काठमाडौं । पाकिस्तानको ब्रोड पिकमा साउन १४ गते गएको हिमपहिरोमा परी निधन भएका तीन नेपाली नागरिकको शव आज काठमाडौं ल्याइँदै छ। परराष्ट्र मन्त्रालयका अनुसार किली पेम्बा शेर्पा ‘किलु’, ग्यालु शेर्पा र निमा शेर्पाको शव कतार एयरवेजको उडानमार्फत आज अपराह्न ४ः४५ बजे काठमाडौं आइपुग्नेछ।
सोही दुर्घटनामा ज्यान गुमाएका पुरबहादुर गुरुङ ‘युक्त’को शव भने साउन २१ गते नै नेपाल ल्याइसकिएको छ।
हिमपहिरोमा परी ज्यान गुमाएका अन्य आरोहीमध्ये दुर्घटनास्थलबाट एक नेपाली, एक पाकिस्तानी र एक अमेरिकी नागरिकको शव अझै फिर्ता ल्याउन बाँकी रहेको परराष्ट्र मन्त्रालयले जनाएको छ।
