काठमाडौँ । राप्रपाका संसदीय दलका नेता ज्ञानेन्द्र शाहीले बिवाइडी गाडीको भन्सार छली प्रकरणमा संसदीय समिति बनाउन माग गरेका छन् ।
प्रतिनिधि सभाको बैठकमा बोल्दै सांसद शाहीले यो गम्भीर राज्यविरुद्धको अपराध भएको बताउदै आफैले छानबिन गरेर दोषी पत्ता नलाग्ने बताए । उनले संसदीय समिति छानबिन गरेर सत्य तथ्य पत्ता लगाउनुपर्ने भन्दै भन्सारको कर्मचारीलाई करको दर हेरफेरको जानकारी नहुने स्पष्ट गरे ।
काठमाडौं । श्रम संस्कृति पार्टीका अध्यक्ष हर्क साम्पाङले सीमा बारे प्रधानमन्त्रीले संसदमा दिएको अभिव्यक्ति सच्याउनु पर्ने माग दोहोराएका छन् ।
प्रतिनिधि सभाको बैठकमा बोल्दै साम्पाङले प्रधानमन्त्रीले संसदमा उपस्थित भएर वा जनतालाई सम्बोधन गरेर आफ्नो अभिव्यक्ति सच्याउनुपर्ने माग गरेका हुन् ।
उनले प्रधानमन्त्रीले आफ्नो भनाई नसच्याएसम्म अरु विषयमा प्रवेश गर्न नसकिने स्पष्ट गरेका छन् । उनले देशको भूगोल सबै भन्दा ठुलो कुरा भएकोले प्रधानमन्त्री बोलेको विषयमा अरुले जवाफ दिएर आफुहरुलाई मान्य नहुने बताए ।
काठमाडौं । विपक्षी दलहरुले प्रतिनिधि सभाको बैठकमा अवरोध जारी राख्ने बताएका छन् ।
राष्ट्रिय स्वतन्त्र पार्टी (रास्वपा) का सभापति रवि लामिछानेले बोलाएको सर्वदलीय बैठकपश्चात एमालेका प्रमुख सचेतक ऐन महरले प्रधानमन्त्रीले संसद्मा आएर जवाफ नदिएसम्म विपक्षी दलले संसद अवरोध गर्ने जानकारी गराएका हुन् ।
उनले गम्भीर विषयमा प्रधानमन्त्री बालेन शाहले राष्ट्रघाती अभिव्यक्ति दिएकाले संसदका गतिविधि अगाडि बढ्न नसक्ने बैठकमा जानकारी गराएको बताए। उहाँहरुले हामी दलमा र प्रधानमन्त्रीसँग छलफल गरेर अगाडि बढ्ने जानकारी गराएको उनको भनाई छ।
सभापति लामिछानेले बैठकमा भारत भ्रमणका बारे ब्रिफिङ गरेका थिए भने समसामयिक राजनीतिका विषयमा छलफल गरेका थिए । संसदमा जारी गतिरोध अन्त्यका लागि समेत छलफल भएको थियो । बैठकमा लामिछानेले आवश्यक परे सदनमा आफूले सम्बोधन गर्ने र परराष्ट्रमन्त्रीले समेत विषय स्पष्ट गर्ने प्रस्ताव राखेपनि विपक्षी दलहरुले अस्वीकार गरेका छन् ।
प्रधानमन्त्री बालेन्द्र शाहले संसदमा दिएको सीमा सम्बन्धी अभिव्यक्ति र प्रतिनिधि सभाको नियमावली पारितको विषयलाई लिएर अवरुद्ध भइरहेको छ । जसका कारण बजेटमाथि छलफल प्रारम्भ नगरी झण्डै एकहप्ता बैठक स्थगित गरिएको थियो । विपक्षीले प्रधानमन्त्री स्वयं उपस्थित भएर अभिव्यक्ति बारे स्पष्ट गर्न र माफी माग्नुपर्ने माग गरिरहेका छन् ।
काठमाडौँ । जनमत पार्टीका अध्यक्ष सिके राउतले सीमाको रक्षा मधेशीले गरेको बताएका छन् ।
जनमत पार्टीले सोमबार माइतीघरमा गरेको प्रदर्शनका क्रममा बोल्दै राउतले सीमामा लड्ने र सीमाको रक्षा गर्ने नै मधेशी रहेको बताएका हुन् । उनले भने- ‘तपाईँहरू खाली काठमाडौंमा बसेर बोल्नु मात्रै हुन्छ, सीमा रक्षा भनेकै मधेशीले गरेको छ, कुनै नेपाली सेना, प्रहरी, राजामहाराजा वा शासकले होइन ।’
उनले लिम्पुवाधुरा र लिपुलेक राजा महाराजा र सशकले बेचेको आरोप लगाउदै मधेशीको हातमा शासन भएको भए लिपुलेकको अवस्था नआउने समेत दाबि गरेका छन् ।
काठमाडौँ । फिलिपिन्सको दक्षिणी क्षेत्रमा आएको ७.८ रेक्टर स्केलको शक्तिशाली भूकम्पमा परी मृत्यु हुनेको संख्या १५ पुगेको छ भने १२९ जना घाइते भएका छन् ।
