काठमाडौं । आकर्षक तलबसहित वैदेशिक रोजगारीमा पठाइदिने भन्दै रकम असुलेर सम्पर्कविहीन भएको आरोपमा प्रहरीले काठमाडौं उपत्यकाबाट सात जनालाई पक्राउ गरेको छ।

प्रहरीका अनुसार विभिन्न देशमा रोजगारीको अवसर दिलाइदिने भन्दै सर्वसाधारणबाट रकम लिई ठगी गरेको उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको टोलीले उनीहरूलाई पक्राउ गरेको हो।

पक्राउ पर्नेमा काठमाडौं महानगरपालिका–२६ का झापा निवासी ४८ वर्षीय टिका कार्की, काठमाडौं–१६ की सुनसरी निवासी ४६ वर्षीया सरिता बान्तवा राई, टोखा नगरपालिका–६ का नुवाकोट निवासी २५ वर्षीय अग्रिम विक्रम तिमोथी, काठमाडौं–१५ का धादिङ निवासी ४९ वर्षीय चन्द्र गौतम, काठमाडौं–२६ का मोरङ निवासी ४४ वर्षीय धनप्रसाद काफ्ले, काठमाडौं–११ की रूपन्देही निवासी ४० वर्षीया रूपा सुनार र भक्तपुर मध्यपुर थिमी–४ का जुम्ला निवासी २९ वर्षीय रमेश स्वाँर रहेका छन्।

प्रहरीका अनुसार पक्राउ परेकामध्ये केहीले विभिन्न देश पठाइदिने भन्दै पीडितबाट लाखौं रुपैयाँसम्म रकम लिएका थिए। उनीहरूले रकम लिएपछि सम्पर्कविहीन भएपछि पीडितहरूले प्रहरीमा उजुरी दिएका थिए।

अनुसन्धानका क्रममा टिका कार्कीले साइप्रस पठाइदिने भन्दै एक जनाबाट ५० हजार रुपैयाँ, सरिता बान्तवा राईले अस्ट्रेलिया पठाउने भन्दै एक जनाबाट ३० लाख रुपैयाँ र अग्रिम विक्रम तिमोथीले दक्षिण अफ्रिका पठाउने भन्दै एक जनाबाट ६ लाख ८५ हजार रुपैयाँ लिएको खुलेको प्रहरीले जनाएको छ।

त्यस्तै, चन्द्र गौतमले ग्रीस पठाउने भन्दै तीन जनाबाट ७ लाख ९४ हजार रुपैयाँ, धनप्रसाद काफ्लेले यूएई पठाउने भन्दै एक जनाबाट ८० हजार रुपैयाँ, रूपा सुनारले पोर्चुगल पठाउने भन्दै तीन जनाबाट २१ लाख रुपैयाँ र रमेश स्वाँरले बेलायत पठाउने भन्दै एक जनाबाट ६ लाख रुपैयाँ लिएको प्रारम्भिक अनुसन्धानबाट देखिएको छ।

प्रहरीले उजुरीका आधारमा उनीहरूलाई विभिन्न स्थानबाट नियन्त्रणमा लिएको जनाएको छ। पक्राउ परेका व्यक्तिहरूलाई आवश्यक अनुसन्धान र कानुनी कारबाहीका लागि वैदेशिक रोजगार विभाग पठाइएको छ।

प्रहरीले वैदेशिक रोजगारीका नाममा हुने ठगीबाट बच्न अनुमतिप्राप्त म्यानपावर संस्था तथा आधिकारिक प्रक्रियामार्फत मात्र वैदेशिक रोजगारीसम्बन्धी काम गर्न आग्रह गरेको छ।

Read More

काठमाडौं । सिरियाको राजधानी दमास्कसमा फ्रान्सका राष्ट्रपति इम्यानुएल म्याक्रोनको भ्रमणका क्रममा भएका दुई छुट्टाछुट्टै विस्फोटमा कम्तीमा १८ जना घाइते भएका छन्। सिरियाको गृह मन्त्रालयका अनुसार घाइते हुनेमा चार जना प्रहरीसमेत रहेका छन्।

