने तालिका छन् ।

Read More

काठमाडौँ । परराष्ट्रमन्त्री शिशिर खनालले नेपाल–भारत सीमा विवाद समाधानका लागि बेलायतलाई मध्यस्थकर्ताका रूपमा अघि सारिएको भन्ने कुरा गलत व्याख्या भएको स्पष्ट पारेका छन्।

नयाँ दिल्लीमा पत्रकारहरूसँग कुरा गर्दै उनले नेपालले कुनै तेस्रो पक्षको मध्यस्थता नखोजेको र केवल ऐतिहासिक दस्तावेज तथा प्रमाणहरूमा पहुँचको विषय मात्र उठाइएको बताए।

प्रधानमन्त्री बालेन्द्र शाहले संसदमा दिएको अभिव्यक्तिलाई लिएर बाहिर विभिन्न चर्चा भएपछि मन्त्री खनालले स्पष्टिकरण दिँदै भने, “हामीलाई सीमा सम्बन्धी ऐतिहासिक प्रमाण आवश्यक छन्। ती दस्तावेज बेलायतका पुस्तकालय वा संग्रहालयमा हुन सक्छन् भन्ने आधारमा पहुँचबारे मात्र छलफल भएको हो, मध्यस्थता मागिएको होइन।”

उनका अनुसार नेपाल–भारत सीमा समस्या द्विपक्षीय संवाद र कूटनीतिक प्रक्रियामार्फत नै समाधान गर्नुपर्ने सरकारको स्पष्ट धारणा छ।

मन्त्री खनालले तेस्रो पक्षको संलग्नता होइन, आपसी समझदारी र कूटनीतिक पहल नै समाधानको सही बाटो हुनेमा सरकार दृढ रहेको पनि बताए।

Read More

काठमाडौँ । पूर्व गृहमन्त्री तथा राष्ट्रिय स्वतन्त्र पार्टी (रास्वपा) का सांसद सुधन गुरुङले आफ्नो सम्पत्तिबारे उठेका प्रश्नहरूको छानबिनबाट आफूले सफाइ पाउनेमा विश्वास व्यक्त गरेका छन्।

रास्वपा गोरखाको पहिलो जिल्ला अधिवेशनलाई सम्बोधन गर्दै उनले सार्वजनिक पदमा रहँदा उठेका प्रश्नहरूको जवाफ दिन आफू तयार रहेको र त्यसैअनुसार छानबिन समितिमा बयान दिएको बताए।

उनका अनुसार बयानका क्रममा केही प्रश्न कडा भए पनि आफूले सबैको स्पष्ट र सहज जवाफ दिएको बताए। गुरुङले छानबिन समितिले तयार पारेको प्रतिवेदन हाल प्रधानमन्त्री कार्यालयमा पुगेको उल्लेख गर्दै अन्ततः आफू निर्दोष ठहरिने विश्वास व्यक्त गरे।

कार्यक्रममा उनले रोचक शैलीमा एउटा प्रसंग पनि सुनाए। सम्पत्तिबारे प्रश्न गर्दा आफूले पनि प्रतिप्रश्न गर्दै समितिसँग हल्का ठट्टा गरेको बताए।

यदि भविष्यमा पुनः गृहमन्त्री बन्ने अवसर आएमा सुरुका दुई महिनासम्म भेटघाट र फोटो खिच्ने कार्यक्रम नगर्न उनले समर्थकहरूलाई आग्रहसमेत गरे।

सम्बोधनका क्रममा उनले पार्टी संगठन सुदृढ बनाउन जिल्ला नेतृत्व जिल्लामै सक्रिय हुनुपर्नेमा पनि जोड दिए। राजधानीमा बसेर जिल्ला नेतृत्व चलाउँदा जनतासँगको सम्बन्ध कमजोर हुने भन्दै उनले स्थानीयस्तरमै सक्रिय नेतृत्व आवश्यक रहेको धारणा राखे।

Read More

काठमाडौँ । पाकिस्तानका गृहमन्त्री मोहसिन नक्वी अमेरिकाको तर्फबाट थप वार्ताका लागि इरानको राजधानी तेहरान पुगेका छन् ।

इरानी अर्धसरकारी तस्निम समाचार संस्थाका अनुसार भ्रमणका क्रममा नक्वीले इरानका विदेशमन्त्री अब्बास अराघ्चीसँग भेटवार्ता गर्ने कार्यक्रम रहेको छ ।

यस्तै, इरानी विद्यार्थी समाचार संस्थाले पाकिस्तानका सेनाप्रमुख आसिम मुनिरले इरानका सर्वोच्च नेता आयातोल्लाह मोज्तबा खामेनेईलाई पठाएको पत्र नक्वीले साथमा ल्याएको जनाएको छ । गत मार्चमा सर्वोच्च नेताको जिम्मेवारी सम्हालेयता खामेनेई सार्वजनिक रूपमा निकै कम देखिएका छन् ।

अमेरिका–इरान युद्धपछि क्षेत्रीय तनाव बढिरहेका बेला पाकिस्तानले आफूलाई क्षेत्रीय मध्यस्थकर्ताको भूमिकामा प्रस्तुत गर्ने प्रयास गरिरहेको छ । यही सन्दर्भमा वार्ताको यो नयाँ चरण सुरु भएको बताइएको छ ।

Read More

काठमाडौँ । निर्माण सामग्रीको अभाव र मूल्यवृद्धिका कारण केही समय रोकिएको नागढुंगा–मुग्लिन सडकखण्ड विस्तारको काम पुनः सुरु भएको छ।

राजधानीको मुख्य लाइफलाइन मानिने यस सडकखण्डमा आवश्यक बिटुमिन आपूर्ति भएपछि काम फेरि अघि बढाइएको निर्माण कम्पनीले जनाएको छ। शर्मा एण्ड कम्पनीका निर्देशक सौरभ शर्माका अनुसार हाल १०२ टन बिटुमिन आइसकेको छ भने थप आपूर्ति पनि आउने क्रममा छ। सामग्री आपूर्ति सहज हुँदै गएपछि कामले अझ गति लिने उनले बताए।

पश्चिम एसियामा जारी द्वन्द्व र भारतबाट हुने आयातमा आएको अवरोधका कारण केही समय निर्माण कार्य प्रभावित भएको थियो। मूल्य समायोजनको विषयमा निर्माण व्यवसायीहरूले सम्बन्धित मन्त्रीसँग छलफल गरेपछि काम अघि बढाउने सहमति बनेको हो।

कुल ९५ किलोमिटर लामो नागढुंगा–मुग्लिन सडकलाई पूर्व र पश्चिम गरी विभिन्न खण्डमा विभाजन गरेर विस्तारको काम भइरहेको छ। पूर्वी खण्डको नागढुंगा–नौबिसे खण्डमा काम करिब ८५ प्रतिशत पूरा भइसकेको छ भने नौबिसे–मलेखु खण्ड करिब ६० प्रतिशत प्रगतिमा छ।

त्यस्तै पश्चिम खण्ड मलेखु–मुग्लिन क्षेत्रमा काम करिब ४४ प्रतिशत सम्पन्न भएको छ। केही पुल र संरचना निर्माण सम्पन्न भइसकेका छन् भने बाँकी काम तीव्र गतिमा अघि बढाइएको छ।

सडक विस्तार पूरा भएपछि यो मार्ग अझ सुरक्षित र सहज यात्रा योग्य हुने अपेक्षा गरिएको छ।

Read More