काठमाडौं। चीनले नेपाललाई चौथो खेपअन्तर्गत आपत्कालीन राहत तथा उद्धार सामग्री उपलब्ध गराएको छ। चीनबाट पठाइएको उक्त राहत सामग्री मंगलबार दिउँसो काठमाडौंस्थित त्रिभुवन अन्तर्राष्ट्रिय विमानस्थलमा आइपुगेको हो।

राहत सामग्री हस्तान्तरण कार्यक्रममा नेपालका लागि चिनियाँ राजदूत चाङ माओमिङ र नेपालका विज्ञान, प्रविधि तथा नवप्रवर्तनमन्त्री महावीर पुन सहभागी भएका थिए।

चीनले पठाएको पछिल्लो खेपमा उद्धार कार्यमा प्रयोग हुने होभरक्राफ्ट, स्टेनलेस स्टिलका स्थायी चुम्बकीय बाढी पम्प, अतिरिक्त ब्याट्री, शव संरक्षणका लागि प्रयोग हुने फ्रिजर तथा सौर्य ऊर्जाबाट सञ्चालन हुने बत्तीहरू रहेका छन्।

नेपालमा पछिल्लो समय देखिएका विभिन्न विपद्का घटनामा तत्काल उद्धार तथा राहतका लागि आवश्यक सामग्रीलाई प्राथमिकतामा राखेर यो खेप पठाइएको जनाइएको छ। यी सामग्रीले विपद् प्रभावित क्षेत्रमा आपत्कालीन उद्धार, राहत तथा त्यसपछिको व्यवस्थापन कार्यमा सहयोग पुग्ने अपेक्षा गरिएको छ।

चीनले यसअघि पनि नेपाललाई विभिन्न समयमा आपत्कालीन राहत सामग्री उपलब्ध गराउँदै आएको छ। पछिल्लो खेपलाई नेपालमा विपद् व्यवस्थापन तथा उद्धार कार्यलाई थप प्रभावकारी बनाउन चीनबाट प्राप्त थप सहयोगका रूपमा हेरिएको छ।

Read More

काठमाडौं । भोटेकोशी र त्रिशुली नदीमा आएको बाढीका कारण मृत्यु भएका १ हजार ३५७ जनाको शव फेला परेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले सोमबार बिहान सार्वजनिक गरेको विवरणअनुसार फेला परेका शवमध्ये १०२ जनाको सनाखत भइसकेको छ।

प्राधिकरणका अनुसार रसुवामा १६९, नुवाकोटमा १९७, धादिङमा ७०, गोरखामा ७५, नवलपरासी पूर्वमा २२३, नवलपरासी पश्चिममा २२२, तनहुँमा ३८ र चितवनमा ३६३ जनाको शव फेला परेको छ। फेला परेका शवमध्ये कतिपयमा आंशिक मानव अंग मात्रै रहेको प्राधिकरणले जनाएको छ।

बाढीपछि अझै ५ हजार ३३६ जना सम्पर्कविहीन छन्। सम्पर्कविहीन हुनेमा ५८७ जना विदेशी नागरिक रहेका छन्।

हालसम्म १३ हजार ५८३ जनाको उद्धार गरिएको छ। खोज तथा उद्धारका लागि २१ हजार ४०२ सुरक्षाकर्मी परिचालन गरिएको प्राधिकरणले जनाएको छ।

Read More

काठमाडौं । दक्षिण दिल्लीको सत्य निकेतन क्षेत्रमा बहुमतले भवन भत्किँदा मृत्यु हुनेको संख्या पाँच पुगेको छ। आइतबार दिउँसो भएको दुर्घटनापछि भग्नावशेषमा पुरिएकाहरूको खोजी तथा उद्धार कार्य अझै जारी रहेको दिल्ली सरकारका एक अधिकारीले बताएका छन्।

आधिकारिक स्रोतका अनुसार आइतबार दिउँसो करिब १ः३० बजे भवनको बेसमेन्टमा मर्मतसम्भारको काम भइरहेका बेला संरचना अचानक भत्किएको थियो। दुर्घटनामा मृत्यु हुनेमध्ये केही विद्यार्थीसमेत रहेको जनाइएको छ।