सरकारी समाचार संस्था **सिरिया अरब न्यूज एजेन्सी (साना)**का अनुसार विस्फोट दमास्कसको पर्यटन मन्त्रालय नजिक र म्याक्रोन बस्ने व्यवस्था गरिएको होटल आसपास भएको हो। घटनाका क्रममा शहरमाथि धुवाँको मुस्लो देखिएको र एउटा सवारीसाधनमा आगलागी भएको दृश्य सार्वजनिक भएको जनाइएको छ।

म्याक्रोन सिरियाली राष्ट्रपति अहमद अल–शरासँग भेटवार्ताका लागि दमास्कस पुगेका थिए। फ्रान्सेली राष्ट्रपतिको कार्यालयले भेटका लागि जाने क्रममा विस्फोटको आवाज नसुनेको र भ्रमण पूर्वनिर्धारित तालिकाअनुसार नै अघि बढेको जनाएको छ।

सिरियाली गृह मन्त्रालयले विस्फोट राष्ट्रपतिको सुरक्षाका लागि तोकिएको घेराभन्दा बाहिर भएको जनाएको छ। मन्त्रालयका अनुसार घटनाले म्याक्रोनको सुरक्षा व्यवस्था वा औपचारिक कार्यक्रमलाई प्रत्यक्ष असर नपारेको र भ्रमण नियमित रूपमा सञ्चालन भइरहेको छ।

घटनापछि सुरक्षा निकायले प्रभावित क्षेत्रका सडक बन्द गरी अनुसन्धान सुरु गरेका छन्। प्रारम्भिक अनुसन्धानमा दुवै विस्फोट घरेलु रूपमा तयार गरिएका विस्फोटक उपकरण (आईईडी) प्रयोग गरेर गराइएको हुन सक्ने देखिएको छ।

सुरक्षा अधिकारीहरूका अनुसार एउटा विस्फोटक उपकरण सडक किनारमा पार्क गरिएको गाडीमा र अर्को फोहोर फाल्ने कन्टेनरमा राखिएको थियो। गृह मन्त्रालयले घटनाको वास्तविक कारण र संलग्न व्यक्तिहरूको पहिचानका लागि अनुसन्धान जारी रहेको जनाएको छ।

एक सुरक्षा अधिकारीले सर्वसाधारणको आवतजावत हुने क्षेत्रमा विस्फोट भएको भन्दै यसलाई आपराधिक गतिविधि भएको बताएका छन्। दमास्कसका सुरक्षा विश्लेषक इस्मत अल–अब्सीले घटनाको मुख्य उद्देश्य तत्काल स्पष्ट नभए पनि अस्थिरता सिर्जना गर्ने प्रयास हुन सक्ने बताएका छन्।

उनका अनुसार फ्रान्सेली राष्ट्रपतिको टोलीलाई लक्षित गरिएको थियो वा थिएन भन्ने विषयमा यकिन भइसकेको छैन। तर घटनाले सुरक्षा व्यवस्थामा सुधारको आवश्यकता देखाएको उनले बताएका छन्।

यसअघि गत साता पनि दमास्कसको मध्य क्षेत्रमा रहेको एक क्याफेमा भएको विस्फोटमा कम्तीमा नौ जनाको मृत्यु भएको र २० जना घाइते भएको सिरियाको स्वास्थ्य मन्त्रालयले जनाएको थियो।

Read More

काठमाडौं । अमेरिकी प्रशान्त क्षेत्रका केही भूभागमा आएको शक्तिशाली आँधी (सुपर टाइफुन) बावीका कारण गुआम र उत्तरी मारियानासका हजारौं मानिस प्रभावित भएका छन्। आँधीका कारण ठूलो मात्रामा विद्युत् सेवा अवरुद्ध भए पनि हालसम्म मानवीय क्षतिको विवरण सार्वजनिक नभएको अधिकारीहरूले जनाएका छन्।

