काठमाडौं । महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री सिता बादीले शुक्रबार भृकुटीमण्डप क्षेत्रको छड्के अनुगमन गरेकी छन्।
समाज कल्याण परिषद्को टोलीसहित अनुगमनमा पुगेकी मन्त्री बादीले भृकुटीमण्डपलाई व्यवस्थित, सुरक्षित, स्वच्छ, हरित, समावेशी तथा नागरिकमैत्री सार्वजनिक केन्द्रका रूपमा विकास गर्न आवश्यक अध्ययन अघि बढाउन निर्देशन दिएकी छन्।
उनले भृकुटीमण्डपका संरचना तथा क्षेत्रको उपयोग, व्यवस्थापन, व्यापार तथा सेवा सञ्चालन र आम्दानीबारे सम्बन्धित अधिकारीसँग जानकारी लिइन्।
राजधानीको महत्वपूर्ण सार्वजनिक सम्पत्तिका रूपमा रहेको भृकुटीमण्डपको उपलब्ध क्षेत्र र संरचनाको अधिकतम सदुपयोग हुने गरी विकास गर्नुपर्नेमा उनले जोड दिएकी छन्।
