काठमाडौँ । अर्थमन्त्री डा. स्वर्णिम वाग्लेले नेपालमा लगानी गरिरहेका बहुराष्ट्रिय कम्पनीका सञ्चालक तथा प्रतिनिधिसँग आज छलफल गर्ने भएका छन् ।
आर्थिक वर्ष २०८३/८४ को बजेट कार्यान्वयनसम्बन्धी छलफल शृङ्खाअन्तर्गत नेपालमा लगानी गरेका २० ठूला करदाता बहुराष्ट्रिय कम्पनीसँग अर्थमन्त्री वाग्लेले छलफल गर्न लागेका हुन् । छलफलका लागि कम्पनीका उच्चपदस्थ विदेशी अधिकारी तथा नेपाली साझेदारलाई मन्त्रालयमा बोलाइएको छ ।
अर्थ मन्त्रालयको सुवर्ण हलमा दिउँसो १२ बजे सुरु हुने छलफलमा बहुराष्ट्रिय कम्पनीले बजेटमार्फत प्राप्त गरेका सुविधा, नेपालमा व्यवसाय सञ्चालनका क्रममा देखिएका समस्या तथा लगानी विस्तारका विषयमा छलफल हुने जनाइएको छ ।
त्यसक्रममा अर्थमन्त्री वाग्लेले नेपालमा थप लगानी आकर्षित गर्न, रोजगारीका अवसर बढाउन तथा कम्पनीले आर्जन गरेको प्रतिफल फिर्ता लैजाने प्रक्रियामा सरकारले गर्नुपर्ने सहजीकरणबारे कम्पनीका प्रतिनिधिलाई आफ्ना धारणा खुलस्त राख्न आग्रह गर्नेछन् । साथै, समस्या तथा सुझाव लिखित रूपमा समेत उपलब्ध गराउन भनिनेछ ।
बजेट कार्यान्वयनसम्बन्धी छलफलको यही शृङ्खलामा यसअघि अर्थमन्त्री वाग्लेले उत्पादनमूलक क्षेत्रमा लगानी गरी ठूलो रोजगारी सिर्जना गरेका तथा अर्थतन्त्रमा महत्वपूर्ण योगदान पुर्याएका ३३ औद्योगिक घरानाका प्रतिनिधिसँग छलफल गरिसकेका छन् ।
यसैगरी, उनले नेपालका ‘क’ वर्गका वाणिज्य बैंकका प्रमुख कार्यकारी अधिकृत तथा नेपाल राष्ट्र बैंकका कार्यकारी निर्देशकसँग समेत बजेट कार्यान्वयनका विषयमा छलफल गरिसकेका छन् ।
