काठमाडौं । आयुर्वेद चिकित्सा परिषद्को रजिस्ट्रारमा डा. हरि शरण अर्याल नियुक्त भएका छन्। उनले शुक्रबार स्वास्थ्य तथा खाद्य स्वच्छता मन्त्री निशा मेहतासमक्ष पद तथा गोपनीयताको शपथ लिएका छन्।

डा. अर्यालले त्रिभुवन विश्वविद्यालयअन्तर्गत आयुर्वेद क्याम्पसबाट बीएएमएस र कायचिकित्सामा एमडी गरेका छन्। एमडीमा उनले स्वर्ण पदकसहित विशिष्ट श्रेणी हासिल गरेका थिए।

उनी सन् २००९ देखि नेशनल नेचर केयर हस्पिटलमा मेडिकल डाइरेक्टरका रूपमा कार्यरत छन्। यसअघि नरदेवीस्थित आयुर्वेद अस्पतालमा कन्सल्टेन्ट कायचिकित्सकका रूपमा समेत काम गरेका थिए।

Read More

काठमाडौं । जेनजी अगुवा रवि किरण हमालले आगामी भदौ २३ गते लाखौँ नागरिकलाई सडकमा उत्रिन अपिल गरेका छन्। उनले उक्त दिनलाई पुनः आन्दोलन गर्ने दिनका रूपमा नभई गत वर्षको जेनजी आन्दोलनको स्मरण, शहीदप्रति श्रद्धा र राष्ट्रिय एकताका लागि समर्पित गर्न आग्रह गरेका हुन्।

राष्ट्रिय नागरिक जेनजी अभियानको पत्रकार सम्मेलनमा बोल्दै हमालले शहीद परिवारको भरोसा, घाइतेहरूको आत्मबल र नागरिक एकताका लागि भदौ २३ गते एकजुट हुनुपर्ने बताए।

उनले सरकारले जेनजी आन्दोलनका सुशासन, पारदर्शिता, जवाफदेहिता र संस्थागत सुधारका मुद्दा सम्बोधन नगरेको आरोप लगाए। साथै सरकारका केही अभिव्यक्ति तथा नेपाल–भारत सीमा र सन्धिसम्बन्धी विषयमा गम्भीर प्रश्न उठेको भन्दै छानबिन र सार्वजनिक बहसको माग गरे।

आन्दोलनका उपलब्धिमाथि घात गर्ने प्रयास भए आफूहरू पुनः कठिन संघर्षका लागि तयार रहेको चेतावनी दिँदै हमालले भदौ २३ लाई नयाँ राष्ट्रिय संकल्पको दिन बनाउन सबै नेपालीलाई आह्वान गरे।

Read More

काठमाडौं । पाकिस्तानका पूर्वप्रधानमन्त्री इमरान खानलाई स्वास्थ्य परीक्षणका लागि इस्लामाबादस्थित शिफा इन्टरनेसनल अस्पताल लगिएको केही समयपछि शुक्रबार रावलपिन्डीस्थित अदियाला जेलमा फिर्ता लगिएको छ ।

पाकिस्तान तहरीक–ए–इन्साफ (पीटीआई) का संस्थापक खानको स्वास्थ्य विस्तृत रूपमा परीक्षण गर्न सर्वोच्च अदालतले सङ्घीय सरकारलाई निर्देशन दिएको थियो । अदालतले उनलाई दुई दिनभित्र निजी अस्पतालमा लगेर आवश्यक स्वास्थ्य परीक्षण गराउन आदेश दिएको थियो ।

स्थानीय सञ्चारमाध्यम डनका अनुसार अधिकतम सुरक्षा व्यवस्थाबीच अस्पताल पुर्‍याइएका खानको आवश्यक परीक्षण पूरा भएपछि उनलाई पुनः जेल लगिएको हो । उनको आवागमनलाई ध्यानमा राख्दै अस्पताल आसपास कडा सुरक्षा व्यवस्था गरिएको थियो । पित्रास बुखारी रोड र सर्भिस रोड साउथ बिहीबार रातिदेखि नै सर्वसाधारणका लागि बन्द गरिएको थियो ।

खानको सुरक्षाका लागि इस्लामाबाद राजधानी क्षेत्र प्रहरी, नगर प्रशासन र पाकिस्तान रेन्जर्ससहित आठ सयभन्दा बढी सुरक्षाकर्मी परिचालन गरिएको थियो । राजधानी प्रहरी र जेल अधिकारी सम्मिलित टोलीले अस्पतालसम्मको आवागमन तथा सुरक्षा व्यवस्थापन गरेको थियो ।