आँधीबाट सबैभन्दा बढी प्रभावित क्षेत्र उत्तरी मारियानासको रोटा टापु बनेको छ। त्यहाँ सोमबार प्रतिघण्टा २९० किलोमिटरसम्मको वेगमा हावा चलेपछि रूख तथा विद्युत् पोलहरू ढलेका छन्। यसले विद्युत् लाइनमा क्षति पुर्‍याउनुका साथै खानेपानी आपूर्तिसमेत प्रभावित भएको जनाइएको छ।

सुपर टाइफुन बावीका कारण केही क्षेत्रमा घरहरूमा क्षति पुगेको र छाना उडाएको विवरण आएको छ। प्रभावित क्षेत्रका बासिन्दाले विद्युत्, पानी र मोबाइल नेटवर्कजस्ता अत्यावश्यक सेवामा अवरोध हुँदा दैनिक जीवन कठिन बनेको बताएका छन्।

उत्तरी मारियानासका प्रमुख टापुहरू साइपान र टिनियन तथा नजिकैको गुआमका केही भागमा समेत विद्युत् सेवा प्रभावित भएको छ। यी क्षेत्रहरू अमेरिकाका महत्वपूर्ण सैन्य संरचना रहेका भूभागका रूपमा चिनिन्छन्।

स्थानीय प्रशासनले क्षतिको विवरण संकलन र आवश्यक सेवा पुनःस्थापनाका लागि काम गरिरहेको जनाएको छ। हालसम्म आँधीका कारण कुनै मानवीय क्षतिको पुष्टि नभएको बताइएको छ।

Read More

काठमाडौं । धादिङ प्रहरीले पृथ्वी राजमार्गबाट ठूलो परिमाणमा लागुऔषध बरामद गरेको छ। बेनीघाट रोराङ गाउँपालिका–९ जोगीमारास्थित सडकखण्डमा गरिएको चेकजाँचका क्रममा प्रहरीले ट्रामाडोल हाइड्रोक्लोराइड क्याप्सुलसहित दुई जनालाई पक्राउ गरेको हो।

जिल्ला प्रहरी कार्यालय धादिङका अनुसार विशेष सूचनाका आधारमा प्रहरी चौकी जोगीमाराबाट खटिएको टोलीले वीरगञ्जबाट बनेपातर्फ जाँदै गरेको बागमती प्रदेश ०३–००१ ख २६८९ नम्बरको यात्रुबाहक बस रोकेर जाँच गरेको थियो।

प्रहरीका अनुसार बसमा यात्रा गरिरहेका पर्साको वीरगञ्ज महानगरपालिका–३ का ४१ वर्षीय मोहनप्रसाद कुर्मी र सोही स्थानकी ३५ वर्षीया प्रतिमा देवीको साथमा रहेको सुटकेसबाट ७ हजार ८४० वटा ट्रामाडोल हाइड्रोक्लोराइड क्याप्सुल फेला परेको हो।

लागुऔषधसहित पक्राउ परेका दुवै जनालाई नियन्त्रणमा लिएर घटनाबारे थप अनुसन्धान भइरहेको जिल्ला प्रहरी कार्यालय धादिङले जनाएको छ।

पृथ्वी राजमार्ग हुँदै हुने लागुऔषध ओसारपसार नियन्त्रणका लागि प्रहरीले नियमित रूपमा सवारीसाधन जाँच गर्दै आएको छ। सोही क्रममा प्राप्त विशेष सूचनाका आधारमा गरिएको कारबाहीमा उक्त परिमाणको लागुऔषध बरामद भएको प्रहरीले जनाएको छ।

Read More

काठमाडौं । साताको दोस्रो कारोबार दिन मंगलबार नेपाली सेयर बजारमा सकारात्मक सुधार देखिएको छ। नेपाल स्टक एक्सचेन्ज (नेप्से) परिसूचक २४.५७ अंकले बढ्दै २ हजार ६५१.६८ विन्दुमा पुगेर कारोबार बन्द भएको हो।