भवन भत्किँदा घाइते भएका अन्य ६ जनाको स्थानीय अस्पतालमा उपचार भइरहेको छ। भग्नावशेषमा थप मानिस पुरिएको हुनसक्ने आशंकामा सुरक्षाकर्मी तथा उद्धार टोलीले खोजी कार्यलाई तीव्रता दिएका छन्।

भारतीय प्रधानमन्त्री नरेन्द्र मोदीले घटनाप्रति गहिरो दुःख व्यक्त गर्दै मृतकका परिवारप्रति समवेदना प्रकट गरेका छन्।

Read More

काठमाडौं । युनिलिभर नेपाल लिमिटेडले रसुवामा आएको बाढीबाट प्रभावित परिवारको राहत तथा पुनःस्थापनाका लागि करिब ६ करोड रुपैयाँ बराबरको सहयोग गरेको छ।

कम्पनीले राहत तथा पुनःस्थापना कार्यमा सहयोग पुर्‍याउने उद्देश्यले प्रधानमन्त्री दैवी प्रकोप उद्धार कोषमा ५ करोड रुपैयाँ योगदान गरेको जनाएको छ। त्यसैगरी, करिब १ करोड रुपैयाँ मूल्य बराबरका २६ टन दैनिक अत्यावश्यक स्वास्थ्य तथा सरसफाइ सामग्रीसमेत उपलब्ध गराएको छ।

युनिलिभर नेपालका प्रबन्ध निर्देशक अम्लान मुखर्जीले विपद्को कठिन समयमा सबै एकजुट भएर प्रभावित समुदायको साथमा उभिनुपर्ने बताए। उनले नेपालले चुनौतीपूर्ण परिस्थितिमा धैर्यता र सहनशीलता प्रदर्शन गर्दै आएको उल्लेख गर्दै राहत तथा पुनःस्थापनाका प्रयासमा सहयोग पुर्‍याउने प्रतिबद्धता व्यक्त गरे।

प्रभावित परिवारलाई पुनःस्थापनाको यात्रामा साथ दिन कम्पनी प्रतिबद्ध रहेको मुखर्जीले बताए। उनका अनुसार विपद्का बेला निजी क्षेत्र, सरकार तथा विभिन्न संघसंस्थाबीचको सहकार्यले प्रभावित समुदायलाई आवश्यक सहयोग पुर्‍याउन महत्वपूर्ण भूमिका खेल्न सक्छ।

युनिलिभर नेपालले स्वास्थ्य, सरसफाइ तथा सामाजिक कल्याणमा केन्द्रित विभिन्न पहलमार्फत समुदायलाई सहयोग गर्दै आएको जनाएको छ। कम्पनीले पछिल्लो सहयोगबाट बाढी प्रभावित समुदायलाई तत्काल राहत पुर्‍याउन सहयोग पुग्नुका साथै विपद्को सामना गर्न सामूहिक प्रयासलाई थप बल पुग्ने विश्वास व्यक्त गरेको छ।

Read More

काठमाडौं । बाढी प्रभावित क्षेत्रमा हैजा संक्रमणको जोखिम बढेपछि स्वास्थ्य तथा खाद्य स्वच्छता मन्त्रालयले खोप तथा आवश्यक स्वास्थ्य सामग्रीको व्यवस्थापन तीव्र बनाएको छ। प्रभावित क्षेत्रमा पानीजन्य रोगको संक्रमण फैलिन नदिन मन्त्रालयले आवश्यक तयारीसँगै खोप अभियान सञ्चालन गर्ने तयारी गरेको हो।

मन्त्रालयले मंगलबार नुवाकोटका लागि ८० हजार ५२३ डोज अर्थात् २३ बक्स हैजाविरुद्धको खोप पठाएको छ। त्यससँगै १० थान फ्रिज–फ्री भ्याक्सिन क्यारियर, ०.६ लिटर क्षमताका २२० थान आइस प्याक र आठ थान फ्रिज ट्यागसमेत पठाइएको मन्त्रालयले जनाएको छ।

