काठमाडौं । तनहुँमा खाना पकाउने ग्यासको आपूर्ति सहज बनाउन जिल्ला प्रशासन कार्यालयले सम्बन्धित ग्यास उद्योग तथा संघीय निकायसँग समन्वय गर्दै आपूर्ति बढाउन पहल गरेको छ।
जिल्लाका विभिन्न स्थानमा ग्यासको अभाव देखिन थालेपछि प्रशासनले सम्बन्धित उद्योगसँग प्रत्यक्ष समन्वय गरी तत्काल आपूर्ति बढाउन आग्रह गरेको हो।
प्रमुख जिल्ला अधिकारी शिवलाल तिवारीका अनुसार देवघाट क्षेत्रमा ग्यास अभाव भएको जानकारी पाएपछि चितवनस्थित सम्बन्धित ग्यास उद्योगमा फोन गरी तनहुँमा आपूर्ति बढाउन आग्रह गरिएको छ। उपभोक्ताले सहज रूपमा ग्यास पाउने वातावरण बनाउन उद्योगसँग आवश्यक समन्वय गरिएको उनले बताए।
दमौली क्षेत्रमा समेत ग्यास आपूर्तिमा समस्या देखिएको जानकारी पाएपछि तीन जना ग्यास डिलर सञ्चालकले प्रशासनलाई फोन गरी अवस्थाबारे जानकारी गराएका थिए। त्यसलगत्तै प्रजिअ तिवारीले सम्बन्धित ग्यास उद्योगलाई दमौलीका लागि आपूर्ति बढाउन आग्रह गरेका हुन्।
तिवारीका अनुसार ग्यासको माग र आपूर्तिबीच सन्तुलन नमिल्दा जिल्लाका कतिपय स्थानमा उपभोक्ताले अभाव झेल्नुपरेको छ। समस्या तत्काल समाधान गर्न स्थानीयस्तरसँगै संघीय तहमा समेत समन्वय गरिएको उनले बताए।
उद्योग, वाणिज्य तथा आपूर्ति मन्त्रालयका सहसचिवसँग समेत कुराकानी गरी तनहुँको ग्यास आपूर्तिको अवस्थाबारे जानकारी गराइएको प्रशासनले जनाएको छ। जिल्लामा देखिएको अभाव, डिलरहरूले भोगिरहेको आपूर्ति समस्या तथा उपभोक्ताको कठिनाइबारे जानकारी गराउँदै आपूर्ति बढाउन आवश्यक पहल गरिदिन आग्रह गरिएको तिवारीले बताए।
खाना पकाउने ग्यास सर्वसाधारणको दैनिक जीवनसँग प्रत्यक्ष जोडिएको अत्यावश्यक वस्तु भएकाले नियमित र सहज आपूर्ति सुनिश्चित गर्न प्रशासनले सम्बन्धित निकायसँग निरन्तर समन्वय गरिरहेको उनको भनाइ छ।
यसैबीच, बजारमा ग्यासको कृत्रिम अभाव सिर्जना गर्ने, लुकाउने वा कालोबजारी गर्ने गतिविधि हुन नदिन प्रशासनले निगरानी बढाउने जनाएको छ। आपूर्ति समस्या समाधान गर्न ग्यास उद्योग, डिलर तथा सम्बन्धित सरकारी निकायबीच प्रभावकारी समन्वय आवश्यक रहेको प्रशासनले जनाएको छ।
