काठमाडौँ । ललितपुरको जावलाखेलस्थित डीएभी कलेजमा अध्ययनरत एक विद्यार्थीको मृत्यु भएको घटनाबारे प्रहरीले अनुसन्धान सुरु गरेको छ।
जिल्ला प्रहरी परिसर ललितपुरका प्रवक्ता एसपी गौतम मिश्रका अनुसार कक्षा १२ मा अध्ययनरत १८ वर्षीय आर्यन सिंह सोमबार दिउँसो कलेज परिसरमा गम्भीर अवस्थामा फेला परेका थिए। उनलाई तत्काल उपचारका लागि सुमेरू सिटी अस्पताल लगिएको भए पनि उपचारकै क्रममा चिकित्सकले मृत घोषणा गरेका थिए।
प्रहरीका अनुसार घटनाअघि विद्यार्थीले आफ्नो कपीमा केही लेखेको भेटिएको छ। उक्त सामग्रीको अध्ययन तथा घटनाका अन्य पक्षबारे अनुसन्धान भइरहेको प्रहरीले जनाएको छ।
घटनाको कारण र परिस्थितिबारे थप विवरण संकलन गर्ने काम जारी रहेको तथा आवश्यक अनुसन्धानपछि थप तथ्य सार्वजनिक गरिने प्रहरीको भनाइ छ।
शैक्षिक संस्थामा भएको यस घटनाले विद्यार्थी तथा अभिभावकमाझ चासो बढाएको छ। प्रहरीले घटनासँग सम्बन्धित सबै पक्षको अनुसन्धान गरिरहेको जनाएको छ।