रसुवामा भने यसअघि नै हेलिकोप्टरमार्फत हैजाविरुद्धको खोप पठाइसकिएको छ। मन्त्रालयका अनुसार रसुवामा बिहीबारदेखि हैजाविरुद्धको खोप अभियान सञ्चालन गरिनेछ।

बाढीका कारण खानेपानी तथा सरसफाइ प्रणाली प्रभावित भएकाले हैजा लगायतका पानीजन्य रोगको संक्रमण फैलिने जोखिम बढेको मन्त्रालयले जनाएको छ। यस्तो अवस्थामा प्रभावित क्षेत्रमा संक्रमण रोकथामलाई प्राथमिकतामा राख्दै खोप अभियान सञ्चालन गर्न लागिएको हो।

मन्त्रालयले बाढी प्रभावित क्षेत्रमा स्वास्थ्य जोखिम न्यूनीकरणका लागि आवश्यक खोप, औषधि तथा स्वास्थ्य सामग्रीको उपलब्धता सुनिश्चित गर्न व्यवस्थापनलाई निरन्तरता दिइरहेको जनाएको छ।

Read More

काठमाडौं । नेपाल टेलिकमका कर्मचारीहरूले बाढीबाट प्रभावित नागरिकको राहत तथा पुनःस्थापनाका लागि प्रधानमन्त्री दैवी प्रकोप उद्धार कोषमा २ करोड २ लाख २६ हजार ६६ रुपैयाँ सहयोग गरेका छन्।

नेपाल टेलिकमका कर्मचारीहरूको तर्फबाट प्रदान गरिएको सहयोग रकमको चेक कम्पनीकी प्रबन्ध निर्देशक संगीता पहाडी (अर्याल)ले अर्थमन्त्री डा. स्वर्णिम वाग्लेलाई हस्तान्तरण गरेकी हुन्।

रकम हस्तान्तरण कार्यक्रममा नेपाल टेलिकम सञ्चालक समितिका सदस्य एवं अर्थ मन्त्रालयका सहसचिव टंकप्रसाद पाण्डेय, सञ्चालक समितिका कर्मचारी प्रतिनिधि सदस्य लोकबहादुर कटुवाल, प्रमुख वित्तीय अधिकृत द्वारिकाप्रसाद पौडेल र प्रमुख मानव संसाधन अधिकृत निर्झर भट्टराईको उपस्थिति थियो।

नेपाल टेलिकमका अनुसार उक्त रकम कम्पनीमा विभिन्न तहमा कार्यरत कर्मचारीहरूको तलबबाट तहगत योगदानका आधारमा कट्टा गरी संकलन गरिएको हो। कर्मचारीहरूको यो सहयोगबाट बाढी तथा विपद्बाट प्रभावित नागरिकको राहत र पुनःस्थापनाका कार्यमा सहयोग पुग्ने अपेक्षा गरिएको छ।

कर्मचारीहरूको व्यक्तिगत योगदानबाहेक नेपाल टेलिकमले संस्थागत रूपमा पनि कम्पनीको तर्फबाट छुट्टै रकम प्रधानमन्त्री दैवी प्रकोप उद्धार कोषमा जम्मा गर्ने तयारी गरेको छ। केही दिनभित्रै संस्थागत सहयोग रकम कोषमा जम्मा गरिने नेपाल टेलिकमका प्रवक्ता डा. कमल लामिछानेले जानकारी दिए।

Read More

काठमाडौं । सोमबार घटेको सुनचाँदीको मूल्य मंगलबार बढेको छ। नेपाल सुनचाँदी व्यवसायी महासंघका अनुसार आज सुनको मूल्य प्रतितोला ३ हजार ५०० रुपैयाँले बढेको हो।

महासंघका अनुसार आज सुन प्रतितोला ३ लाख ५ हजार ४०० रुपैयाँमा कारोबार भइरहेको छ। सोमबार सुनको मूल्य प्रतितोला २ हजार ४०० रुपैयाँले घटेर ३ लाख १ हजार ९०० रुपैयाँमा कारोबार भएको थियो।

