काठमाडौँ । प्रतिनिधिसभाको बैठक आज दिउँसो १ बजे सिंहदरबारस्थित संघीय संसद् भवनमा बस्दैछ। बैठकमा ‘खानी तथा खनिज पदार्थ विधेयक, २०८३’ माथि विचार गरियोस् भन्ने प्रस्ताव पेस गर्ने कार्यसूची रहेको छ।
संघीय संसद् सचिवालयका अनुसार उद्योग, वाणिज्य तथा आपूर्तिमन्त्री गौरी कुमारीले उक्त विधेयकमाथि विचार गरियोस् भन्ने प्रस्ताव सदनमा प्रस्तुत गर्ने सम्भावित कार्यसूची छ।
प्रस्तावित विधेयकले खानी तथा खनिज पदार्थको अन्वेषण, उत्खनन, व्यवस्थापन तथा नियमनलाई व्यवस्थित गर्ने लक्ष्य राखेको छ। विधेयकमार्फत संघीय संरचनाअनुसार खनिज क्षेत्रसम्बन्धी अधिकार र जिम्मेवारी स्पष्ट पार्ने तथा अवैध उत्खनन र राजस्व चुहावट नियन्त्रण गर्ने व्यवस्था प्रस्ताव गरिएको छ।
