काठमाडौं। नेपाल कम्युनिष्ट पार्टी (एमाले)ले पार्टी सदस्यता प्रणालीलाई पूर्ण रूपमा डिजिटल बनाउने भएको छ। पार्टीको ‘मिसन पार्टी जागरण’ अभियानअन्तर्गत बुधबार राजधानी प्रदेश कमिटीले पार्टी केन्द्रीय कार्यालय च्यासलमा आयोजना गरेको सदस्यतासम्बन्धी कार्यशालामा उक्त योजनाबारे जानकारी गराइएको हो।
पार्टीका अनुसार डिजिटल सदस्यता प्रणालीमार्फत संगठनलाई आधुनिक, व्यवस्थित र प्रभावकारी बनाउँदै जनतासँगको सम्बन्ध थप सुदृढ गर्ने लक्ष्य राखिएको छ। यस अभियानले पार्टी संगठनलाई तल्लो तहसम्म सक्रिय र गतिशील बनाउन सहयोग पुग्ने विश्वास गरिएको छ।
कार्यक्रममा पार्टी सचिव डा. राजन भट्टराईले संगठन व्यवस्थापनमा डिजिटल प्रविधिको अधिकतम उपयोग गरिने बताए। उनका अनुसार पार्टी सदस्यको विवरण, संगठनको अवस्था, सूचना प्रवाह, प्रतिवेदन व्यवस्थापन तथा जनसम्पर्कका गतिविधिलाई डिजिटल माध्यममार्फत सञ्चालन गरिनेछ। यसका लागि पार्टी पंक्तिलाई प्रविधिमैत्री बनाउन विशेष जोड दिइने उनले बताए।
त्यसैगरी पार्टी नेतृत्वले नेता तथा कार्यकर्ताको राजनीतिक चेतना र क्षमता अभिवृद्धिका लागि वडा र पालिका तहसम्म प्रशिक्षण कार्यक्रम सञ्चालन गर्ने निर्णय गरेको जनाएको छ।
अर्का पार्टी सचिव भानुभक्त ढकालले सदस्यता प्रणालीलाई डिजिटल बनाउँदा पार्टीका अभिलेख प्राकृतिक विपद् वा अन्य जोखिमबाट सुरक्षित रहने र संगठनात्मक कामलाई थप चुस्त, व्यवस्थित तथा प्रभावकारी बनाउन सहयोग पुग्ने बताए।
