काठमाडौं । नारायणगढ–मुग्लिन सडकखण्डअन्तर्गत तुइनखोला क्षेत्रमा केही दिनका लागि सडक पूर्ण रूपमा सञ्चालनमा रहने भएको छ। पृथ्वी राजमार्गको कृष्णभीरमा पहिरोपछि खोलिएको नयाँ ट्र्याकबाट यातायात सञ्चालनमा आएपछि तराईबाट काठमाडौं जाने मुख्य सडकमार्गमा सहजता ल्याउन तुइनखोलामा भइरहेको स्लोप स्टाबिलाइजेसनको काम अस्थायी रूपमा रोकिएको हो।
सडक डिभिजन भरतपुरका सूचना अधिकारी एवं इञ्जिनियर कृष्णप्रसाद आचार्यका अनुसार तुइनखोलामा सडकको भीर स्थिरीकरणको काम भइरहेकाले गत भदौ २२ गतेदेखि उक्त क्षेत्रमा सवारी आवागमन आंशिक रूपमा सञ्चालन गरिएको थियो। कृष्णभीरको सडक खुलेसँगै काठमाडौं प्रवेश गर्ने मुख्य मार्गमा थप अवरोध हुन नदिन केही दिनका लागि तुइनखोलाको काम रोकिएको उनले बताए।
लामो समयसम्म पृथ्वी राजमार्ग अवरुद्ध हुँदा काठमाडौं जाने सवारीसाधन प्रभावित भएको र नारायणगढ–मुग्लिन सडकखण्डमा समेत अवरोध हुँदा यात्रु तथा मालवाहक सवारीसाधनलाई थप समस्या हुन सक्ने भएकाले तत्कालका लागि सडक पूर्ण रूपमा सञ्चालन गरिएको आचार्यले जानकारी दिए।
यातायातको अवस्था सहज भएपछि तुइनखोलामा रोकिएको पहिरो व्यवस्थापन तथा सडक स्थिरीकरणको काम पुनः सुरु गरिने उनले बताए।
यसअघि स्लोप स्टाबिलाइजेसनको कामका कारण बिहान ८ः३० बजेदेखि बेलुकी ६ बजेसम्म प्रत्येक दुई घण्टामा आधा घण्टाका लागि मात्रै सवारीसाधन सञ्चालन गर्ने व्यवस्था थियो। बेलुकी ६ बजेदेखि बिहान ८ बजेसम्म भने सडक निरन्तर खुला राखिँदै आएको थियो।
गत वर्षदेखि तुइनखोलामा वर्षायामसँगै हिउँदमा समेत पहिरो खस्ने र सडक अवरुद्ध हुने समस्या दोहोरिँदै आएपछि सडक डिभिजन भरतपुरले यसको दीर्घकालीन समाधानका लागि विशेष प्रविधिबाट काम अघि बढाएको छ।
योजनाअनुसार भीरको ढलान व्यवस्थापन, ‘नेलिङ’ प्रविधिको प्रयोग, पानी निकासका लागि ‘होरिजोन्टल ड्रेन’ निर्माण तथा बायोइन्जिनियरिङ प्रविधि अपनाइनेछ। हाल तुइनखोलामा माथिबाट खस्न सक्ने ठूला ढुंगा काटेर सुरक्षित रूपमा पन्छाउने काम भइरहेको सडक डिभिजनले जनाएको छ।
