काठमाडौँ । रौतहट जिल्ला अदालत गौरमा कार्यरत डिठ्ठा लवकुमार सिंहविरुद्ध घुस लिएको आरोपमा मुद्दा दायर गरिएको छ ।

अख्तियार दुरुपयोग अनुसन्धान आयोगको हेटौँडा कार्यालयबाट खटिएको टोलीले सेवाग्राहीसँग ५० हजार घुस लिइसकेको अवस्थामा उनलाई नियन्त्रणमा लिएको थियो । अदालतको फैसला अनुसार दर्ता-खारेजी पूर्जी जारी गरी रोक्का रहेको जग्गा फुकुवा गराइदिने क्रममा उनले घुस मागेको उजुरी परेपछि अनुसन्धान सुरु गरिएको थियो ।

अनुसन्धानका क्रममा डिठ्ठा सिंहले विभिन्न बहाना बनाएर सेवाग्राहीलाई दुःख दिँदै बार्गेनिङ गरी ५० हजार घुस लिएको पुष्टि भएको आयोगले जनाएको छ ।

उक्त कसुरमा भ्रष्टाचार निवारण ऐन २०५९ अनुसार ५० हजार रुपैयाँ बिगो कायम गरी कैद तथा जरिवाना सजाय माग गर्दै आज विशेष अदालत काठमाडौँमा आरोपपत्र दायर गरिएको आयोगले जनाएको छ ।

Read More

काठमाडौँ । प्रमुख तेल उत्पादक राष्ट्रहरूको समूह ओपेक प्लसले आगामी जुन महिनादेखि कच्चा तेल उत्पादनमा सामान्य वृद्धि गर्ने सहमति गरेको छ। वैश्विक ऊर्जा बजारमा देखिएको अस्थिरता व्यवस्थापन गर्ने उद्देश्यसहित गरिएको यस निर्णयलाई आपूर्ति सन्तुलन कायम राख्ने प्रयासका रूपमा लिइएको छ।

भर्चुअल माध्यमबाट सम्पन्न बैठकपछि जारी संयुक्त सहमतिअनुसार साउदी अरेबिया, रुस, इराक, कुवेत, काजाखस्तान, अल्जेरिया र ओमानले दैनिक करिब एक लाख ८८ हजार ब्यारेल उत्पादन बढाउने निर्णय गरेका छन्।

यद्यपि, विश्लेषकहरूले यस कदमलाई सीमित प्रभावकारी मानिरहेका छन्, किनभने मध्यपूर्वमा बढ्दो तनाव र विशेषगरी होर्मुज जलडमरूमध्यमा देखिएको अवरोधका कारण आपूर्ति शृंखलामा पहिले नै दबाब सिर्जना भएको छ। सो मार्गबाट विश्वको ठूलो हिस्सा—करिब २० प्रतिशत तेल तथा ग्यास आपूर्ति—ढुवानी हुँदै आएको छ। हालको अवरोधका कारण लाखौँ ब्यारेल तेल अन्तर्राष्ट्रिय बजारमा पुग्न नसकेको उल्लेख छ, जसले विश्वव्यापी ऊर्जा आपूर्तिमा चुनौती थपेको छ।

यसैबीच, क्षेत्रीय ऊर्जा समीकरणमा परिवर्तन ल्याउँदै संयुक्त अरब इमिरेट्स ओपेक संरचनाबाट अलग भएको छ, जसले संगठनको दीर्घकालीन संरचनामा प्रभाव पार्ने अनुमान गरिएको छ। ओपेकले विश्वको करिब ४० प्रतिशत कच्चा तेल उत्पादन गर्दै आएको छ भने रुस ‘ओपेक प्लस’ सहकार्य ढाँचामार्फत यस प्रणालीसँग आबद्ध छ।

नयाँ व्यवस्थाअनुसार सदस्य राष्ट्रहरूले बजार अवस्थाको निरन्तर मूल्याङ्कन गर्ने र मासिक रूपमा समीक्षा बैठक बस्ने सहमति गरेका छन्। आगामी बैठक जुन ७ मा हुने तय गरिएको छ, जहाँ उत्पादन नीति र बजार समायोजनबारे थप निर्णय लिइनेछ।

