काठमाडौँ । एलन मस्कको अन्तरिक्ष प्रविधि कम्पनी स्पेस एक्सले विश्वकै ठूलोमध्ये एक मानिने आईपीओ ल्याउने तयारी गरेको छ। कम्पनीले आगामी जुन १२ मा सेयर बजारमा प्रवेश गर्दै ८० अर्ब अमेरिकी डलरभन्दा बढी रकम उठाउने लक्ष्य राखेको अन्तर्राष्ट्रिय सञ्चारमाध्यमहरूले जनाएका छन्।
हाल निजी कम्पनीका रूपमा सञ्चालन भइरहेको स्पेसएक्सले रकेट प्रक्षेपण, मानव अन्तरिक्ष यात्रा र ‘स्टारलिंक’ इन्टरनेट सेवामार्फत विश्वभर ठूलो प्रभाव बनाइसकेको छ। पछिल्ला वर्षहरूमा कम्पनीको मूल्यांकन तीव्र रूपमा बढ्दै गएको छ।
आईपीओ सार्वजनिक भएमा लगानीकर्ताले कम्पनीको वित्तीय अवस्था, आम्दानी, ऋण, नाफा-नोक्सान तथा भविष्यका योजनाबारे विस्तृत विवरण हेर्न पाउनेछन्। विशेषगरी स्पेसएक्सको ‘स्टारलिंक’ सेवा र मस्कले सुरु गरेको एआई कम्पनी एक्स एआई प्रति लगानीकर्ताको चासो बढेको बताइएको छ।
स्पेसएक्स आईपीओको खबर बाहिरिएसँगै अन्तरिक्ष प्रविधिसम्बन्धी कम्पनीहरूको सेयर बजारमा पनि उछाल आएको छ। अमेरिकी कम्पनी रकेट ल्याबको सेयर मूल्य मात्रै ८ प्रतिशतभन्दा बढीले बढेको अन्तर्राष्ट्रिय रिपोर्टमा उल्लेख छ।
विश्लेषकहरूका अनुसार स्पेसएक्सको बजार प्रवेशले केही वर्षदेखि सुस्त रहेको प्रविधि कम्पनीहरूको आईपीओ बजारलाई फेरि चलायमान बनाउन सक्छ। हालसम्म कम्पनीले भने आईपीओबारे औपचारिक प्रतिक्रिया दिएको छैन।
