काठमाडौं । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले राष्ट्रिय विपत्तिको अवस्थामा सबै पक्षलाई विश्वासमा लिएर अघि बढ्न सरकारलाई आग्रह गरेका छन्।

बुधबार प्रतिनिधिसभाको बैठकमा दलीय आधारमा मन्तव्य राख्दै प्रचण्डले संकटका बेला सरकार जनताको साथमा उभिनुपर्ने बताए। उनले भोटेकोशी बाढीबाट उत्पन्न विपत्तिको सामना गर्न तीनै तहका सरकार, जनप्रतिनिधि, नागरिक समाज तथा आमनागरिकलाई विश्वासमा लिएर परिचालन गर्नुपर्नेमा जोड दिए।

“भोटेकोशी महाविपत्तिको सामना गर्न सबै तहको सरकार, जनप्रतिनिधि, नागरिक समाज र आमनागरिकलाई विश्वासमा लिएर परिचालन गर्नुपर्छ,” उनले भने, “सुरक्षाकर्मी परिचालनले मात्रै पुग्दैन, सँगसँगै जनपरिचालन पनि गर्नुपर्छ।”

प्रचण्डले संघ, प्रदेश र स्थानीय सरकारसँगै जनप्रतिनिधिलाई समेत विपद्का बेला थप सक्रिय बनाउनुपर्ने बताए।

२०७२ सालको भूकम्पलगायत राष्ट्रिय संकटका बेला आफूहरूले विपक्षीका रूपमा सरकारलाई साथ दिएको स्मरण गर्दै उनले बाढीपछि खोज, उद्धार र राहत वितरणमा सरकारले गम्भीरतापूर्वक ध्यान दिनुपर्ने बताए।

“बाढीपछिको उद्धारमा कमी–कमजोरी देखिए त्यसलाई सच्याएर जानुपर्छ। राहत, तत्काल पुनःस्थापना र दीर्घकालीन पुनर्निर्माणमा सरकार गम्भीर बन्नुपर्छ,” प्रचण्डले भने।

राष्ट्रिय एकता, समन्वय र सहकार्यको नेतृत्व गर्ने अवसर सरकारसँग रहेको भन्दै उनले यसतर्फ सरकार र सत्तारुढ राष्ट्रिय स्वतन्त्र पार्टी गम्भीर हुनुपर्ने बताए।

प्रचण्डले जलवायु परिवर्तनका कारण हिमाली क्षेत्रमा जोखिम बढ्दै गएको उल्लेख गर्दै नेपालले अन्तर्राष्ट्रिय मञ्चमा जलवायु न्यायको विषयलाई थप सशक्त रूपमा उठाउनुपर्नेमा समेत जोड दिए।

Read More

काठमाडौं । रसुवाको भोटेकोशी बाढीबारे प्रतिनिधिसभाले विशेष प्रस्ताव सर्वसम्मतिले पारित गरेको छ।

बुधबार बसेको प्रतिनिधिसभाको बैठकमा सभामुख डीपी अर्यालले प्रस्तुत गरेको विशेष प्रस्तावलाई सांसदहरूले सर्वसम्मतिले पारित गरेका हुन्।

विशेष प्रस्तावमार्फत राष्ट्रिय शोकको घडीमा ऐक्यबद्धता कायम गर्दै तीनै तहका सरकार, राजनीतिक दल, नागरिक समाज तथा राज्यका सबै संयन्त्रलाई परिचालन गर्न सरकारलाई आग्रह गरिएको छ।

प्रस्तावमा बाढी प्रभावित क्षेत्रमा खोज तथा उद्धार कार्यलाई प्रभावकारी बनाउन, विस्थापित नागरिकको पुनर्स्थापना गर्न तथा घाइतेहरूको उचित उपचारको व्यवस्था मिलाउन सरकारलाई निर्देशन दिइएको छ।