होर्मुज क्षेत्रमा देखिएको अवरोध र क्षेत्रीय राजनीतिक तनावबीच ऊर्जा बजारमा स्थिरता कायम राख्ने उद्देश्यसहित ओपेक प्लसको पछिल्लो निर्णय आएको मानिएको छ।

Read More

काठमाडौँ ।  एसिया–प्रशान्त क्षेत्रमा ऊर्जा र डिजिटल पूर्वाधारलाई रूपान्तरण गर्ने उद्देश्यसहित एसियाली विकास बैंक (एडीबी) ले सन् २०३५ सम्म करिब ७० अर्ब अमेरिकी डलर बराबरको लगानी परिचालन गर्ने घोषणा गरेको छ। उज्बेकिस्तानको समरकन्दमा सम्पन्न एडीबीको ५९औँ वार्षिक बैठकमा यो योजना सार्वजनिक गरिएको हो।

बैठकका क्रममा एडीबी अध्यक्ष मासातो कान्दाले क्षेत्रीय सहकार्यलाई सुदृढ बनाउने उद्देश्यसहित दुई प्रमुख रणनीतिक कार्यक्रम अघि सारेका छन्, जसले ऊर्जा सञ्जाल एकीकरण र डिजिटल पहुँच विस्तारलाई केन्द्रमा राख्छ।

ऊर्जा सम्बन्धी पहलअन्तर्गत सदस्य राष्ट्रहरूबीच विद्युत् सञ्जाल आपसमा जोड्ने योजना समेटिएको छ। यसले सीमापार ऊर्जा व्यापारलाई सहज बनाउँदै एक देशमा उत्पादन भएको अतिरिक्त विद्युत् अर्को देशमा आपूर्ति गर्न सकिने व्यवस्था गर्नेछ। जलविद्युत् तथा सौर्य ऊर्जाको अधिकतम उपयोगमार्फत आपूर्ति असन्तुलन घटाउने र लागत दक्षता बढाउने लक्ष्य राखिएको छ। प्रसारण संरचना विस्तार, सबस्टेशन आधुनिकीकरण, ऊर्जा भण्डारण प्रविधि र ग्रिड सुधार यस योजनाका प्रमुख प्राथमिकतामा छन्।

त्यसैगरी, डिजिटल पूर्वाधार विस्तारलाई दोस्रो प्रमुख स्तम्भका रूपमा अघि सारिएको छ। यस कार्यक्रमले उच्चगतिको इन्टरनेट पहुँच, डेटा पूर्वाधार विकास र सूचना प्रणालीको आधुनिकीकरणमार्फत क्षेत्रीय डिजिटल अर्थतन्त्रलाई मजबुत बनाउने अपेक्षा गरिएको छ। ग्रामीण तथा दुर्गम क्षेत्रसम्म डिजिटल पहुँच विस्तार हुँदा शिक्षा, स्वास्थ्य, व्यापार र सार्वजनिक सेवा प्रवाहमा उल्लेखनीय सुधार आउने अनुमान गरिएको छ। कृत्रिम बुद्धिमत्ताजस्ता प्रविधिको उपयोगमार्फत रोजगारी सिर्जना र आर्थिक गतिविधि विस्तारमा समेत योगदान पुग्ने बताइएको छ।

दुवै पहललाई क्षेत्रीय आर्थिक एकीकरण, दिगो विकास र दीर्घकालीन समृद्धिको आधारका रूपमा लिइएको छ। एडीबीले ऊर्जा र डिजिटल पहुँचलाई आगामी दशकको विकास यात्राका मुख्य चालक तत्वका रूपमा परिभाषित गरेको छ।

सन् १९६६ मा स्थापना भएको एडीबीले एसिया–प्रशान्त क्षेत्रमा गरिबी न्यूनीकरण, पूर्वाधार विकास र आर्थिक वृद्धि प्रवर्द्धनका लागि काम गर्दै आएको छ। हाल यस संस्थामा ६९ सदस्य राष्ट्र रहेका छन्, जसमध्ये बहुसंख्यक देश यसै क्षेत्रका हुन्।

