काठमाडौँ । रौतहटको कटहरीया नगरपालिका–९ डुमरिया टोलमा एकल महिलामाथि बोक्सीको आरोप लगाउँदै कुटपिट र अमानवीय व्यवहार गरिएको घटना सार्वजनिक भएको छ । घटनामा संलग्न एक जनालाई प्रहरीले पक्राउ गरेको छ ।
प्रहरीका अनुसार करिब ५५ वर्षीया महिलामाथि केही व्यक्तिहरुले “आफन्तलाई बिरामी बनाएको” भन्दै गालीगलौज, लछारपछार र निर्घात कुटपिट गरेका थिए । यति मात्र नभई पीडितलाई जबरजस्ती मलमुत्रसमेत खुवाइएको आरोप छ ।
घटनापछि फरार रहेका राजेन्द्र माझीलाई शुक्रबार प्रहरीले पक्राउ गरेको जिल्ला प्रहरी कार्यालय रौतहटले जनाएको छ । प्रहरी नायव उपरीक्षक विष्णु प्रदीप बस्यालका अनुसार पक्राउ परेका माझीमाथि थप अनुसन्धान भइरहेको छ ।
घटनाले समाजमा अझै पनि अन्धविश्वास र बोक्सी आरोपजस्ता कुप्रथाले जरो गाडिरहेको देखाएको छ । प्रहरीले घटनामा संलग्न अन्य व्यक्तिको खोजी भइरहेको जनाएको छ ।