सभामुख अर्यालले बाढीमा ज्यान गुमाएकाहरूप्रति श्रद्धाञ्जली व्यक्त गर्दै शोकसन्तप्त परिवारप्रति समवेदना व्यक्त गरे। उनले विस्थापित नागरिकको उचित व्यवस्थापन तथा घाइतेहरूको शीघ्र स्वास्थ्य लाभको कामना गर्दै दिवंगत आत्माको चिरशान्तिको कामना पनि गरे।

भदौ १० गते भोटेकोशी हुँदै त्रिशूली नदीमा आएको विनाशकारी बाढीका कारण रसुवा, नुवाकोट, धादिङलगायत क्षेत्रमा ठूलो जनधनको क्षति भएको छ। बाढीपछि प्रभावित क्षेत्रमा खोज तथा उद्धार, राहत र पुनर्स्थापनाका काम जारी छन्।

Read More

काठमाडौं । प्रधानमन्त्री वालेन्द्र शाहले पृथ्वी राजमार्गअन्तर्गत धादिङको कृष्णभिरमा अवरुद्ध सडक यही महिनाभित्र सञ्चालनमा ल्याइने बताएका छन्।

बुधबार प्रतिनिधिसभाको बैठकलाई सम्बोधन गर्दै प्रधानमन्त्री शाहले मुग्लिन–नौबिसे खण्डअन्तर्गत कृष्णभिरमा पहिरोका कारण अवरुद्ध सडकलाई यही महिनाभित्र सञ्चालनमा ल्याउने जानकारी दिएका हुन्।

त्रिशूली नदीको कटानका कारण सडक भासिएपछि कृष्णभिरमा पहिरो खसेको थियो। त्यसपछि पृथ्वी राजमार्गको उक्त खण्डमा यातायात पूर्ण रूपमा प्रभावित हुँदै आएको छ।

सडक सञ्चालनमा ल्याउन लामो समय लाग्न सक्ने अनुमान भइरहेका बेला प्रधानमन्त्री शाहले पहिरो पन्छाएर तथा सडक पुनर्निर्माण गरी यही महिनाभित्र यातायात सञ्चालन गर्ने बताएका हुन्।

प्रधानमन्त्री शाहले प्रतिनिधिसभामा भोटेकोशी हुँदै त्रिशूली नदीमा आएको बाढीबाट रसुवा, नुवाकोट र धादिङमा भएको ठूलो जनधनको क्षतिबारे समेत जानकारी गराएका थिए।

उनले बाढीपछि सरकारले सञ्चालन गरिरहेको खोज तथा उद्धार, राहत र पुनर्निर्माणका प्रयासबारे पनि संसद्लाई जानकारी गराएका छन्।

Read More

काठमाडौं । प्रधानमन्त्री वालेन्द्र शाहले बुधबार प्रतिनिधिसभाको बैठकलाई सम्बोधन गर्ने भएका छन्।

भोटेकोशी बाढीबाट भएको क्षति, उद्धार तथा राहतलगायत विषयमा प्रधानमन्त्री शाहले प्रतिनिधिसभालाई जानकारी दिने कार्यक्रम रहेको सत्तारुढ राष्ट्रिय स्वतन्त्र पार्टी (रास्वपा)का सचेतक प्रकाशचन्द्र परियारले जानकारी दिए।

प्रतिनिधिसभाको बैठक बुधबार दिउँसो १ बजे बस्दैछ। परियारका अनुसार बैठकमा प्रधानमन्त्रीले समसामयिक विषयसहित भोटेकोशी बाढीको अवस्थाबारे संसद्लाई जानकारी गराउनेछन्।

‘प्रधानमन्त्रीले आज संघीय संसद्को प्रतिनिधिसभालाई सम्बोधन गर्नुहुने कार्यक्रम रहेको छ,’ परियारले भने।

१० भदौपछि प्रतिनिधिसभाको बैठक बुधबार पहिलोपटक बस्न लागेको हो।

बैठकमा सभामुख डीपी अर्यालले भोटेकोशी बाढीका सम्बन्धमा विशेष प्रस्ताव पेस गर्ने कार्यक्रमसमेत रहेको छ। प्रस्तावमाथि विभिन्न राजनीतिक दलका नेताहरूले धारणा राख्नेछन्।

