काठमाडौं । सुदूरपश्चिम प्रदेशमा गत साउन महिनामा ट्राफिक नियम उल्लङ्घन गर्ने पाँच हजार २०२ वटा सवारी साधन कारबाहीमा परेका छन् । सुदूरपश्चिम प्रदेश प्रहरी कार्यालयका अनुसार कारबाहीमा परेका सवारी साधनबाट प्रहरीले ४३ लाख ६३ हजार ५०० रुपैयाँ राजस्व सङ्कलन गरेको छ । सुदूरपश्चिम प्रदेश प्रहरी कार्यालयका प्रवक्ता प्रहरी वरिष्ठ उपरीक्षक पदमबहादुर विष्टले सवारी नियम उल्लङ्घन गर्ने तथा क्षमताभन्दा बढी यात्रु र मालसामान बोक्ने सवारी साधनमाथि नियमित रूपमा कारबाही गरिँदै आएको जानकारी दिए ।
प्रहरीका अनुसार साउन महिनामा सुदूरपश्चिम प्रदेशमा २२३ वटा सवारी दुर्घटना भएका थिए । ती दुर्घटनामा १५ जनाको मृत्यु भएको थियो भने ३२४ जना घाइते भएका थिए । दुर्घटनामा ३२९ वटा सवारी साधन संलग्न रहेका थिए । दुर्घटनामध्ये १८१ वटा चालकका कारण भएका थिए भने नौ वटा मादक पदार्थ सेवनका कारण भएका थिए । त्यस्तै, चार वटा दुर्घटना सवारी साधनका कारण, १२ वटा पैदलयात्रीका कारण, १५ वटा चौपायाका कारण तथा मौसम र सडकका कारण एक–एक वटा दुर्घटना भएका थिए ।
प्रवक्ता विष्टका अनुसार सवारी दुर्घटना न्यूनीकरणका लागि ट्राफिक नियम उल्लङ्घन गर्ने सवारी साधनमाथि कारबाहीसँगै जनचेतनामूलक कार्यक्रमसमेत सञ्चालन गरिँदै आएको छ । चालकको लापरबाही, मादक पदार्थ सेवन तथा क्षमताभन्दा बढी यात्रु र मालसामान बोक्ने प्रवृत्तिलाई दुर्घटनाको प्रमुख जोखिमका रूपमा लिइएको प्रहरीले जनाएको छ ।
यसैगरी, प्रहरीले साउन महिनामा एक करोड ६९ लाख ५७ हजार ७८२ रुपैयाँ मूल्य बराबरका भन्सार छली गरी ल्याइएका सामान नियन्त्रणमा लिएको छ । प्राकृतिक सम्पदा दोहनमा संलग्न २४ वटा सवारी साधन बरामद गरी दुई लाख ५४ हजार ५०० रुपैयाँ जरिवाना असुल गरिएको छ भने घटनामा संलग्न नौ जनालाई पक्राउ गरिएको छ ।
अवैध वन पैदावार चोरीमा संलग्न तीन जनालाई नियन्त्रणमा लिएर प्रहरीले ७१४ क्युफिट काठ बरामद गरेको छ । उक्त कारबाहीबाट आठ लाख तीन हजार रुपैयाँ राजस्व सङ्कलन भएको प्रहरीले जनाएको छ । त्यस्तै, अवैध पशुपन्छी नियन्त्रणसम्बन्धी कारबाहीबाट प्रहरीले एक लाख २६ हजार रुपैयाँ राजस्व सङ्कलन गरेको छ । प्रहरीले सवारी दुर्घटना न्यूनीकरणसँगै भन्सार छली, प्राकृतिक सम्पदा दोहन, अवैध वन पैदावार तथा पशुपन्छी ओसारपसार नियन्त्रणमा समेत कारबाहीलाई तीव्रता दिएको जनाएको छ ।
