काठमाडौं । पूर्वमन्त्री तथा नेपाली कांग्रेसका नेता राजेन्द्र खरेलको ८० वर्षको उमेरमा निधन भएको छ। सादगी जीवनशैलीका कारण चिनिने उनी पछिल्ला केही वर्षदेखि दम रोगबाट पीडित थिए।
काभ्रेपलाञ्चोक निवासी खरेलको गए राति काठमाडौंको बानेश्वरस्थित फ्रन्टलाइन अस्पतालमा उपचारका क्रममा निधन भएको उनका छोरा तथा पाँचखाल नगरपालिकाका प्रमुख महेश खरेलले जानकारी दिए।
वि.सं. २००३ मा काभ्रेको खरेलथोकमा जन्मिएका खरेल सुब्बा देवीप्रसाद र मुकुन्दकुमारी खरेलका माइलो सन्तान हुन्। उनले वि.सं. २०५६ को आम निर्वाचनमा काभ्रे क्षेत्रबाट प्रतिनिधिसभा सदस्यको रूपमा निर्वाचित भएका थिए।
संसदीय यात्राका क्रममा उनी शिक्षा राज्यमन्त्री तथा पछि महिला, बालबालिका तथा समाज कल्याणमन्त्रीसमेत बनेका थिए।
