काठमाडौं। बागमती प्रदेशका नवनियुक्त मुख्यमन्त्री किरण थापाले आज प्रदेशसभाबाट विश्वासको मत लिँदै छन्। नेकपा एमाले, नेकपा र राष्ट्रिय प्रजातन्त्र पार्टी (राप्रपा)को समर्थनमा मुख्यमन्त्री बनेका थापाले दिउँसो १ बजे बस्ने प्रदेशसभा बैठकमा विश्वासको मतका लागि प्रस्ताव पेस गर्ने भएका हुन्।
नेकपा एमाले, नेकपा र राप्रपासहित ६३ जना प्रदेशसभा सदस्यको समर्थनमा मुख्यमन्त्री नियुक्त भएका थापालाई १०४ सदस्यीय प्रदेशसभामा सरकार टिकाउन कम्तीमा ५३ सांसदको समर्थन आवश्यक पर्छ। प्रारम्भिक रूपमा आवश्यक बहुमतभन्दा बढी सांसदको समर्थन रहेकाले विश्वासको मत प्राप्त गर्ने अवस्था बलियो देखिएको छ।
मुख्यमन्त्री थापाले प्रदेशसभाबाट विश्वासको मत लिएपछि प्रदेश सरकारलाई पूर्णता दिने तयारी गरेका छन्। विश्वासको मत प्राप्त गरेसँगै सरकार विस्तार तथा मन्त्रालय बाँडफाँटको प्रक्रिया अघि बढाउने तयारी रहेको बताइएको छ।
यसैबीच नेपाली कम्युनिस्ट पार्टी (नेकपा)ले मुख्यमन्त्री थापालाई विश्वासको मत दिन आफ्ना प्रदेशसभा सदस्यलाई ह्विप जारी गरेको छ। नेकपा बागमती प्रदेश संसदीय दलका प्रमुख सचेतक रत्नप्रसाद ढकालले आइतबार पत्र जारी गर्दै भदौ ८ गते दिउँसो १ बजे बस्ने प्रदेशसभा बैठकमा अनिवार्य उपस्थित भएर विश्वासको मतको पक्षमा मतदान गर्न निर्देशन दिएका हुन्।
गत भदौ ३ गते नेकपा, एमाले र राप्रपाबीच भएको सहमति तथा सहकार्यका आधारमा किरण थापाको नेतृत्वमा बागमती प्रदेश सरकार गठनका लागि दाबी पेस गरिएको थियो। त्यसको भोलिपल्ट अर्थात् भदौ ४ गते प्रदेश प्रमुख दीपकप्रसाद देवकोटाले थापालाई मुख्यमन्त्री नियुक्त गरी पद तथा गोपनीयताको शपथ गराएका थिए।
आजको विश्वासको मतपछि बागमती प्रदेश सरकारको आगामी राजनीतिक दिशा थप स्पष्ट हुने अपेक्षा गरिएको छ।