यसअघि सोमबार नेप्से परिसूचक २६.२९ अंकले घटेर २ हजार ६२७.११ विन्दुमा झरेको थियो। मंगलबार बजार परिसूचकसँगै कारोबार रकममा समेत वृद्धि भएको छ।

मंगलबार कुल ३५२ वटा कम्पनीका स्क्रिप्स कारोबारमा आएका थिए। ती कम्पनीका ९५ लाख १९ हजार ४५२ कित्ता सेयर किनबेच हुँदा कुल ४ अर्ब ४० करोड ७ लाख ५२ हजार ५४२ रुपैयाँ बराबरको कारोबार भएको छ।

कारोबार भएका कम्पनीमध्ये अधिकांशको सेयर मूल्य बढेको छ। मंगलबार २१० वटा स्टकको मूल्य वृद्धि हुँदा ५७ वटा स्टकको मूल्य घटेको छ भने १० वटा कम्पनीको मूल्य स्थिर रहेको छ।

बजारका १३ वटै उपसमूह सकारात्मक देखिएका छन्। विशेषगरी बैंकिङ, विकास बैंक र ट्रेडिङ समूहका उपसूचकमा उल्लेख्य सुधार आएको छ।

मंगलबारको कारोबारमा खालंगा हाइड्रो पावरको सेयर मूल्य सबैभन्दा धेरै १४.९९ प्रतिशतले बढेको छ। त्यस्तै आरबीबीएस फोकस ४० को मूल्य १३.८५ प्रतिशत र सानिगाढ हाइड्रोको मूल्य १०.५७ प्रतिशतले वृद्धि भएको छ।

कारोबार रकमका आधारमा १० प्रतिशत केबीएल डिबेन्चर २०९० शीर्ष स्थानमा रहेको छ। उक्त कम्पनीको कारोबार रकम २० अर्ब रुपैयाँभन्दा बढी पुगेको जनाइएको छ।

सेयर बजारमा पछिल्ला कारोबार दिनमा देखिएको उतारचढावबीच मंगलबार लगानीकर्ताको सक्रियता बढ्दा नेप्से परिसूचक र कारोबार रकम दुवैमा सुधार देखिएको हो।

Read More

काठमाडौं । पूर्वाधार विकासमन्त्री सुनिल लम्सालले कर्णाली प्रदेशका सबै स्थानीय तहका केन्द्र र जिल्ला सदरमुकाम जोड्ने सडकलाई आगामी तीन वर्षभित्र डबल लेनमा स्तरोन्नति गरिने बताएका छन्।

राष्ट्रियसभा बैठकमा सांसदहरूले उठाएका प्रश्नको जवाफ दिँदै मन्त्री लम्सालले सडक पूर्वाधार सुधारका लागि सरकारले प्राथमिकताका साथ काम अघि बढाएको जानकारी दिए। उनले चालु आर्थिक वर्षमै विस्तृत परियोजना प्रतिवेदन (डीपीआर) तयार गरी निर्माण प्रक्रिया सुरु गरिने बताए।

मन्त्री लम्सालका अनुसार कर्णाली प्रदेशका सबै जिल्ला सदरमुकाम जोड्ने सडक र पालिका केन्द्रसम्म पुग्ने सडकका लागि यसै वर्ष ठेक्का प्रक्रिया अघि बढाइनेछ। हालसम्म सडक सञ्जाल नपुगेका वा कच्ची अवस्थामा रहेका स्थानीय तहका केन्द्रसम्मका सडकलाई समेत क्रमशः सुधार गरिने उनले बताए।

उनले सडकको कमजोर अवस्थाका कारण हुने दुर्घटना र जनधनको क्षति न्यूनीकरण गर्न सरकारले दीर्घकालीन योजना बनाएर पूर्वाधार विस्तारलाई अघि बढाएको उल्लेख गरे।

