काठमाडौं । देशका अधिकांश भूभागमा आगामी तीन दिन मौसम बदली रहनेछ। विभिन्न स्थानमा मेघगर्जन, चट्याङ, हावाहुरी र असिनासहित वर्षाको सम्भावना रहेको मौसम पूर्वानुमान महाशाखाले जनाएको छ। बुधबारदेखि शुक्रबारसम्म केही प्रदेशका पहाडी तथा तराई क्षेत्रमा भारी वर्षा हुनसक्ने भएकाले सतर्कता अपनाउन आवश्यक देखिएको छ।
कोशी प्रदेश: बुधबार सामान्य बदलीसँगै केही स्थानमा मेघगर्जन र चट्याङसहित वर्षा हुनसक्नेछ। शुक्रबार पहाडी भूभाग र तराईका एक–दुई स्थानमा भारी वर्षाको सम्भावना रहेको छ।
मधेश प्रदेश: प्रदेशमा बदली रहने र केही स्थानमा वर्षा हुनसक्ने सम्भावना छ। बिहानको समयमा तराई क्षेत्रमा हुस्सु तथा कुहिरो लाग्न सक्ने महाशाखाले जनाएको छ।
बागमती प्रदेश: बुधबार पहाडी भूभागका केही स्थानमा भारी वर्षा हुनसक्नेछ। बिहीबार पनि एक–दुई स्थानमा भारी वर्षाको सम्भावना छ भने शुक्रबारसमेत पहाडी क्षेत्रमा वर्षाको सम्भावना कायम रहनेछ।
गण्डकी प्रदेश: बुधबार पहाडी भूभागमा भारी वर्षा हुनसक्नेछ। बिहीबार पनि एक–दुई स्थानमा भारी वर्षाको सम्भावना रहेको छ। हिमाली क्षेत्रमा हल्का वर्षा तथा हिमपात हुनसक्नेछ।
लुम्बिनी प्रदेश: बुधबार पहाडी तथा तराई भूभागका केही स्थानमा भारी वर्षाको सम्भावना छ। मेघगर्जन, चट्याङ र हावाहुरीसहित वर्षा हुनसक्ने भएकाले सावधानी आवश्यक छ।
कर्णाली प्रदेश: बुधबार पहाडी भूभागका एक–दुई स्थानमा भारी वर्षाको सम्भावना रहेको छ। उच्च हिमाली क्षेत्रमा हल्का वर्षा तथा हिमपात हुनसक्नेछ।
सुदूरपश्चिम प्रदेश: बुधबार पहाडी तथा तराईका केही स्थानमा भारी वर्षाको सम्भावना छ। शुक्रबार पहाडी भूभागमा समेत भारी वर्षा हुनसक्ने पूर्वानुमान गरिएको छ।
हिमाली तथा तराई क्षेत्र: तीनै दिन हिमाली भूभागका केही स्थानमा हल्का वर्षा र हिमपात हुनसक्नेछ। तराईमा बिहानपख हुस्सु तथा कुहिरो लाग्न सक्नेछ। पछिल्लो २४ घण्टामा कास्कीसहित देशका विभिन्न स्थानमा भारी वर्षा भएको महाशाखाले जनाएको छ।