खान सन् २०२३ देखि जेलमा छन् । तोशाखाना मुद्दासँग सम्बन्धित १४ वर्षको सजाय भोगिरहेका खानको रक्तचापमा उतारचढाव देखिएपछि स्वास्थ्य परीक्षण गराइएको हो । पछिल्ला जेल मेडिकल अभिलेखमा पनि उनीमा स्वास्थ्यसम्बन्धी लक्षण देखिएको उल्लेख गरिएको छ ।

सर्वोच्च अदालतको आदेशअनुसार गरिएको स्वास्थ्य परीक्षणमा आवश्यक जाँच तथा प्रारम्भिक चिकित्सकीय परीक्षण पूरा भएपछि उनलाई शुक्रबार बिहान अदियाला जेल फिर्ता लगिएको अधिकारीहरूले बताएका छन् ।

Read More

काठमाडौं । अमेरिकाको अलास्कामा आठ जना सवार चार्टर विमान दुर्घटनामा परेको छ। दुर्घटनापछि विमानमा रहेका दुई पाइलट र छ यात्रुको अवस्था अज्ञात रहेको अधिकारीहरूले बताएका छन्।

पश्चिमी अलास्काको दुर्गम क्षेत्रमा विमान दुर्घटनामा परेको हो। अमेरिकी अधिकारीहरूका अनुसार विमान एन्कोरेजबाट केप न्युवेनहमतर्फ उडेको थियो।

प्रारम्भिक विवरणअनुसार गन्तव्यमा पुगेर अवतरण गर्ने क्रममा विमान दुर्घटनामा परेको हो। दुर्घटनास्थल दुर्गम क्षेत्रमा रहेकाले खोजी तथा उद्धार कार्यमा चुनौती देखिएको अधिकारीहरूले बताएका छन्।

नेसनल ट्रान्सपोर्टेसन सेफ्टी बोर्ड (एनटीएसबी) का अलास्का क्षेत्र प्रमुख क्लिन्ट जोन्सनले विमानमा दुई पाइलट र छ यात्रु गरी आठ जना सवार रहेको पुष्टि गरेका छन्।

दुर्घटनाको कारणबारे तत्काल स्पष्ट जानकारी सार्वजनिक भएको छैन। घटनाबारे सम्बन्धित निकायले अनुसन्धान तथा खोजी कार्य अघि बढाएका छन्।

Read More

काठमाडौं । नेपाली बजारमा शुक्रबार सुन र चाँदी दुवैको मूल्य बढेको छ। नेपाल सुनचाँदी व्यवसायी महासंघका अनुसार सुनको मूल्य एकैदिन प्रतितोला ३ हजार ३०० रुपैयाँले वृद्धि भएको हो।

बिहीबार प्रतितोला ३ लाख १३ हजार ४०० रुपैयाँमा कारोबार भएको सुन शुक्रबार ३ लाख १६ हजार ७०० रुपैयाँ पुगेको छ।

चाँदीको मूल्य पनि बढेको छ। बिहीबार प्रतितोला ४ हजार ८५५ रुपैयाँ रहेको चाँदी शुक्रबार १३० रुपैयाँले बढेर ४ हजार ९८५ रुपैयाँ कायम भएको महासंघले जनाएको छ।

यससँगै शुक्रबार नेपाली बजारमा सुन र चाँदी दुवैको मूल्यले नयाँ उचाइ कायम गरेको छ।

Read More

काठमाडौं । अमेरिकी राष्ट्रपति डोनाल्ड ट्रम्पले इरानसँग रोकिएको संवाद भविष्यमा पुनः सुरु हुन सक्ने संकेत गरेका छन्। सञ्चारकर्मीसँग कुरा गर्दै उनले इरानसँगको वर्तमान अवस्था आफूअनुकूल रहेको दाबी गरेका छन्।

ट्रम्पका अनुसार वासिङ्टनको प्रमुख उद्देश्य इरानलाई परमाणु हतियार विकास गर्नबाट रोक्नु हो। उनले इरानले परमाणु हतियार हासिल गर्न नपाउने दाबी गर्दै त्यसका लागि अमेरिका आवश्यक कदम चाल्न तयार रहेको बताएका छन्।

अमेरिका र इजरायलले गत फेब्रुअरी २८ मा इरानविरुद्ध सैन्य अभियान सुरु गरेपछि हर्मुज जलसन्धिको सञ्चालन प्रभावित भएको थियो। सोही अवस्थाबारे बोल्दै ट्रम्पले उक्त जलक्षेत्र अहिले अमेरिकी नियन्त्रणमा रहेको दाबी गरेका छन्।