कर्णाली प्रदेशमा भौगोलिक कठिनाइका कारण सडक पूर्वाधार विकास चुनौतीपूर्ण रहँदै आएको छ। सरकारले स्थानीय तहका केन्द्र र जिल्ला सदरमुकामलाई भरपर्दो सडक सञ्जालमार्फत जोड्ने लक्ष्यसहित स्तरोन्नतिको योजना अघि सारेको जनाएको छ।

Read More

काठमाडौं । नेपालको सबैभन्दा ठूलो बहुपक्षीय विकास साझेदारका रूपमा रहेको “एसियाली विकास बैंक (एडिबी)” ले नेपालमा आफ्नो वित्तीय सहयोग विस्तार गर्ने जनाएको छ। एडिबीले सन् २०२९ सम्म नेपालका लागि उपलब्ध गराउने सहयोग रकम २.४ अर्ब अमेरिकी डलर पुग्ने अपेक्षा गरेको हो।

नेपाल भ्रमणमा रहेका एडिबीका अध्यक्ष मासातो कान्डाले नेपालका विकास प्राथमिकतालाई केन्द्रमा राख्दै बैंकले आफ्नो साझेदारी थप विस्तार गरिरहेको बताए। उनले नेपालको आर्थिक विकास, रोजगारी सिर्जना र दिगो पूर्वाधार निर्माणमा एडिबीको सहयोग निरन्तर रहने उल्लेख गरे।

नेपालका लागि एडिबीको देशीय साझेदारी रणनीति २०२५–२०२९ अन्तर्गत उक्त सहयोग परिचालन गरिनेछ। रणनीतिले रोजगारी विस्तार, निजी क्षेत्रको विकास, सार्वजनिक सेवा सुधार, दिगो पूर्वाधार, डिजिटल रूपान्तरण तथा महिला, पिछडिएका र जोखिममा रहेका समुदायको सशक्तीकरणलाई प्राथमिकतामा राखेको छ।

एडिबीले सह–वित्तीय व्यवस्था, हरित वित्त तथा स्थानीय मुद्रामा जारी गरिने बन्डजस्ता नयाँ वित्तीय उपकरणमार्फत थप स्रोत परिचालन गर्ने योजना समेत अघि सारेको छ।

अध्यक्ष कान्डाको नेपाल भ्रमणका क्रममा एडिबीले वार्षिक प्रतिबद्धताको हिस्साका रूपमा नेपालसँग कुल १६५ मिलियन अमेरिकी डलर बराबरका दुईवटा ऋण सम्झौता गरेको जनाएको छ।

पहिलो सम्झौताअन्तर्गत ११५ मिलियन अमेरिकी डलर बराबरको सहयोग खानेपानी तथा सरसफाइ क्षेत्रमा परिचालन गरिनेछ। यसबाट ८ लाख ५० हजारभन्दा बढी नागरिकलाई सुरक्षित र भरपर्दो खानेपानी तथा सरसफाइ सेवा उपलब्ध गराउने लक्ष्य राखिएको छ।

त्यस्तै, ५० मिलियन अमेरिकी डलर बराबरको नीतिगत ऋणमार्फत नेपालको सीमा नाकामा वस्तु आवागमन प्रणालीलाई आधुनिक बनाउने योजना रहेको छ। यसले व्यापार प्रक्रियालाई सहज बनाउने, व्यवसाय सञ्चालन लागत घटाउने तथा डिजिटल प्रणालीमार्फत प्रतिस्पर्धात्मक क्षमता बढाउन सहयोग पुग्ने अपेक्षा गरिएको छ।

एडिबी सहयोगसम्बन्धी मुख्य तथ्य

• सन् २०२९ सम्म नेपालका लागि प्रस्तावित सहयोग: २.४ अर्ब अमेरिकी डलर
• भ्रमणका क्रममा भएको नयाँ ऋण सम्झौता: १६५ मिलियन अमेरिकी डलर
• खानेपानी तथा सरसफाइ परियोजना: ११५ मिलियन अमेरिकी डलर
• सीमा नाका आधुनिकीकरणका लागि नीतिगत ऋण: ५० मिलियन अमेरिकी डलर
• चालु वर्षको अनुमानित वार्षिक ऋण सहयोग: ६६० मिलियन अमेरिकी डलर