Read More

काठमाडौँ । फिलिपिन्सको मध्य भागमा पर्ने समर टापुमा सोमबार गएको शक्तिशाली भूकम्पले स्थानीय बासिन्दामा त्रासको अवस्था सिर्जना गरेको छ। अमेरिकी भूगर्भीय सर्वेक्षण (USGS) का अनुसार दिउँसो २:०९ बजे (०६०९ GMT) गएको भूकम्पको तीव्रता ६.० म्याग्निच्युड मापन गरिएको हो।

भूकम्पको केन्द्र समर प्रान्तअन्तर्गत सान जुलियन तटीय सहरबाट करिब नौ किलोमिटर टाढा, करिब ७३.३ किलोमिटर गहिराइमा रहेको बताइएको छ। अपेक्षाकृत गहिरो केन्द्रका कारण सतहमा ठूलो संरचनात्मक क्षति हुनबाट जोगिएको प्रारम्भिक आकलन गरिएको छ।

स्थानीय सुरक्षा अधिकारीका अनुसार कम्पन आकस्मिक र अत्यन्तै तीव्र रूपमा महसुस गरिएको थियो। प्रहरी कार्यालयभित्र छतसँग जोडिएको एक संरचनात्मक बीम भाँचिएको र केही कार्यालय सामग्रीहरू हल्लिएको बताइएको छ। सम्भावित परकम्पको जोखिमलाई ध्यानमा राख्दै सुरक्षाकर्मी तथा कर्मचारीहरू खुला स्थानमा रहँदै सतर्कता अपनाइरहेका छन्।

हालसम्म मानवीय क्षति वा गम्भीर घाइतेको आधिकारिक विवरण प्राप्त नभएको जनाइएको छ। यद्यपि भूकम्पपछि स्थानीय क्षेत्रमा भय र असुरक्षाको वातावरण कायम रहेको बताइएको छ।

भूकम्पीय दृष्टिले फिलिपिन्स विश्वका अत्यन्त संवेदनशील क्षेत्रमध्ये एक मानिन्छ, किनकि यो प्रशान्त महासागरको ‘रिङ अफ फायर’ क्षेत्रमा अवस्थित छ, जहाँ टेक्टोनिक प्लेटहरूको सक्रिय गतिशीलताका कारण बारम्बार भूकम्पीय गतिविधि हुने गर्दछ।

गत वर्षहरूमा पनि देशका विभिन्न भागमा शक्तिशाली भूकम्पहरूले जनधनको क्षति पुर्‍याएका घटनाहरू सार्वजनिक भएका थिए, जसले फिलिपिन्समा निरन्तर भूकम्पीय जोखिम कायम रहेको संकेत गर्दछ।

Read More

काठमाडौँ । अनिल योञ्जनको निर्माण तथा निर्देशनमा तयार भएको नेपाली फिल्म ‘कुस्ती’ आगामी असोज ९ गते प्रदर्शन हुने भएको छ । काठमाडौँ तथा आसपासका क्षेत्रमा छायाङ्कन गरिएको उक्त फिल्मलाई वितरक तथा प्रदर्शकको सल्लाह अनुसार असोजमा प्रदर्शन गर्ने तय गरिएको निर्देशक योञ्जनले जानकारी दिएका छन् ।

उनले भने,‘हामीले हाम्रो वितरक तथा प्रदर्शकसँग सल्लाह गरेर प्रदर्शन तय गरेका हौँ । सोही अनुसार म लगायत सम्पूर्ण टिमले फिल्मको प्राविधिक काम गरिरहेका छौँ । कुस्ती एक अर्कासँग छुट्टिएर बस्न नसक्ने र सँगै रहन पनि नसक्ने मनका भावनाहरूको मधुर यात्रा हो । भावनात्मकतासँगै हास्यरसले भरिएको यो फिल्म प्रेम कथानक कमेडी ड्रामा हो ।’