हाल भने अमेरिका र इरानबीच औपचारिक संवाद अघि बढेको छैन। सीएनएनका अनुसार ट्रम्पले आफ्ना वार्ता टोलीलाई इरानसँगको सम्पर्क स्थगित गर्न निर्देशन दिएका छन्।

यसअघि मंगलबार सामाजिक सञ्जालमार्फत ट्रम्पले अमेरिका र इरानबीच तत्काल कुनै वार्ता भइरहेको वा नयाँ वार्ताको मिति तय भएको भन्ने विवरण अस्वीकार गरेका थिए। उनले अमेरिकी नौसेनाको नाकाबन्दी जारी रहेको पनि बताएका छन्।

Read More

काठमाडौं । नेपाल वायुसेवा निगमको कार्यकारी अध्यक्ष पदमा महेश्वरभक्त श्रेष्ठलाई गरिएको नियुक्ति सर्वोच्च अदालतले खारेज गरेको छ। बिहीबार न्यायाधीशद्वय सुनिलकुमार पोखरेल र बालकृष्ण ढकालको इजलासले श्रेष्ठको नियुक्ति बदर गर्ने फैसला सुनाएको हो।

श्रेष्ठको नियुक्ति प्रक्रियामा असन्तुष्टि जनाउँदै निगम सञ्चालक समितिका सदस्य उपेन्द्रबहादुर कार्कीले असार ३२ गते सर्वोच्चमा रिट दायर गरेका थिए। उनले आफूलाई कार्यकारी अध्यक्ष बनाउन परमादेशसमेत माग गरेका थिए।

अदालतले श्रेष्ठको नियुक्ति बदर गरे पनि कार्कीलाई सोही पदमा नियुक्त गर्न सरकारलाई आदेश दिएको छैन। सर्वोच्च अदालतका प्रवक्ता एवं सहरजिस्ट्रार अर्जुनप्रसाद कोइरालाका अनुसार कार्कीले दायर गरेको रिट आंशिक रूपमा मात्र जारी भएको हो।

नियुक्ति विवादको पृष्ठभूमि

श्रेष्ठलाई कार्यकारी अध्यक्ष बनाउने निर्णयअघि नै निगमको सञ्चालक समिति गठनलाई लिएर विवाद भएको थियो। योग्यता र प्राथमिकताका आधारमा आफू पहिलो नम्बरमा रहेको दाबी गर्दै कार्कीले आफूलाई सञ्चालक समितिमा समावेश नगरेको भन्दै कानुनी चुनौती दिएका थिए।

त्यसअघि पर्यटन मन्त्रालयले डा. दीपकप्रसाद बाँस्तोला, प्रविन भट्टराई, महेश्वरभक्त श्रेष्ठ, रूपा लामिछाने र लिलाराज ढकाललाई सञ्चालक समिति सदस्य नियुक्त गरेको थियो। ती नियुक्तिविरुद्ध परेको मुद्दामा सर्वोच्चले नियुक्ति प्रक्रिया बदर गर्दै पुनः प्रक्रिया अघि बढाउन आदेश दिएको थियो।

अदालतले मन्त्रालयले कार्कीलाई नियुक्त नगर्न पर्याप्त कारण नदेखाई छनोटमा मनोमानी गरेको ठहर गरेको थियो। त्यसपछि मन्त्रालयले कार्कीसहित भीम चन्दलाई निगम सञ्चालक समितिमा नियुक्त गरेको थियो।

तर, त्यसपछि कार्यकारी अध्यक्ष छनोट गर्दा फेरि श्रेष्ठलाई जिम्मेवारी दिइएपछि कार्कीले उक्त निर्णयलाई चुनौती दिएका थिए।

बिहीबारको फैसलाले श्रेष्ठको कार्यकारी अध्यक्ष पद कायम नरहने भएको छ। यद्यपि, अब निगमको कार्यकारी अध्यक्षमा कसलाई नियुक्त गर्ने भन्ने विषयमा सर्वोच्चले कार्कीको पक्षमा परमादेश नदिएकाले सरकारकै निर्णय प्रक्रियाबाट टुंगो लाग्नेछ।

Read More

काठमाडौं । स्मार्ट टेलिकमको सम्पत्ति तथा धितोसम्बन्धी विवादमा मुछिएका नेपाल इन्भेष्टमेन्ट मेगा बैंकका सीईओ ज्योतिप्रकाश पाण्डे तत्काल जेल जानुपर्ने अवस्थाबाट जोगिएका छन्। काठमाडौं जिल्ला अदालतले बिहीबार उनलाई ८० लाख रुपैयाँ धरौटीमा छाड्ने आदेश दिएको हो।