यस्तै, चाँदीको मूल्य पनि मंगलबार बढेको छ। आज चाँदी प्रतितोला ४ हजार ७९० रुपैयाँमा कारोबार भइरहेको छ। सोमबार प्रतितोला ४ हजार ६९० रुपैयाँमा कारोबार भएको चाँदीको मूल्य आज १०० रुपैयाँले बढेको हो।

अन्तर्राष्ट्रिय बजारमा मंगलबार सुन प्रतिऔंस ४ हजार ४२९ अमेरिकी डलरमा कारोबार भइरहेको छ।

Read More

काठमाडौं । इन्डोनेसियामा ज्वालामुखी विस्फोटपछि करिब तीन हजार उडान प्रभावित भएका छन्। विमानस्थल सञ्चालनमा अवरोध आएपछि ३ लाख ५० हजारभन्दा बढी यात्रु प्रभावित तथा अलपत्र परेको बताइएको छ।

राजधानी जकार्ताबाट करिब १५० किलोमिटर टाढा रहेको अनक क्राकाटाउ ज्वालामुखी शुक्रबार राति अबेर विस्फोट भएको थियो। विस्फोटपछि ज्वालामुखीबाट लाभाका फोहोरा निस्कनुका साथै ठूलो मात्रामा खरानी फैलिएको छ। ज्वालामुखीबाट निस्किएको खरानी राजधानी जकार्तासहित लाम्पुङ प्रान्तसम्म पुगेको बताइएको छ।

जकार्तास्थित सोकार्नो–हट्टा अन्तर्राष्ट्रिय विमानस्थल स्थानीय समयअनुसार सोमबार बिहान ६ बजे पुनः सञ्चालनमा ल्याउने तयारी गरिएको थियो। तर विमानस्थल आसपासमा ज्वालामुखीको खरानी अझै रहेकाले सञ्चालन स्थगित गरिएको हो। विमानस्थलले जारी गरेको विज्ञप्तिअनुसार उडान सेवा सोमबार मध्यरात १२ बजेदेखि पुनः सञ्चालन गर्ने तयारी गरिएको छ।

नागरिक तथा सैन्य उडानका लागि प्रयोग हुने हलिम पेर्दानाकुसुमा विमानस्थल पनि सोही समयसम्म बन्द रहने जनाइएको छ।

उडान सेवा प्रभावित भएपछि सोमबार सोकार्नो–हट्टा अन्तर्राष्ट्रिय विमानस्थलको प्रस्थान कक्षमा यात्रुको लामो लाइन लागेको थियो। अलपत्र यात्रुहरू टिकटको रकम फिर्ता लिन तथा उडान सेवा कहिलेबाट सञ्चालन हुन्छ भन्ने जानकारी लिन विमानस्थलमा लामबद्ध भएका थिए।

Read More

काठमाडौं । एसीसी प्रिमियर कपको समूह चरणको अन्तिम खेलमा हङकङले नेपाललाई २६२ रनको लक्ष्य दिएको छ। मलेसियाको वायुमास क्रिकेट ओभलमा टस जितेर पहिले ब्याटिङ गरेको हङकङले निर्धारित ५० ओभरमा ७ विकेट गुमाउँदै २६१ रन बनाएको हो।

हङकङका लागि बाबर हायतले उत्कृष्ट अविजित शतकीय पारी खेल्दै ११७ रन बनाए। उनले १२६ बलमा ७ चौका र ७ छक्का प्रहार गरे। हायतले ईशान खानसँग आठौँ विकेटका लागि १२८ रनको अविजित साझेदारी गर्दै टोलीको स्कोर बलियो बनाउन महत्वपूर्ण भूमिका खेले। ईशान खान ३५ रनमा अविजित रहे।

तेस्रो क्रममा ब्याटिङ गर्न आएका हायतले एकतर्फ लगातार विकेट गइरहे पनि धैर्यपूर्वक पारी सम्हाल्दै हङकङलाई बलियो योगफलतर्फ डोर्याए। ओपनर जिसन अलीले १५ तथा अंशुमान रातले १३ रन बनाए भने साहिदवासीले ४५ रनको योगदान दिए।