फिलिपिन्सको नागरिक सुरक्षा कार्यालयका अधिकारीहरूका अनुसार भूकम्पबाट सबैभन्दा बढी प्रभावित सोक्सक्सार्गेन क्षेत्रमा १२ जनाको मृत्यु भएको छ । यो क्षेत्र दक्षिण कोटाबाटो, सुल्तान कुदारात, साराङ्गानी र जनरल सान्तोस सहरसहित चार प्रान्त र एक सहरमा फैलिएको छ ।
स्थानीय नागरिक सुरक्षा कार्यालयका निर्देशक रोड्रिगो सोस्मेनाका अनुसार उक्त क्षेत्रमा कम्तीमा १२९ जना घाइते भएका छन् । घाइतेहरूको विभिन्न अस्पतालमा उपचार भइरहेको छ ।
भूकम्पका कारण दक्षिणी फिलिपिन्समा दुई दर्जनभन्दा बढी भवनमा क्षति पुगेको छ । क्षतिग्रस्त भवनमध्ये अधिकांश व्यापारिक प्रतिष्ठान रहेका जनाइएको छ ।
भूकम्पको केन्द्रविन्दुनजिक रहेको जनरल सान्तोस सहरमा भवनहरूमा चर्को क्षति पुगेको छ भने उद्धार तथा राहत कार्य जारी रहेको अधिकारीहरूले बताएका छन् ।
प्रभावित क्षेत्रमा थप क्षतिको विवरण संकलन भइरहेको छ । अधिकारीहरूले मृतक र घाइतेको संख्या अझ बढ्न सक्ने बताएका छन् ।
काठमाडौँ । भारतविरुद्ध टेस्ट खेलमा अफगानिस्तान फलोअनमा परेको छ । जारी टेस्टको पहिलो इनिंगमा १५२ रनमा अलआउट भएसँगै अफगानिस्तान ४१२ रनले पछि परेपछि फलोअनमा परेको हो ।
पहिलो इनिंगमा अफगानिस्तानका लागि रहमत शाहले सर्बाधिक ६० रन बनाएका थिए । त्यस्तै डेभ्यु खेल खेलिरहेका भारतीय बलर मानव सुथारले ६ विकेट लिए भने प्रसिद्ध कृष्णले ३ र वाशिंटन सुन्दरले एक विकेट लिएका थिए ।
यसअघि टस जितेर पहिला ब्याटिंग गरेको भारतले ८ विकेट गुमाउदै ५६४ रन बनाएपछि इनिंग घोषणा गरेको थियो । भारतका लागि कप्तान शुभमन गिल १२६ र केएल राहुलले १०० रनको शतकीय पारी खेलेका थिए ।
काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले सर्बदलीय बैठकमा वैदेशिक सम्बन्धको विषयमा परिपक्क व्यबहार देखाउन सुझाव दिएको बताएका छन् ।
राष्ट्रिय स्वतन्त्र पार्टी (रास्वपा) का सभापति रवि लामिछानेले बोलाएको सर्वदलीय बैठकपछि बोल्दै लिङदेनले आफुले वैदेशिक सम्बन्धको विषयमा परिपक्कता देखाउन सुझाव दिएको बताएका हुन् ।
उनले प्रधानमन्त्रीले संसदमा सीमा बारे दिएको अभिव्यक्ति र लामिछानेले भारत भ्रमणका क्रममा विगतको बोझ बोक्दैनौं भन्ने विषयले परिपक्कता नदेखाएको टिप्पणी गरे ।
उनले देश चुनाव हार्नेहरुको पनि भएको बताउदै सरकारका गलत क्रियाकलापका भारी देशले व्यहोर्नुपर्ने अवस्था आउन नदिन धारणा राखेको बताए ।
लामिछानेले बोलाएको बैठकमा अन्य दलका सभापतिहरु भने सहभागी नभएर प्रतिनिधि पठाएका थिए ।
काठमाडौँ । स्थानीय तहलाई संविधानले सुनिश्चित गरेको अधिकार पूर्ण रूपमा कार्यान्वयन गर्नुपर्ने माग गर्दै जनमत पार्टीले सोमबार काठमाडौँको माइतीघर मण्डलामा प्रदर्शन गरेको छ।
पार्टीका नेता, कार्यकर्ता र समर्थकहरूको सहभागिता रहेको प्रदर्शनमा स्थानीय सरकारको स्वायत्तता कमजोर बनाइएको भन्दै सरकारविरुद्ध नाराबाजी गरिएको थियो। प्रदर्शनकारीहरूले ‘स्थानीय सरकारलाई अधिकार दे’, ‘स्वायत्तताको वाचा पूरा गर’ लगायतका सन्देश लेखिएका प्लेकार्ड बोकेका थिए।