एडिबी अध्यक्ष कान्डाले प्रधानमन्त्री बालेन्द्र शाहसँग पनि भेटवार्ता गरेका थिए। भेटमा नेपाल–एडिबी साझेदारीको ६० वर्ष पूरा भएको अवसरमा नेपालको आर्थिक रूपान्तरण, रोजगारी सिर्जना र लगानी प्रवर्द्धनका क्षेत्रमा सहकार्य थप मजबुत बनाउने विषयमा छलफल भएको जनाइएको छ।

एसियाली विकास बैंक एसिया तथा प्रशान्त क्षेत्रमा दिगो, समावेशी र उत्थानशील आर्थिक विकासलाई सहयोग गर्ने प्रमुख बहुपक्षीय विकास संस्था हो। सन् १९६६ मा स्थापना भएको एडिबीमा हाल ६९ सदस्य राष्ट्र रहेका छन्, जसमध्ये ५० राष्ट्र एसिया तथा प्रशान्त क्षेत्रका छन्।

Read More

काठमाडौं । पाकिस्तानको अशान्त दक्षिणपश्चिमी क्षेत्र बलुचिस्तानमा भएको सशस्त्र आक्रमणमा कम्तीमा नौ जना प्रहरी अधिकारीको मृत्यु भएको छ। मङ्गी बाँध निर्माण परियोजनाको सुरक्षामा खटिएको प्रहरी चौकीलाई लक्षित गरी बन्दुकधारी समूहले आक्रमण गरेको अधिकारीहरूले जनाएका छन्।

बलुचिस्तानका वरिष्ठ अधिकारी अब्दुल कुदोसका अनुसार बाँध परियोजनाको सुरक्षाका लागि तैनाथ प्रहरीमाथि आक्रमण हुँदा नौ जनाको मृत्यु भएको हो। घटनापछि केही प्रहरी अधिकारी सम्पर्कविहीन रहेकाले उनीहरूको खोजी कार्य जारी रहेको उनले जानकारी दिए।

प्रदेश सरकारका प्रवक्ता शाहिद रिन्दले पनि आक्रमणमा नौ प्रहरीको मृत्यु भएको पुष्टि गरेका छन्। उनका अनुसार मृतकमध्ये विभिन्न प्रहरी इकाइका वरिष्ठ अधिकारीसमेत रहेका छन्। प्रारम्भिक अनुसन्धानमा घटनामा इस्लामवादी उग्रवादी समूहको संलग्नता हुन सक्ने आशंका गरिएको उनले बताए।

आक्रमणपछि सुरक्षाकर्मीहरूले संयुक्त रूपमा खोज तथा सुरक्षा अभियान सुरु गरेका छन्। प्रहरी, अर्धसैनिक बल र आतंकवाद नियन्त्रणमा संलग्न निकायले आक्रमणकारीको खोजी गरिरहेको जनाइएको छ।

खनिज स्रोतका हिसाबले महत्वपूर्ण मानिने बलुचिस्तानमा पाकिस्तान सरकारले लामो समयदेखि पृथकतावादी समूह र सशस्त्र संगठनहरूको गतिविधि सामना गर्दै आएको छ। अफगानिस्तान र इरानसँग सीमा जोडिएको यस क्षेत्रमा सुरक्षा निकाय, सरकारी संरचना तथा पूर्वाधार आयोजनाहरू बारम्बार निशानामा पर्दै आएका छन्।

पाकिस्तानले सीमावर्ती क्षेत्रमा सक्रिय उग्रवादी समूहहरूलाई अफगानिस्तानबाट सहयोग प्राप्त भइरहेको आरोप लगाउँदै आएको छ। यद्यपि अफगान अधिकारीहरूले त्यस्ता आरोप अस्वीकार गर्दै आएका छन्।