न्यायाधीश कमलकान्त जोशीको इजलासले थुनछेक बहसपछि पाण्डेलाई धरौटीमा रिहा गर्ने निर्णय गरेको हो। अब उनी अदालतमा विचाराधीन मुद्दाको सामना थुनाबाहिर रहेर गर्न सक्नेछन्।

पाण्डेविरुद्ध सरकारले स्मार्ट टेलिकमसँग जोडिएको कारोबारमा ठगी, संगठित अपराध तथा बैंक तथा वित्तीय संस्थासम्बन्धी कसुर गरेको आरोप लगाउँदै मुद्दा दायर गरेको थियो। पाण्डेले भने आफूमाथिका आरोप अस्वीकार गर्दै आएका छन्।

यसअघि पनि उनी प्रहरी हिरासतमा पुगेका थिए। गत वैशाख २९ गते सिन्धुलीबाट पक्राउ परेका पाण्डेलाई सर्वोच्च अदालतले बन्दीप्रत्यक्षीकरणको निवेदनमाथि सुनुवाइ गर्दै जेठ ६ गते हाजिरी जमानीमा रिहा गर्न आदेश दिएको थियो। परिवारको तर्फबाट उनकी श्रीमती निरु दाहालले गैरकानुनी थुनामा राखिएको दाबी गर्दै सर्वोच्चमा निवेदन दिएकी थिइन्।

स्मार्ट टेलिकमले नेपाल दूरसञ्चार प्राधिकरणबाट २०७० सालमा आधारभूत टेलिफोन सेवाको अनुमति पाएको थियो। तर, कम्पनीले तोकिएको समयमा अनुमतिपत्र नवीकरण नगरेपछि २०८० वैशाख ३ गतेदेखि अनुमति स्वतः खारेज भएको थियो।

अनुमतिपत्र खारेज भएपछि कम्पनीको सम्पत्ति र कर्जा असुलीसँग सम्बन्धित गतिविधिमा अनियमितता भएको आरोप उठेको हो। यही विषयलाई लिएर पाण्डेसहितका व्यक्तिमाथि सरकारले कानुनी कारबाही अघि बढाएको हो।

अदालतले अहिले पाण्डेलाई धरौटीमा रिहा गर्ने आदेश मात्र दिएको हो। उनी दोषी वा निर्दोष रहेको विषयमा अन्तिम फैसला हुन बाँकी छ।

Read More

काठमाडौं। भूमि व्यवस्था, सहकारी, संघीय मामिला तथा सामान्य प्रशासनमन्त्री प्रतिभा रावल कञ्चनपुर, कैलालीलगायत जिल्लाको भ्रमणमा जाने भएकी छन्।

मन्त्री रावलले सामाजिक सञ्जालमार्फत भदौ ६ गतेदेखि केही दिन ती जिल्लाको भ्रमणमा रहने जानकारी दिएकी हुन्। भ्रमणका क्रममा भूमि व्यवस्था, सहकारी तथा संघीय मामिला तथा सामान्य प्रशासन मन्त्रालयसँग सम्बन्धित जनगुनासो सुन्ने कार्यक्रम रहेको उनले बताएकी छन्।

भ्रमणका क्रममा सहकारी क्षेत्रका समस्या तथा भूमिहीन र सुकुम्बासी नागरिकसँग प्रत्यक्ष भेटघाट गर्ने कार्यक्रमसमेत रहेको छ। साथै, सम्बन्धित सरोकारवालासँग छलफल गर्ने कार्यक्रम तय गरिएको मन्त्री रावलले जानकारी दिएकी छन्।

उनका अनुसार भ्रमणका क्रममा सम्बन्धित विषयमा सरकारले गरिरहेका काम तथा आगामी तयारीबारे नागरिकलाई जानकारी गराइनेछ।

Read More

काठमाडौं । राष्ट्रिय सभाको बैठक आज शुक्रबार संघीय संसद भवन, सिंहदरबारमा दिउँसो १ः१५ बजे बस्ने भएको छ।

बैठकमा अर्थ मन्त्रालय र गृह मन्त्रालयसँग सम्बन्धित मौखिक प्रश्नको सम्बन्धित मन्त्रीहरूले जवाफ दिने सम्भावित कार्यसूची रहेको छ।

यस्तै, प्रधानमन्त्री बालेन्द्र साहले ‘नेपाल विशेष सेवा ऐन, २०४२ को साविकको व्यवस्था जगाउनेसम्बन्धी विधेयक, २०८३ माथि विचार गरियोस्’ भन्ने प्रस्ताव राष्ट्रिय सभासमक्ष प्रस्तुत गर्ने कार्यसूची रहेको छ।

Read More