भोटेकोशी बाढीबाट रसुवा, नुवाकोट, धादिङलगायत जिल्लामा ठूलो जनधनको क्षति भएपछि उद्धार, राहत तथा पुनर्स्थापनाका विषयमा संसद्मा छलफल हुन लागेको हो।

Read More

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछाने र नेपालका लागि चिनियाँ राजदूत माओ मिङबीच भेटवार्ता भएको छ।

लामिछानेको बूढानीलकण्ठस्थित निवासमा बुधबार दिउँसो भएको भेटमा राजदूत माओले भोटेकोशी बाढीबाट भएको जनधनको क्षतिप्रति दुःख व्यक्त गरेका छन्।

भेटमा उनले खोज तथा उद्धारदेखि पुनर्निर्माणसम्मका काममा चीन नेपालसँगै रहेको बताए। नेपाललाई आवश्यक जुनसुकै सहयोग उपलब्ध गराउन चीन तयार रहेको जानकारी पनि उनले गराएको लामिछानेको सचिवालयले जनाएको छ।

राजदूत माओले विपद् लगत्तैदेखि चीनले उद्धारकर्मी, डीएनए विशेषज्ञलगायत आवश्यक जनशक्ति तथा सहयोग नेपाल पठाउँदै आएको र आवश्यकता रहेसम्म सहयोग जारी राख्ने बताएका थिए।

भेटमा लामिछानेले विपद्का समयमा चीनले गर्दै आएको सहयोगप्रति आभार व्यक्त गरे। उनले नेपालको विपद् जोखिम न्यूनीकरण तथा व्यवस्थापनका क्षेत्रमा चीनको आर्थिक तथा प्राविधिक सहयोग महत्वपूर्ण रहेको बताउँदै आगामी दिनमा थप सहकार्यका लागि आग्रह गरे।

भेटमा नेपालमा विपद् जोखिम न्यूनीकरण, उद्धार, राहत तथा पुनर्निर्माणका क्षेत्रमा नेपाल–चीन सहकार्यलाई थप प्रभावकारी बनाउने विषयमा समेत छलफल भएको बताइएको छ।

Read More

काठमाडौं । पृथ्वी राजमार्गअन्तर्गत धादिङको गजुरी गाउँपालिका–३ स्थित परेवाभिरमा वैकल्पिक ट्रयाक खोलिएको छ।

त्रिशूली नदीको बाढीले सडक कटान गरेपछि उक्त स्थानमा सडक भासिएर यातायात पूर्ण रूपमा अवरुद्ध भएको थियो। अहिले सोही स्थानमा वैकल्पिक मार्ग निर्माण गरी सवारी सञ्चालनमा ल्याइएको जिल्ला प्रहरी कार्यालय धादिङले जनाएको छ।

प्रहरीका अनुसार करिब १०० मिटर लामो नयाँ ट्रयाक खोलिएको हो। ट्रयाक खुलेसँगै उक्त सडकखण्डमा सवारी साधन सामान्य रूपमा सञ्चालन हुन थालेका छन्। यद्यपि, नयाँ ट्रयाकमा समेत यात्रा जोखिमपूर्ण रहेकाले सावधानी अपनाउन प्रहरीले आग्रह गरेको छ।

यसअघि त्रिशूली नदीको बाढीका कारण पृथ्वी राजमार्गअन्तर्गत कृष्णभिरमा समेत सडक भासिएपछि यातायात पूर्ण रूपमा अवरुद्ध भएको थियो।

राजमार्गका विभिन्न स्थानमा बाढीले क्षति पुर्‍याएपछि काठमाडौं आउजाउका लागि वैकल्पिक मार्गका रूपमा चितवनको नारायणगढ हुँदै हेटौंडा–काठमाडौं जोड्ने तीनवटा रुट प्रयोग भइरहेका छन्।