पछिल्ला महिनाहरूमा पाकिस्तानले अफगान सीमावर्ती क्षेत्रमा उग्रवादी लक्षित भन्दै हवाई कारबाहीसमेत गरेको छ। पाकिस्तानले ती अभियानलाई सुरक्षा कारबाहीका रूपमा व्याख्या गरे पनि तालिबान प्रशासन र संयुक्त राष्ट्रसङ्घले केही घटनामा सर्वसाधारणको समेत मृत्यु भएको दाबी गरेका छन्।

Read More

काठमाडौं । नवलपरासीमा विद्युतीय भ्यान (ईभी) र ट्रक आपसमा ठोक्किँदा १० जना घाइते भएका छन्। मंगलबार बर्दघाट नगरपालिका–४ स्थित तारेभिर क्षेत्रमा भएको दुर्घटनामा भ्यानमा सवार यात्रु तथा चालकसहित १० जना घाइते भएको प्रहरीले जनाएको छ।

प्रहरीका अनुसार बुटवलबाट काठमाडौं जाँदै गरेको बाप्र ०८–००१ ज ००९४ नम्बरको ईभी भ्यान र विपरीत दिशाबाट आउँदै गरेको ना.६ ख ३४६० नम्बरको ट्रक एकआपसमा ठोक्किएका थिए।

दुर्घटनामा काठमाडौं कपनका ३३ वर्षीय बद्री मगर, स्वयम्भूका २५ वर्षीय नेत्रलाल नेवा, भारतीय नागरिक ६५ वर्षीय जगदीश बिएल, चितवन कालिका नगरपालिका–३ पदमपुरकी ६५ वर्षीया यनु मगर, रुपन्देही बुटवलका ४० वर्षीय रूप गुरुङ घाइते भएका छन्।

यस्तै, ईभी भ्यानका सहचालक ३५ वर्षीय गोविन्द थापा, चालक रुपन्देही बुटवल–१२ ढवाहका ४४ वर्षीय कृष्ण थापा, गुल्मी इस्मा गाउँपालिका–६ का २१ वर्षीय किरण मुखिया, भारतीय नागरिक ६१ वर्षीय नन्जुण्डे गोडा र रुपन्देही बुटवल–१७ का २८ वर्षीय प्रकाश भट्टराई पनि दुर्घटनामा घाइते भएको प्रहरीले जनाएको छ।

घाइतेमध्ये चार जनालाई थप उपचारका लागि देवदह मेडिकल कलेज, भलुही पठाइएको छ। अन्य घाइतेहरूको अवस्था सामान्य रहेको प्रहरीले जानकारी दिएको छ।

दुर्घटनापछि प्रहरीले ट्रक चालक ३५ वर्षीय बुद्धिबहादुर ठोकरलाई नियन्त्रणमा लिएर घटनाबारे थप अनुसन्धान गरिरहेको जनाएको छ।

Read More

काठमाडौं । राष्ट्रियसभाको बैठकमा सांसदहरूले जनजीवनसँग प्रत्यक्ष जोडिएका विभिन्न विषय उठाउँदै सरकारको ध्यानाकर्षण गराएका छन्। शून्य समयमा बोल्ने क्रममा सांसदहरूले वन्यजन्तु आक्रमणबाट भएको जनधनको क्षति, शान्ति सुरक्षा, चुरे दोहन, खानेपानी संकट, शिक्षा क्षेत्रको अवस्था, विद्युत् सेवा र सुशासनलगायत विषयमा सरकारको ध्यानाकर्षण गराएका हुन्।

बैठकमा सांसद गीता देवकोटाले चितवनको भरतपुर महानगरपालिका–२३ मा असार २० गते जंगली हात्तीको आक्रमणबाट आमाछोराको मृत्यु भएको घटनाप्रति सरकार गम्भीर बन्नुपर्ने बताइन्। उनले पीडित परिवारलाई आवश्यक राहत तथा क्षतिपूर्ति उपलब्ध गराउन र मानव–वन्यजन्तु द्वन्द्व न्यूनीकरणका लागि प्रभावकारी योजना बनाउन सरकारसँग आग्रह गरिन्।

