काठमाडौं । पाकिस्तानका पूर्वप्रधानमन्त्री इमरान खानलाई स्वास्थ्य परीक्षणका लागि इस्लामाबादस्थित शिफा इन्टरनेसनल अस्पताल लगिएको केही समयपछि शुक्रबार रावलपिन्डीस्थित अदियाला जेलमा फिर्ता लगिएको छ ।
पाकिस्तान तहरीक–ए–इन्साफ (पीटीआई) का संस्थापक खानको स्वास्थ्य विस्तृत रूपमा परीक्षण गर्न सर्वोच्च अदालतले सङ्घीय सरकारलाई निर्देशन दिएको थियो । अदालतले उनलाई दुई दिनभित्र निजी अस्पतालमा लगेर आवश्यक स्वास्थ्य परीक्षण गराउन आदेश दिएको थियो ।
स्थानीय सञ्चारमाध्यम डनका अनुसार अधिकतम सुरक्षा व्यवस्थाबीच अस्पताल पुर्याइएका खानको आवश्यक परीक्षण पूरा भएपछि उनलाई पुनः जेल लगिएको हो । उनको आवागमनलाई ध्यानमा राख्दै अस्पताल आसपास कडा सुरक्षा व्यवस्था गरिएको थियो । पित्रास बुखारी रोड र सर्भिस रोड साउथ बिहीबार रातिदेखि नै सर्वसाधारणका लागि बन्द गरिएको थियो ।
खानको सुरक्षाका लागि इस्लामाबाद राजधानी क्षेत्र प्रहरी, नगर प्रशासन र पाकिस्तान रेन्जर्ससहित आठ सयभन्दा बढी सुरक्षाकर्मी परिचालन गरिएको थियो । राजधानी प्रहरी र जेल अधिकारी सम्मिलित टोलीले अस्पतालसम्मको आवागमन तथा सुरक्षा व्यवस्थापन गरेको थियो ।
खान सन् २०२३ देखि जेलमा छन् । तोशाखाना मुद्दासँग सम्बन्धित १४ वर्षको सजाय भोगिरहेका खानको रक्तचापमा उतारचढाव देखिएपछि स्वास्थ्य परीक्षण गराइएको हो । पछिल्ला जेल मेडिकल अभिलेखमा पनि उनीमा स्वास्थ्यसम्बन्धी लक्षण देखिएको उल्लेख गरिएको छ ।
सर्वोच्च अदालतको आदेशअनुसार गरिएको स्वास्थ्य परीक्षणमा आवश्यक जाँच तथा प्रारम्भिक चिकित्सकीय परीक्षण पूरा भएपछि उनलाई शुक्रबार बिहान अदियाला जेल फिर्ता लगिएको अधिकारीहरूले बताएका छन् ।
