काठमाडौं । संघीय संसद्अन्तर्गत आज दुईवटा संसदीय समितिको बैठक बस्दैछ। अन्तर्राष्ट्रिय सम्बन्ध तथा पर्यटन समिति र विधायन व्यवस्थापन समितिको बैठकमा समसामयिक तथा महत्वपूर्ण विषयमा छलफल हुने कार्यसूची रहेको छ।
अन्तर्राष्ट्रिय सम्बन्ध तथा पर्यटन समितिको बैठक बिहान साढे ९ बजे बस्नेछ। बैठकमा रसुवामा आएको बाढी तथा पहिरोका कारण पर्यटन क्षेत्रमा परेको प्रभावका विषयमा छलफल गरिने कार्यसूची रहेको छ। बाढीपहिरोका कारण पर्यटन पूर्वाधार, पर्यटकीय गन्तव्य तथा पर्यटन व्यवसायमा परेको असरका विषयमा समितिले छलफल गर्नेछ।
विधायन व्यवस्थापन समितिको बैठक मध्याह्न सवा १२ बजे बस्नेछ। बैठकमा ‘नेपाल विशेष सेवा ऐन, २०४२ को साबिकको व्यवस्था जगाउनेसम्बन्धी विधेयक, २०८३’ माथि दफावार छलफल गर्ने कार्यसूची रहेको छ। समितिले विधेयकका विभिन्न प्रावधानमाथि छलफल गरी आवश्यक सुझाव तथा संशोधनका विषयमा समेत विचार गर्नेछ।
