काठमाडौं । रसुवाको भोटेकोशीमा आएको विनाशकारी बाढीका कारण बुधबार बिहान ५ बजेसम्म एक हजार १२७ जनाको शव फेला परेको छ। नेपाल प्रहरीका अनुसार फेला परेका शवमध्ये रसुवामा ४५, नुवाकोटमा १५५, धादिङमा ५९, चितवनमा ३४८, गोरखामा ६६, तनहुँमा ३८, नवलपरासी पूर्वमा २१७, नवलपरासी पश्चिममा १९० र भारतमा नौ जना रहेका छन्।
बाढीपछि विभिन्न जिल्लामा शव फेला पर्ने क्रम जारी रहेको छ। उद्धार तथा खोजतलासका क्रममा फेला परेका शवको पहिचान, कानुनी प्रक्रिया पूरा गर्ने तथा परिवारलाई हस्तान्तरण गर्ने कामसमेत अघि बढिरहेको प्रहरीले जनाएको छ।
एक हजार ११३ शवको लाशजाँच मुचुल्का
प्रहरीका अनुसार फेला परेका एक हजार १२७ शवमध्ये एक हजार ११३ वटाको लाशजाँच मुचुल्का सम्पन्न भएको छ। हालसम्म ९५ वटा शव पहिचान तथा आवश्यक कानुनी प्रक्रिया पूरा गरी आफन्तलाई हस्तान्तरण गरिएको छ।
पहिचान हुन नसकेका ९११ शवको विवरण नेपाल प्रहरीको वेबसाइटमा समेत सार्वजनिक गरिएको छ। शवको पहिचान खुलाउन विभिन्न माध्यमबाट विवरण संकलन तथा आवश्यक प्रक्रिया अघि बढाइएको प्रहरीले जनाएको छ।
सात हजारभन्दा बढी प्रहरी परिचालन
बाढी प्रभावित क्षेत्रमा उद्धार, खोजी, राहत वितरण तथा शव व्यवस्थापनलगायतका कार्यका लागि हालसम्म सात हजार ९१२ जना प्रहरी कर्मचारी परिचालन गरिएको छ। बाढी प्रभावित क्षेत्रबाट हालसम्म ६ हजार ५४१ जनाको उद्धार गरिएको प्रहरीले जनाएको छ।
बेपत्ता भएका चार हजार ८५८ जनाको खोजी कार्यसमेत जारी रहेको छ। प्रभावित क्षेत्रमा सुरक्षाकर्मीले सम्भावित स्थानमा खोजतलासलाई निरन्तरता दिइरहेका छन्।
जोखिममा रहेका परिवारको स्थानान्तरण
प्रहरीले बाढीको जोखिममा रहेका विभिन्न जिल्लाका परिवारलाई सुरक्षित स्थानमा स्थानान्तरण गरिरहेको जनाएको छ। प्रभावित नागरिकको सुरक्षालाई प्राथमिकतामा राख्दै स्थानीय तह, अन्य सरकारी निकाय तथा स्थानीयवासीसँग समन्वय गरी उद्धार तथा खोजी कार्य भइरहेको छ।
अवरुद्ध सडक खुलाउने काम जारी
बाढी तथा पहिरोका कारण विभिन्न स्थानमा अवरुद्ध भएका सडक तथा बाटो खुलाउने कामसमेत भइरहेको प्रहरीले जनाएको छ। उद्धार टोलीको आवागमन तथा राहत सामग्री प्रभावित क्षेत्रमा पुर्याउन सहज होस् भन्ने उद्देश्यले अवरुद्ध सडक सञ्चालनमा ल्याउने प्रयास भइरहेको छ।