निर्देशक योञ्जनले प्रेम गरेता पनि स्वभाव भिन्नताले एकसाथ रहन सङ्घर्ष गरिरहेको जोडीको कथालाई फिल्ममा दर्शकले देख्न पाउने बताए । फिल्ममा अभिनेता धिरज मगर, मिरुना मगर, पुस्कर गुरुङ, लुनिभा तुलाधर, भोलाराज सापकोटा, दीकिला शेर्पा, रवीन्द्र झा, पुस्कर गुरुङ, राजाराम पौडेल, किरण केसी, लुनिभा तुलाधर, सूर्यमान लिम्बू, अरविन गुरुङ, रजनी गुरुङ, सुवर्ण थापा लगायतका कलाकारको अभिनय रहेको छ ।

यस वर्षको ६१औँ ‘मिस इन्डिया २०२६’ मा ‘मिस मल्टिमिडिया’ को उपाधि जित्दै टप १५ मा पर्न सफल भएकी दिकिला शेर्पाको यो डेब्यु नेपाली फिल्म हो । उनले सन् २०२१ मा ‘मिस टिन फेसन आइकन’ उपाधि जितेकी थिइन्, जसले उनको सौन्दर्य प्रतियोगिताप्रतिको लगाव र सम्भावनालाई प्रारम्भमै देखाएको थियो । दिकिला एमटीभीको चर्चित भारतीय रियालिटी शो ‘स्प्लिट्सभिल्ला’ सिजन ५ बाट चिनिएकी हुन् ।

उनले फिल्मको अन्तर्राष्ट्रिय वितरकबाट फिल्मको प्रदर्शन अधिकार खरिदका प्रस्तावहरू आइरहेको बताउदै छिटै विदेश प्रदर्शन तय गर्ने जानकारी दिए । धिरज र मिरुनाको जोडीलाई पर्दामा हेर्ने नेपालसँगै प्रवासी नेपाली पनि उत्साहित छन् । निर्देशक योञ्जनका अनुसार केही देशमा फिल्मको प्रदर्शन अधिकार सम्बन्धी छलफल अन्तिम चरणमा छ ।

फिल्ममा उमङ्ग शाहीको छायाङ्कन, मित्रदेव गुरुङको सम्पादन, दीपक शर्मा, अनिल योञ्जन, कल्याण सिंहको सङ्गीत, रेनिश फागोको कलर करेक्सन, शैलेश श्रेष्ठ र रोहित शाक्यको पार्श्व सङ्गीत र शिशिर खातीको नृत्य निर्देशन रहेको छ । डिजिटल पार्टनरको रुपमा ओएसआर डिजिटल रहेको फिल्ममा ड्रेस डिजाइन आइआइएफटी (धीरज एण्ड मिरुना) ले गरेको हो । काठमाडौँ रीच इन्टरटेनमेन्ट र एप्पल इन्टरटेनमेन्ट तथा मोफसल एफडी कम्पनिले प्रदर्शनका लागि वितरण गर्नेछ ।

Read More

काठमाडौँ । गृह मन्त्रालयले सुरक्षा निकायभित्रको सरुवा तथा बढुवा प्रणालीलाई अझ पारदर्शी, पूर्वानुमानयोग्य र नियमआधारित बनाउन आवश्यक रहेको जनाएको छ।

मन्त्रिपरिषद्को पछिल्लो निर्णयअनुसार सशस्त्र प्रहरी बल नेपालको महानिरीक्षक पदमा पदोन्नति भएका नारायणदत्त पौडेललाई आज मन्त्रालयमा आयोजित औपचारिक कार्यक्रममा दर्ज्यानी चिह्न प्रदान गरिएको हो।