Read More

काठमाडौं । काठमाडौंबाट मुग्लिनतर्फ जाने सवारी साधनमध्ये पेट्रोलियम पदार्थ बोकेका र दुई पाङ्ग्रे सवारीबाहेक अन्य सवारीका लागि नागढुंगा सुरुङमार्ग सञ्चालनमा ल्याइएको छ।

नागढुंगा–मुग्लिन सडकखण्डअन्तर्गत पातले वनमा सडक भासिएपछि केही समयदेखि आवागमन प्रभावित भएको थियो। अहिले पेट्रोलियम पदार्थ बोकेका सवारी साधन र मोटरसाइकललाई भने भासिएको स्थानबाटै एकतर्फी आवागमनको व्यवस्था मिलाइएको सडक विभागले जनाएको छ।

विभागका अनुसार सडक भासिएको स्थानमा प्राविधिक अध्ययन गरेपछि मात्र मर्मतको काम अघि बढाइनेछ। अध्ययनपछि सडक पूर्ण रूपमा सञ्चालनमा ल्याउने विषयमा आवश्यक निर्णय गरिने विभागले जनाएको छ।

Read More

काठमाडौं । रसुवाको भोटेकोशी नदीमा १० भदौमा आएको विनाशकारी बाढीबाट प्रभावित स्थानीय तहलाई राहत तथा विपद् व्यवस्थापनका लागि थप ६ करोड ७५ लाख रुपैयाँ उपलब्ध गराउने निर्णय भएको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणको बैठकले यसअघि उपलब्ध गराइएको ६ करोड ७५ लाख रुपैयाँमा थप ६ करोड ७५ लाख रुपैयाँ विनियोजन गर्ने निर्णय गरेको हो।

थप रकम विनियोजन भएसँगै बाढी प्रभावित स्थानीय तहका लागि उपलब्ध गराइने कुल रकम १३ करोड ५० लाख रुपैयाँ पुगेको छ।

निर्णयअनुसार रसुवाका चार स्थानीय तहलाई ४ करोड ५० लाख रुपैयाँ उपलब्ध गराइनेछ। उत्तरगया गाउँपालिकालाई १ करोड ५० लाख, गोसाइँकुण्ड गाउँपालिकालाई २ करोड, कालिका गाउँपालिकालाई ६० लाख र आमाछोदिङमो गाउँपालिकालाई ४० लाख रुपैयाँ छुट्याइएको छ।

त्यस्तै, नुवाकोटका चार स्थानीय तहलाई ६ करोड रुपैयाँ विनियोजन गरिएको छ। विदुर नगरपालिकालाई ३ करोड, बेलकोटगढी नगरपालिकालाई १ करोड ५० लाख, किस्पाङ गाउँपालिकालाई ५० लाख र तारकेश्वर गाउँपालिकालाई १ करोड रुपैयाँ उपलब्ध गराइनेछ।

धादिङका चार स्थानीय तहका लागि १ करोड ८० लाख रुपैयाँ छुट्याइएको छ। गल्छी गाउँपालिकालाई ६० लाख, सिद्धलेक गाउँपालिकालाई ४० लाख, गजुरी गाउँपालिकालाई ४० लाख र बेनिघाट रोराङ गाउँपालिकालाई ४० लाख रुपैयाँ दिइनेछ।

यसैगरी, गोरखाको गण्डकी गाउँपालिकालाई ४० लाख तथा तनहुँका देवघाट र आँबुखैरेनी गाउँपालिकालाई ४०–४० लाख रुपैयाँ उपलब्ध गराउने निर्णय भएको छ।

भोटेकोशी बाढीबाट रसुवा, नुवाकोट, धादिङलगायत जिल्लामा ठूलो जनधनको क्षति भएको छ। बाढीपछि प्रभावित क्षेत्रमा राहत, खोज तथा उद्धार र पुनर्स्थापनाका काम जारी छन्।

निर्णय :

हेर्नुहोस् निर्णय :

Read More