काठमाडौं । रसुवा भोटेकोशी बाढीपछि उद्धार तथा खोजतलासका क्रममा भेटिएका र परीक्षण तथा व्यवस्थापनका लागि पोखरा ल्याइएका १०२ शवमध्ये २१ शवको सनाखत गरी परिवारलाई बुझाइएको छ। मंगलबार पहिचान खुलेका शव सम्बन्धित परिवारलाई हस्तान्तरण गरिएको हो।
पहिचान हुन नसकेका ७६ शवलाई पोखरा–१६ माथिल्लो दीपस्थित सिसौघारीमा सुरक्षित रूपमा व्यवस्थापन गरिएको जिल्ला प्रशासन कार्यालयका सहायक प्रमुख जिल्ला अधिकारी चित्राङ्गत बरालले जानकारी दिए। उनका अनुसार पोखरा स्वास्थ्य विज्ञान प्रतिष्ठानको शवगृहमा अझै पाँच शव रहेका छन्।
पहिचान हुन बाँकी शवको थप परीक्षण
शवगृहमा रहेका पाँच शवमध्ये एकभन्दा बढी परिवारले तस्बिर हेरेर आफ्नो आफन्त भएको दाबी गरेकाले थप परीक्षण गर्न बाँकी रहेको बरालले बताए। पहिचान सुनिश्चित गर्न सबै शवको डिएनए नमुना संकलन गरिएको उनले जानकारी दिए।
“लामो समय शवगृहमा राख्दा दुर्गन्ध फैलनाका साथै महामारीको जोखिम हुने भएकाले सुरक्षित रूपमा शव व्यवस्थापन गरिएको हो। सबै शवको डिएनए लिएका छौँ। परिवारको डिएनए मिलेको अवस्थामा सम्बन्धित परिवारलाई हस्तान्तरण गर्न सकिन्छ,” बरालले भने।
विभिन्न जिल्लाबाट ल्याइएका शव व्यवस्थापन
धादिङबाट २२, गोरखाबाट सात, नवलपरासीबाट २५ र तनहुँबाट प्राप्त २२ शव व्यवस्थापन गरिएको प्रशासनले जनाएको छ। बाढी तथा पहिरो प्रभावित क्षेत्रबाट उद्धारका क्रममा भेटिएका शवलाई परीक्षण तथा पहिचानका लागि पोखरा ल्याइएको थियो।
सिसौघारीमा सुरक्षित रूपमा शव व्यवस्थापन
पहिचान हुन नसकेका शवलाई गहिरो खाडलमा हावा नछिर्ने प्लास्टिकको झोलामा राखेर सुरक्षित रूपमा व्यवस्थापन गरिएको छ। प्रत्येक शवलाई छुट्टाछुट्टै सङ्केत नम्बर दिई माटोले पुरिएको छ।
शव व्यवस्थापन गरिसकेपछि प्रत्येक स्थानमा गमला राखेर सम्बन्धित शवको सङ्केत नम्बर उल्लेख गरिएको ‘स्ट्यान्ड’ बनाइएको छ। यसबाट भविष्यमा डिएनए परीक्षण वा अन्य प्रक्रियाबाट पहिचान खुलेमा सम्बन्धित शवको स्थान पहिचान गर्न सहज हुने प्रशासनले जनाएको छ।
