काठमाडौं । अर्थमन्त्री स्वर्णिम वाग्लेले सरकारका आर्थिक नीति, बजेट, कर प्रणाली, विद्युत् महसुल र राजस्व वृद्धिलगायत विषयमा उठेका प्रश्नको बचाउ गरेका छन्।
राष्ट्रिय स्वतन्त्र पार्टी (रास्वपा) केन्द्रीय कार्यालयमा आयोजित ‘नागरिक, नीति र नेतृत्व’ कार्यक्रममा नागरिकसँग प्रत्यक्ष संवाद गर्दै वाग्लेले दीर्घकालीन आर्थिक सुधारका लागि सरकारले कतिपय अलोकप्रिय तर आवश्यक निर्णय लिएको बताए।
उनले चालु आर्थिक वर्षमा १५ खर्ब ८० अर्ब रुपैयाँ राजस्व संकलनको लक्ष्य पूरा गर्न सुशासन र आर्थिक गतिविधि विस्तार आवश्यक रहेको बताए। बजेट निर्माणमा आफू र प्रधानमन्त्रीबीच लामो छलफलपछि निर्णयमा पुगिएको उनको भनाइ थियो।
विद्युत् महसुलमा विपन्न वर्गलाई राहत दिने, पुँजी बजारलाई व्यवस्थित गर्ने तथा क्रिप्टो माइनिङबारे अध्ययन गर्ने तयारी रहेको उनले बताए। वास्तविक भूमिहीनको पहिचान गरी लालपुर्जा वितरण गरिने र अन्जानमा कालोसूचीमा परेका नागरिकलाई राहत दिने विषयमा समेत छलफल भइरहेको उनले जानकारी दिए।
कार्यक्रममा सहभागीहरूले कर नीति, बजेट व्यवस्थापन तथा पार्टीभित्रको टिकट वितरणमा पारदर्शितालगायत विषयमा असन्तुष्टि व्यक्त गरेका थिए। वाग्लेले सरकार सुशासनको जगमा अघि बढिरहेको दाबी गर्दै नागरिकलाई धैर्य गर्न आग्रह गरे।
Read More