सो अवसरमा गृहसचिव राजकुमार श्रेष्ठले संगठनात्मक व्यवस्थापन प्रणालीलाई सुदृढ बनाउन सके कर्मचारी व्यवस्थापनसम्बन्धी असन्तुष्टि र गुनासो न्यूनीकरण गर्न सकिने धारणा व्यक्त गरे। उनले सीमित स्रोतसाधनका बीच पनि सशस्त्र प्रहरीले देखाउँदै आएको कार्यसम्पादन सकारात्मक रहेको उल्लेख गर्दै आगामी मनसुनजन्य विपद् व्यवस्थापनमा पूर्वतयारी, उद्धार तथा राहत कार्यलाई अझ प्रभावकारी बनाउन निर्देशन दिए।

नवनियुक्त नेतृत्वले जिम्मेवारी ग्रहण गर्दै संविधान, कानुन र राष्ट्रिय हितलाई मूल आधार मानेर कार्यसम्पादन गर्ने प्रतिबद्धता व्यक्त गरेको छ। सीमा सुरक्षा सुदृढीकरणसँगै संगठनको संरचनागत तथा नीतिगत सुधारका लागि रणनीतिक योजना अघि सारिएको जानकारी दिँदै सेवा प्रवाहलाई थप समयानुकूल र नागरिककेन्द्रित बनाउने बताइएको छ।

सशस्त्र प्रहरी बलको नेतृत्वमा पुगेका पौडेलले आफ्नो सेवा यात्रा नेपाल प्रहरीबाट सुरु गरेका थिए। विभिन्न संवेदनशील सुरक्षा परिस्थितिमा काम गरेको अनुभवपछि उनी सशस्त्र प्रहरी बलमा स्थानान्तरण भई सीमा सुरक्षा, क्षेत्रीय कमान्ड तथा विशेष कार्यदलहरूमा नेतृत्वदायी भूमिकामा रहँदै आएका हुन्। उनले अन्तर्राष्ट्रिय शान्ति मिसनअन्तर्गत संयुक्त राष्ट्रसंघीय तैनाथीसमेत पूरा गरेका छन्।

कार्यक्रममा सुरक्षा निकायका उच्च पदाधिकारी, गृह मन्त्रालयका प्रतिनिधि तथा पूर्व वरिष्ठ अधिकारीहरूको उपस्थिति रहेको थियो।

Read More

काठमाडौँ । मध्यपूर्वमा जारी तनावका बीच अमेरिकी राष्ट्रपति डोनाल्ड ट्रम्प चीन भ्रमणमा जाने भएका छन्। चिनियाँ राष्ट्रपति सी जिनपिङसँग उनको भेटवार्ता मे १४ र १५ मा हुने तय भएको छ ।

रिपोर्टका अनुसार इरानसँगको लामो संघर्षका कारण चीनले वार्तामा आफ्नो स्थिति केही बलियो भएको आँकलन गरेको छ । यसअघि अप्रिलमा हुने भनिएको ट्रम्प-जिनपिङ भेट युद्धका कारण स्थगित भएको थियो ।

चीनले यो भेटलाई निकै महत्वपूर्ण अवसरका रूपमा लिएको छ । यसबाट विश्वका दुई ठूला शक्तिबीच दीर्घकालीन स्थिर सम्बन्ध निर्माण हुने अपेक्षा गरिएको छ । तर चीनभित्रै यस विषयमा फरक–फरक धारणा रहेका छन् र जटिल अवस्थाबीच कसरी अघि बढ्ने भन्नेमा स्पष्टता नभएको बताइएको छ । विशेष गरी हर्मुज क्षेत्रलाई लिएर चीन चिन्तित देखिएको छ, जहाँबाट उसले करिब एक तिहाइ तेल तथा ग्यास आपूर्ति गर्छ। यो मार्ग अवरुद्ध भए ट्रम्पको भ्रमणमा समेत प्रभाव पर्न सक्ने आकलन गरिएको छ।

ट्रम्पको भ्रमण सामान्य नभएको र यसको प्रभाव विश्व राजनीतिमा दीर्घकालीन हुन सक्ने विश्लेषण समेत गरिएको छ । यो भ्रमणको सफलता वा असफलताले भविष्यमा चीन-अमेरिका सम्बन्धको दिशा तय गर्नेछ, चाहे अमेरिकामा जुनसुकै दलको सरकार किन नआओस् ।

