काठमाडौं । पर्यटन व्यवसायीहरूले बाँके राष्ट्रिय निकुञ्जमा भौतिक पूर्वाधार विकास तथा होटल–रिसोर्टमा लगानी विस्तार गर्न आग्रह गरेका छन्। उनीहरूले उचित पूर्वाधार विकास भए पर्यटकको बसाइ अवधि बढ्ने र निकुञ्जको पर्यटन सम्भावना अझ प्रभावकारी रूपमा उपयोग गर्न सकिने बताएका छन्।
नेपाल एसोसिएसन अफ टूर एन्ड ट्राभल्स एजेन्ट (नाट्टा) बाँके च्याप्टरको समन्वयमा गरिएको अवलोकन भ्रमणपछि व्यवसायी, उद्योगी तथा भारतीय पर्यटकसहितको टोलीले निकुञ्ज क्षेत्रको पर्यटन प्रवर्द्धनका सम्भावित पक्षबारे छलफल गरेको हो।
नेपालगन्जका उद्योगी सञ्जय अग्रवालले बाँके राष्ट्रिय निकुञ्ज प्रचारप्रसारको अभावमा अपेक्षित रूपमा ओझेलमा परेको उल्लेख गर्दै आकर्षक होटल तथा रिसोर्ट विकासले क्षेत्रको पर्यटन आकर्षण बढाउने बताए। उनका अनुसार निकुञ्जमा आउने पर्यटकका लागि आवास र खानपान सुविधालाई गुणस्तरीय बनाउनु आवश्यक छ।
उनले निकुञ्जको प्राकृतिक सौन्दर्य, हरियाली वातावरण तथा चित्तल, हात्ती र मयुरजस्ता वन्यजन्तुको अवलोकनले पर्यटकलाई विशेष अनुभव दिने उल्लेख गरे।
त्यसैगरी उद्योगी चम्पालाल बोथ्राले निकुञ्जको प्रचारप्रसार बढाएर पर्यटक आगमन उल्लेख्य रूपमा वृद्धि गर्न सकिने धारणा राखे। होटल पौवा प्रालिका अध्यक्ष दुर्गाप्रसाद भण्डारीले यस क्षेत्रलाई पर्यापर्यटन (इको–टुरिजम) को केन्द्रका रूपमा विकास गर्न दीर्घकालीन लगानी आवश्यक रहेको बताए।
राप्तीसोनारी गाउँपालिकाका अध्यक्ष तप्त पौडेलले पर्यटन तथा उद्योग क्षेत्रमा लगानी भित्र्याउन स्थानीय तह सहजीकरण गर्न तयार रहेको बताए।
निकुञ्जकी नेचर गाइड उमा ओलीले चुरे–भावर क्षेत्रसँगै वन्यजन्तु अवलोकनका लागि बाँके राष्ट्रिय निकुञ्ज उपयुक्त गन्तव्य भएको उल्लेख गर्दै सडक र हवाई पहुँचका कारण काठमाडौँबाट समेत एक दिनमै भ्रमण सम्भव हुने बताइन्।
नाट्टा बाँके च्याप्टरका संस्थापक अध्यक्ष श्रीराम सिग्देलले निकुञ्ज नेपाल–भारत सीमासँग नजिक रहेकाले भारतीय पर्यटक भित्र्याउन सकिने सम्भावना उच्च रहेको बताए। उनले ग्रामीण पर्यटन प्रवर्द्धनसँगै स्थानीय थारू संस्कृति, परिकार र परम्परालाई पनि पर्यटन विकाससँग जोड्न सकिने धारणा राखे।
निकुञ्ज क्षेत्रमा घरबास (होमस्टे) मार्फत अनदी चामलको ढिक्री, आलुको अचार तथा डोक्नीको चटनीजस्ता स्थानीय परिकारले पर्यटकलाई आकर्षित गरिरहेको व्यवसायीहरूले बताएका छन्।