जनमत पार्टीले सङ्घीय लोकतान्त्रिक गणतन्त्रको मूल मर्मअनुसार स्थानीय तहलाई निर्णय गर्ने अधिकार, आवश्यक स्रोत–साधन र कार्यान्वयन क्षमता उपलब्ध गराउनुपर्ने माग गरेको छ। उनीहरूले निर्वाचनका बेला गरिएका प्रतिबद्धता अझै पूरा नभएको आरोप लगाउँदै स्थानीय सरकारलाई अधिकार सम्पन्न बनाउन सरकार गम्भीर हुनुपर्ने बताएका छन्।
माइतीघरमा भएको प्रदर्शनका क्रममा सहभागीहरूले सङ्घीयताको प्रभावकारी कार्यान्वयनमा जोड दिँदै स्थानीय तहको अधिकार कटौती गर्ने कुनै पनि प्रयास स्वीकार्य नहुने चेतावनी दिएका थिए।
जनमत पार्टीले आफ्ना मागप्रति सरकारले बेवास्ता गरे थप सशक्त आन्दोलनका कार्यक्रम सार्वजनिक गर्ने संकेत समेत दिएको छ।
काठमाडौं । नेपाली बजारमा आज सुनको मुल्य घटेको छ भने चाँदीको मुल्य बढेको छ ।
नेपाल सुनचाँदी व्यवसायी महासङ्घका अनुसार सोमबार सुनको मुल्य तोलाको ९ सयले घटेर तोलाको २ लाख ९९ हजार ९ सयमा कारोबार भइरहेको छ । यसअघि आइतबार सुन तोलाको ३ लाख ८ सयमा कारोबार भएको थियो ।
यस्तै, आज चाँदीको मुल्य भने बढेको छ । महासङ्घका अनुसार आज चाँदी तोलाको १० रुपैयाँले बढेर तोलाको ४९०५ मा कारोबार भइरहेको छ । यसअघि आइतबार चाँदी तोलाको ४८९५ मा कारोबार भएको थियो ।
काठमाडौँ । लुम्बिनी प्राविधिक विश्वविद्यालयले प्रविधि, अनुसन्धान र नवप्रवर्तनलाई केन्द्रमा राखेर आयोजना गरेको दुईदिने राष्ट्रिय सम्मेलन सम्पन्न भएको छ। ‘परिवर्तनका लागि प्रविधि’ विषयमा नेपालगन्जमा आयोजित सम्मेलनमा विज्ञ, अनुसन्धानकर्ता, प्राध्यापक तथा विद्यार्थीहरूको उल्लेखनीय सहभागिता रहेको थियो।
सम्मेलनमा लुम्बिनी प्रदेशको दिगो विकासका लागि प्रविधिमैत्री समाधान खोज्ने, अनुसन्धानलाई प्रोत्साहन गर्ने तथा शैक्षिक संस्था, उद्योग र सरकारी निकायबीच सहकार्य विस्तार गर्ने विषयमा गहन छलफल भएको विश्वविद्यालयले जनाएको छ।
विश्वविद्यालयका डिन डा. नीरज केसीले स्थानीय स्तरमा देखिएका चुनौतीहरू—बढ्दो गर्मी, पानी व्यवस्थापन र विकाससँग सम्बन्धित समस्याहरू—समाधान गर्न प्रविधि र नवप्रवर्तनलाई जोड्ने उद्देश्यसहित सम्मेलन आयोजना गरिएको बताए।
उपकुलपति प्रा. डा. विनोदप्रसाद ढकालका अनुसार बाँके, बर्दिया, सुर्खेत, बुटवललगायत विभिन्न जिल्लाबाट विद्यार्थी तथा अनुसन्धानकर्ताहरूको सहभागिताले सम्मेलनलाई थप प्रभावकारी बनाएको छ। उनले नेपालगन्जलाई प्रविधि र नवप्रवर्तनको केन्द्रका रूपमा विकास गर्ने लक्ष्यतर्फ सम्मेलन महत्वपूर्ण कदम भएको बताए।
कार्यक्रममा राष्ट्रिय योजना आयोगका सदस्य डा. सुदन झा, प्रा. डा. विनयकुमार मिश्र, प्रा. डा. मनिष पोखरेल र डा. राजन सुवाललगायतका विज्ञहरूले प्रविधि, अनुसन्धान र विकासका विविध पक्षबारे धारणा राखेका थिए। सहभागी विद्यार्थीहरूले आफ्ना अनुसन्धानपत्रहरू प्रस्तुत गर्दै नयाँ सोच र अवधारणाहरू पनि साझा गरेका थिए।
प्यानल छलफलमा वक्ताहरूले नेपालगन्जलाई सूचना प्रविधिको क्षेत्रीय केन्द्रका रूपमा विकास गर्न सीमापार सहकार्य उपयोगी हुनसक्ने धारणा राखेका थिए। विशेषगरी भारतका उत्तर प्रदेश र बिहारका विद्यार्थीलाई समेत आकर्षित गर्ने सम्भावनाबारे चर्चा भएको थियो।
लुम्बिनी प्रदेशको गौरवको योजनाअन्तर्गत स्थापना भएको लुम्बिनी प्राविधिक विश्वविद्यालयले छोटो अवधिमै राष्ट्रिय तथा अन्तर्राष्ट्रिय स्तरका शैक्षिक कार्यक्रम आयोजना गर्दै आफ्नो पहिचान बलियो बनाउँदै गएको छ।