नेपालका लागि बलिङतर्फ सन्दीप लामिछानेले सर्वाधिक ४ विकेट लिए। शेर मल्लले ३ विकेट हात पारे। नेपालका अन्य चार बलर भने विकेटविहीन रहे।

प्रतियोगितामा नेपालले पहिलो खेलमा बहराइनलाई ७ विकेटले पराजित गरेको थियो। दोस्रो खेलमा मलेसियामाथि ६ विकेटको जित निकालेको नेपालले तेस्रो खेलमा साउदी अरेबियासँग प्रतिस्पर्धा गरेको थियो। आजको खेल नेपालका लागि समूह चरणको अन्तिम खेल हो।

Read More

काठमाडौं। अमेरिकी राष्ट्रपति डोनाल्ड ट्रम्पले ग्रिनल्यान्डलाई अमेरिकामा गाभ्ने विषयमा पटक–पटक अभिव्यक्ति दिइरहेका बेला युरोपेली संघ (ईयू)ले ग्रिनल्यान्डसँगको सम्बन्ध थप बलियो बनाउने घोषणा गरेको छ।

ईयूले ग्रिनल्यान्डका लागि २० करोड युरो (करिब २३ करोड २० लाख अमेरिकी डलर) बराबरको लगानी प्याकेज घोषणा गरेको हो। युरोपेली आयोगकी अध्यक्ष उर्सुला भोन डेर लेयनले सोमबार ग्रिनल्यान्डको राजधानी नूकमा आयोजित कार्यक्रममा आगामी दुई वर्षभित्र स्थानीय जनताको जीवनस्तर सुधार गर्ने उद्देश्यले उक्त लगानी घोषणा गरेकी हुन्।

यसै अवसरमा ईयू, ग्रिनल्यान्ड र डेनमार्कबीच संयुक्त घोषणापत्रमा हस्ताक्षरसमेत भएको छ। घोषणापत्रमा युरोपेली आयोगकी अध्यक्ष भोन डेर लेयन, ग्रिनल्यान्डका प्रधानमन्त्री जेन्स–फ्रेडरिक निल्सेन र डेनमार्ककी प्रधानमन्त्री मेटे फ्रेडरिक्सेनले हस्ताक्षर गरेका छन्।

प्रस्तावित लगानी ग्रिनल्यान्ड सरकारको प्रशासनिक क्षमता सुदृढ गर्न तथा दिगो पर्यटन र आवास निर्माणसम्बन्धी कार्यक्रम अघि बढाउन प्रयोग गरिनेछ। ग्रिनल्यान्डको भविष्य त्यहाँका जनता र डेनमार्कले मात्र निर्धारण गर्ने बताउँदै भोन डेर लेयनले ईयू ग्रिनल्यान्डमा आफ्नो उपस्थिति र सक्रियता अझ बढाउन चाहेको बताइन्।

ईयूले सन् २०२८ देखि २०३४ सम्मको आगामी बजेट अवधिमा ग्रिनल्यान्डलाई प्रदान गर्ने प्रत्यक्ष आर्थिक सहयोग दोब्बर बनाउने प्रस्तावसमेत अघि सारेको छ। प्रस्तावअनुसार प्रत्यक्ष आर्थिक सहयोग ५३ करोड युरो (करिब ६१ करोड ६० लाख अमेरिकी डलर) पुर्‍याउने योजना छ।

प्राकृतिक स्रोतले सम्पन्न ग्रिनल्यान्ड रणनीतिक रूपमा महत्वपूर्ण आर्कटिक क्षेत्रमा अवस्थित छ। राष्ट्रिय सुरक्षाको कारण देखाउँदै अमेरिकी राष्ट्रपति ट्रम्पले ग्रिनल्यान्डमाथि अमेरिकी नियन्त्रण बढाउनुपर्ने बताउँदै आएका छन्। उनका यस्ता अभिव्यक्तिले ग्रिनल्यान्ड र डेनमार्कसँगै नेटोका अन्य साझेदार राष्ट्रसँग पनि तनाव बढाएको छ।

Read More