काठमाडौँ । विज्ञान, प्रविधि तथा नवप्रवर्तनमन्त्री महावीर पुनले मन्त्रालयको कार्य सञ्चालनसम्बन्धी प्रस्तावित ढाँचा सार्वजनिक गरेका छन् । उनले सामाजिक सञ्जालमार्फत उक्त ढाँचालाई आधार बनाएर मन्त्रालयसम्बन्धी विधेयकको मस्यौदा तयार भइरहेको जानकारी दिएका हुन् ।
मन्त्री पुनले मन्त्रालयको संस्थागत संरचनासहितको कार्यढाँचा सार्वजनिक गर्दै वैज्ञानिक, अनुसन्धानकर्ता, नवप्रवर्तक तथा मन्त्रालयका शुभेच्छुकबाट आवश्यक सुझाव मागेका छन् । उनले ढाँचामा कुनै महत्वपूर्ण त्रुटि भए त्यसबारे जानकारी गराउन तथा सुधारका लागि ठोस र उपयोगी सुझाव दिन आग्रह गरेका छन् ।
पुनका अनुसार विज्ञान, प्रविधि तथा नवप्रवर्तन मन्त्रालयसम्बन्धी विधेयकको मस्यौदा निर्माण कार्य करिब दुई महिनादेखि जारी छ । सार्वजनिक गरिएको ढाँचालाई विधेयक निर्माणको आधारका रूपमा प्रयोग गरिने उनले बताएका छन् ।
प्रस्तावित संस्थागत संरचनामा राष्ट्रिय विज्ञान, प्रविधि तथा नवप्रवर्तन परिषद्, मन्त्रालय, परामर्श समिति, विज्ञान, प्रविधि तथा नवप्रवर्तन प्रवर्धन केन्द्र, कोषलगायत विभिन्न सम्बद्ध निकायको संरचना र भूमिकाको खाका समेटिएको छ ।
