काठमाडौँ । सगरमाथा आरोहणका लागि बाटो बनाउने क्रममा खुम्बु आइसफल क्षेत्रमा एक बेवारिसे शव फेला परेको छ। आइसफल डाक्टरले आधार शिविरबाट क्याम्प १ जाने मुख्य मार्गमै हिउँले आधा पुरिएको अवस्थामा शव भेटेका हुन्।
शव मुख्य आरोहण मार्गमै भेटिएकाले सुरक्षामा असर पर्न सक्ने भन्दै सम्बन्धित निकायहरूले तत्काल व्यवस्थापन सुरु गरेका थिए। नेपाल पर्वतारोहण संघका अनुसार अनुभवी शेर्पा टोलीको सहयोगमा शव निकालेर आधार शिविर ल्याइएको थियो।
पछि उक्त शवलाई हेलिकप्टरमार्फत लुक्ला हुँदै काठमाडौं ल्याइएको छ। अहिले शवलाई पोस्टमार्टम र पहिचानका लागि शिक्षण अस्पतालमा राखिएको छ।
शव कसको हो भन्ने अझै खुलेको छैन भने घटनाबारे थप अनुसन्धान भइरहेको छ।
