काठमाडौँ । कास्कीको अन्नपूर्ण गाउँपालिकाले चालु आर्थिक वर्षदेखि पालिकाभित्रका सबै नागरिकलाई निःशुल्क स्वास्थ्य बिमाको दायरामा ल्याउने भएको छ।
यसअघि दलित, अपाङ्गता भएका तथा अशक्त नागरिकको निःशुल्क स्वास्थ्य बिमा गर्दै आएको गाउँपालिकाले अब कार्यक्रम विस्तार गरी सबै नागरिकलाई समेट्न लागेको हो। स्वास्थ्य बिमाका लागि गाउँपालिकाले ९० लाख रुपैयाँ बजेट विनियोजन गरेको छ।
गाउँपालिकाका अध्यक्ष विष्णुबहादुर केसीका अनुसार अन्नपूर्णमा करिब ६ हजार ५०० घरधुरी छन्। सबै नागरिकको स्वास्थ्य बिमाका लागि विनियोजित रकम अपुग भए आवश्यकताअनुसार थप बजेट व्यवस्था गरिने उनले बताए।
स्वास्थ्यलाई मौलिक हकका रूपमा सुनिश्चित गरिएको भन्दै अध्यक्ष केसीले नागरिकको स्वास्थ्य सेवामा पहुँच विस्तार गर्न कार्यक्रम अघि बढाइएको बताए। उनका अनुसार निःशुल्क स्वास्थ्य बिमाले न्यून आय भएका परिवारलाई समयमै उपचार सेवा लिन सहज बनाउनुका साथै उपचारमा लाग्ने आर्थिक भार घटाउनेछ।
गाउँपालिकाले स्वास्थ्य बिमासँगै अन्नपूर्ण आधारभूत अस्पतालको सेवा विस्तार गर्ने तयारीसमेत गरेको छ। अस्पतालमा चिकित्सकको उपलब्धता बढाउनुका साथै स्वास्थ्य परीक्षणका लागि आवश्यक उपकरण थप गर्दै लगिएको प्रमुख प्रशासकीय अधिकृत चिरञ्जीवी बरालले जानकारी दिए।
स्थानीय नागरिकको स्वास्थ्य उपचारको पहिलो सेवा बिन्दुका रूपमा अस्पताललाई विकास गर्ने गाउँपालिकाको नीति छ। अस्पतालमा उपचार सम्भव नभएका बिरामीलाई थप उपचारका लागि पोखरा स्वास्थ्य विज्ञान प्रतिष्ठानमा सिफारिस गर्ने व्यवस्था मिलाइएको बरालले बताए।
गाउँपालिकाले सबै नागरिकलाई स्वास्थ्य सेवाको पहुँचमा ल्याउने उद्देश्यले निःशुल्क स्वास्थ्य बिमासँगै आधारभूत स्वास्थ्य सेवालाई प्रभावकारी बनाउने कार्यक्रम अघि बढाएको जनाएको छ।