Read More

काठमाडौँ ।  १७ वर्षीया बालिकालाई जबरजस्ती करणी गरेको अभियोगमा बेलबारी नगरपालिका-२ बस्ने १९ वर्षीय प्रिन्स खाँ थारूलाई प्रहरीले पक्राउ गरेको छ । 

प्रिन्सले ती बालिकालाई जबरजस्ती करणी गरेको भन्ने उजुरीको आधारमा इलाका प्रहरी कार्यालय हरैँचाबाट खटिएको प्रहरीले उनलाई पक्राउ गरेको हो ।  

यस सम्बन्धमा प्रहरीले आवश्यक अनुसन्धान गरिरहेको जनाएको छ ।

Read More

काठमाडौँ । भारतको पश्चिम बङ्गालमा भारतीय जनता पार्टी बहुमततर्फ अग्रसर भएको छ ।

विधान सभाको निर्वाचनको जारी मतगणना भारतीय जनता पार्टीले १९० सिटमा अग्रता हासिल गरेको छ भने ममता बेनर्जी नेतृत्वको तृष्णमूल काँग्रेस ९१ सिटमा अगाडी रहेको छ ।

पश्चिम बङ्गालमा २९४ सिटमा बहुमतका लागि १४८ सिट आवश्यक रहेको छ ।

पश्चिम बङ्गालमा पहिलो पटक भारतीय जनता पार्टी सत्तामा आउने भएको छ । पश्चिम बङ्गालमा २०११ देखि ममता बेनर्जी सत्तामा रहेकी छन् । त्यसअघि उनले १९७७ देखि सत्तामा रहेको कम्युनिष्ट पार्टीलाई हराउदै सत्तामा आएकी थिइन् ।

Read More

काठमाडौँ । अर्थमन्त्री डा. स्वर्णिम वाग्लेले निजी क्षेत्रले अहिलेको जनमतलाई सम्मान गरेर अगाडी जानुपर्ने बताएका छन् । 

नेपाल उद्योग वाणिज्य महासंघको बार्षिक साधारणसभालाई सम्बोधन गर्दै अर्थमन्त्री डा. वाग्लेले निजी क्षेत्रले अहिलेको वास्तविकतालाई स्वीकार गरेर आफुलाई बदलेर अगाडी बढ्न आग्रह गरेका हुन् ।

अर्थमन्त्री वाग्लेले सरकार असल नियत बोकेर काम गरिरहेको भन्दै निजी क्षेत्रले पुराना कुराहरु छोडेर साथ दिनुपर्ने बताएका छन् । उनले सरकारले चुनावका समयमा सार्बजनिक गरेका बाचा पत्रमा उल्लेखित बुँदाहरु क्रमश कार्यान्वयन गर्दै जाने बताउदै सरकारले तिनै बाचाहरु लागु गर्ने स्पष्ट गरेका छन् ।

उनले कुनै किसिमको सरप्राइज नहुन आग्रह गर्दै हामीले गरेका बाचाहरुलाई पुरा गर्दै जाने बताए । उनले निजी क्षेत्रलाई आतंकित नहुन आग्रह गर्दै उद्योगी व्यवसायीको आवरणमा अपराधिक काम गर्नेहरुलाई भने सरकारले नछोड्ने स्पष्ट गरे ।

अर्थमन्त्री वाग्लेले सरकारले करिब ७ बर्षको समयमा सय बिलियन डलरको अर्थतन्त्र बनाउन गरि काम गरिरहेको बताए । उनले बजेट कस्तो आउछ भनेर गुप्तचरी गर्न नपर्ने भन्दै रास्वपाको बाचा पत्र अनुसारकै बजेट आउने स्पष्ट गरे ।

उनले हाइड्रो र पर्यटनको गीत गाएको धेरै बर्ष भएको भन्दै सबै नयाँ काम सुशासनको जगमा ल्याउने स्पष्ट गरे । उनले सहि नीति सहि नियतका साथ काम गर्ने भन्दै सरकार नडराएर काम गरिरहेको बताए ।

Read More