काठमाडौं । ग्यासको अभावका कारण खाना पकाउन समस्या भएका विद्यार्थी, कर्मचारी तथा मजदुरलाई लक्षित गर्दै चितवन मेडिकल कलेज परिसरको क्यान्टिनले सहुलियत दरमा खाना खुवाउन थालेको छ।
कलेज परिसरमा सञ्चालित फ्राइन्डस रेष्ट्रोले यसअघि रु १५० मा बिक्री गर्दै आएको सादा खाना ग्यास अभावका कारण समस्यामा परेकालाई रु १०० मै उपलब्ध गराउन थालेको सञ्चालक कृष्णप्रसाद ढकालले जानकारी दिए।
एउटा मात्र ग्यास सिलिन्डर भएका र खाली भएपछि पुनः भर्न नपाउँदा समस्या झेलिरहेका नागरिकलाई लक्षित गरी तत्कालको समस्या समाधानमा सहयोग पुगोस् भन्ने उद्देश्यले सहुलियतमा खाना खुवाउन सुरु गरिएको ढकालले बताए।
यसैबीच, ग्यास अत्यावश्यक भएका नागरिकलाई सम्बन्धित वडामा नाम टिपाउन आग्रह गरिएको छ। प्रमुख जिल्ला अधिकारी गणेश अर्यालका अनुसार जिल्ला प्रशासन कार्यालयले क्लस्टरका आधारमा दैनिक ग्यास बिक्रीको व्यवस्था मिलाएको छ।
हाल दैनिक करिब आठ हजार सिलिन्डर ग्यास क्लस्टरका आधारमा बिक्री भइरहेको छ। प्रशासनको टोल फ्री नम्बरमा सम्पर्क गरी हालसम्म ९९८ जनाले ग्यास लगिसकेको प्रमुख जिल्ला अधिकारी अर्यालले जानकारी दिए।
उनका अनुसार आगामी शुक्रबारदेखि केन्द्रीय बसपार्कबाट समेत क्लस्टरका आधारमा ग्यास बिक्री गर्ने व्यवस्था मिलाइनेछ।
