काठमाडौं । बाढीका कारण अवरुद्ध पृथ्वीराजमार्गको नागढुंगा–मुग्लिन खण्डअन्तर्गत कृष्णभीरमा नयाँ ट्रयाक खोल्ने काम पूरा भएको छ। सडक डिभिजन कार्यालय भरतपुरका अनुसार अब भोलिदेखि उक्त सडकमा नियमित रूपमा सवारीसाधन सञ्चालन हुनेछन्।
भित्तातर्फको कटिङ र सडक सम्याउने काम सकिएपछि आइतबार केही सवारीसाधन परीक्षणका रूपमा सञ्चालन गरिएको थियो। परीक्षण सफल भएपछि नियमित यातायात सञ्चालनका लागि आवश्यक काम पूरा गरिएको कार्यालयले जनाएको छ।
तीन सय मिटर नयाँ सडक तयार
कृष्णभीरमा करिब ३०० मिटर लामो नयाँ ट्रयाक निर्माण गरिएको छ। ट्रयाकको सडक चौडाइ सात मिटर रहेको छ भने नालीसहित संरचनाको कुल चौडाइ करिब साढे सात मिटर छ।
निर्माणको पहिलो चरणमा ९ देखि १० दिनसम्म ११–१२ वटा उपकरण परिचालन गरिएको थियो। काममा करिब ४०–५० जना दक्ष तथा अदक्ष श्रमिक खटिएका थिए।