सांसद धर्मेन्द्र पासवानले तराई–मधेस क्षेत्रमा पछिल्लो समय असुरक्षाको अवस्था बढ्दै गएको भन्दै नागरिकको सुरक्षाका लागि सरकारलाई थप प्रभावकारी कदम चाल्न आग्रह गरे। उनले आपराधिक गतिविधिमा संलग्न व्यक्तिहरूलाई कानुनी दायरामा ल्याउनुपर्ने आवश्यकता औँल्याए।

त्यस्तै, सांसद महन्थ ठाकुरले चुरे क्षेत्रको विनाशका कारण मधेसमा भूमिगत पानीको स्रोत घट्दै गएको र खानेपानीको समस्या बढेको विषय उठाए। उनले चुरे संरक्षण र पानीका स्रोत पुनःस्थापनाका लागि तत्काल पहल गर्न सरकारको ध्यानाकर्षण गराए।

सांसद मीनासिंह रखालले कर्णाली नदीमा यात्रुवाहक बस खसेको घटनाबारे सरकारको ध्यानाकर्षण गराउँदै दुर्घटनामा परेका यात्रुहरूको खोजी तथा उद्धार कार्य प्रभावकारी बनाउन आग्रह गरिन्।

यसैगरी सांसद रामकुमारी झाँक्रीले सुशासन कायम गर्ने क्रममा कर्मचारीतन्त्रमा अन्योल देखिएको बताउँदै त्यसको समाधानका लागि स्पष्ट नीति आवश्यक रहेको धारणा राखिन्। उनले पछिल्लो समय कर्मचारीहरूमा देखिएको असन्तुष्टिप्रति सरकारको ध्यान जानुपर्ने बताइन्।

सांसद रेखाकुमारी झाले शिक्षा क्षेत्र सुधार गर्ने सरकारी प्रतिबद्धता व्यवहारमा प्रभावकारी रूपमा कार्यान्वयन हुन नसकेको भन्दै विद्यार्थी र अभिभावक समस्यामा परेको बताइन्। उनले शिक्षा प्रणालीलाई व्यवस्थित र गुणस्तरीय बनाउन सरकारलाई आग्रह गरिन्।

विद्युत् सेवाको विषय उठाउँदै सांसद रोशनी मेचेले देश लोडसेडिङमुक्त घोषणा भए पनि कतिपय उपभोक्ताले अझै सहज रूपमा विद्युत् सेवा पाउन नसकेको बताइन्। उनले विद्युत् आपूर्तिमा देखिएका समस्या समाधान गर्न सम्बन्धित निकायको ध्यान जानुपर्ने बताइन्।

सांसद वासुदेव घिमिरेले माइतीघर मण्डलामा अधिकारका लागि आन्दोलनरत दृष्टिविहीन समुदायका माग सम्बोधन गर्न सरकारसँग आग्रह गरे। उनले उनीहरूका मागलाई गम्भीर रूपमा लिएर समाधानतर्फ अघि बढ्नुपर्ने बताए।

यसैगरी सांसद सम्झना देवकोटाले मन्त्रिपरिषद्ले गरेको शिक्षा ऐन संशोधनसम्बन्धी निर्णयप्रति प्रश्न उठाउँदै संशोधित व्यवस्थाले संवैधानिक अधिकार प्रभावित हुन सक्ने बताइन्। उनले ऐन संशोधनका विषयमा पुनर्विचार गर्न सरकारको ध्यानाकर्षण गराइन्।

सांसद सोमनाथ पोर्तेलले होल्डिङ सेन्टरमा रहेका सुकुमवासीहरूको समस्या समाधान गर्न सरकारसँग पहल गर्न माग गरे।

राष्ट्रियसभामा उठाइएका यी विषयहरूले नागरिकको दैनिक जीवन, सामाजिक सुरक्षा, वातावरण संरक्षण र सार्वजनिक सेवासँग जोडिएका चुनौतीहरूलाई पुनः बहसमा ल्याएको छ।

Read More